95
Olwembo oluwuuja oMusengwa
1 Mwize twembere oMusengwa,
tumwembere nʼeisangaalo, oyo eIbbaale omutwebisa ni tusuna obununuli.
2 Oleke twabe omumaisoge tumwebalye,
era tubbookooke enyembo egyʼokumuwuuja.
3 Ekyo kityo olwʼokubba, oMusengwa niiye oKibbumba omukulu,
era niiye oKabaka omukulu akira abakibbumba abandi bonabona.
4 Emisingi gyʼekyalo giri mu ngalogye,
nʼenairungu gyʼensozi, gyona gigye.
5 Enyanza yiye, olwʼokubba niiye eyagikolere,
nʼolukalu niiye eyalwekoleire nʼengalogye.
6 Mwize tukotame era tusinze,
tukome amazwi omumaiso ga Musengwa, eyatubbumbire.
7 Ekyo kityo olwʼokubba niiye oKibbumba waiswe,
era niiswe abantu abʼomu kiriisiryokye,
niiswe entaamagye egyalabirira.
Olwatyanu owemwawulira eigonolye,
8 timwakakanyalya emyoyo gyanywe
ngʼabazeiza baanywe owebakolere e Meribba, oku lunaku olubabbaire e Maasa omwidungu,
9 ngʼowebankemere ni bangezesya,
waire nga babbaire baboine ebinabbaire nkolere.
10 Okumala emyanka 40 nasunguwaliire abantu abo,
ni nkoba nti, “Emyoyo gyabwe ginzwaku ni gigota,
tibagondera ebiragiro byange.”
11 Kagira nasunguwaire ni ndayira nti,
“Tibalituuka kadi omu kifo omu nankabaweereire ekiwuumulo.”