94
OKibbumba niiye omulamuzi owa bonabona
1 Oo Musengwa, iwe oKibbumba anyaaŋa,
iwe oKibbumba anyaaŋa, oboneke olage obusungubwo.
2 Iwe omulamuzi owa bonabona,
osetuke osasule abʼamalala ekibasaanira.
3 Oo Musengwa, ababbibabbi balituuca di,
balituuca di okwepanka?
4 Basesema bibono byʼokwekudumbalya,
era bonabona abakola ebibbibibbi baizwire kwepanka.
5 Oo Musengwa, basasaigula abantubo,
era bagadya abantubo okububwo.
6 Baita abanamwandu nʼabafuubbi,
era batemula abanamawanga.
7 Bakoba bati, “OMusengwa tali kubona;
iye oKibbumba wa Yaakobbo tafaayo.”
8 Bamaayaani inywe, mwegendereze,
basirusiru inywe, mwalibba di nʼamalabuki?
9 Iye oyo eyateekerewo amatwi tawulira?
Iye oyo eyakolere amaiso tabona?
10 Iye oyo anenya abanamawanga tabonereza?
Iye oyo ayegesya abantu amalabuki mpaawo ekyamaite?
11 OMusengwa amaite ebiseego byʼabantu,
abimaite ati binambulamu.
12 Oo Musengwa, wʼenkabi iye oyo ogwogolola,
iye oyo ogwoyegesya amateekago.
13 Omuwumuca omu biseera ebigosi
paka nga bakuuliire ababbibabbi ekiina okubapapalya.
14 Ekyo kityo olwʼokubba oMusengwa talekawo abantube;
iye talekesula abantube okububwe.
15 Okusalanga emisango omu butuukirirye kwaliirawo,
bonabona abalongoole omu myoyo balikusiima.
16 Naani eyasetuka okuntaasa eeri ababbibabbi?
Naani eyayemerera okundamya abakola ebikole ebibbibibbi?
17 Singa oMusengwa tiyambereire,
nandibbaire nayabire ira e magombe e wasiriki.
18 Owenakobere nti, “Ntyerera,”
Musengwa okutakakwo okutakoma, kwampaniriire.
19 Ebineeraliikirirya owebimbitiriraku,
onjiryamu amaani ni nsangaala.
20 Toyezya okwegaita nʼabafugi abacaamu,
abagunja ebitali byobwenkanya omu mateeka.
21 Ababbibabbi beekumba ni bateesa okukola obubbibubbi abatuukirirye,
ni basalira ogwʼokufa abanambulaku musango.
22 Neye oMusengwa niiye olugaga lwange,
era oKibbumba wange niiye eibbaale lyange omu neebisa, mwiye ginjirukira okunkuuma.
23 Yalibabonereza olwʼebibbibibbi byabwe,
nʼabajigirica olwʼobubbibubbi bwabwe.
OMusengwa iye oKibbumba waiswe yalibajigirica.