22
Olwembo olwʼobuwanguli
(Zab 18)
1 Awo oMusengwa oweyanunwire oDawudi omu bwezye bwa Sawulo nʼabalabebe abandi bonabona oDawudi nʼayembera oMusengwa olwembo lunu oluti,
2 OMusengwa niiye eibbaale lyange omuneebisa, niiye olugaga lwange era omununuli wange.
3 OKibbumba wange niiye eibbaale lyange omuneebisa, mwiye munjirukira okunkuuma.
Niiye engabo yange, era niiye amaani agannunula.
Niiye olugaga lwange, mwiye munjirukira okunkuuma era niiye omununuli wange,
niiye annunula eeri abalabe bange.
4 OMusengwa gunsaba iye asaaniire okumuwuujanga,
era niiye annunula eeri abalabe bange.
5 Akabbikabbi akʼokufa kabbaire kaneeruguuliriirye,
amayengo agajigirica ni ganjikaku.
6 Okufa ni kuneebbowanganiryaku,
era entiisya yʼokufa nʼennumba.
7 Omu bigosi byange nasabire oMusengwa,
ni neekungirira oKibbumba wange okumbeera.
Ngʼali omu Yeekaaluye yawulisisirye eigono lyange,
era okukunga kwange ni kumugwa omu matwi.
8 Awo ekyalo ni kiyuuga era ni kitengeeta.
Emisingi gyʼensozi gyona ni gyenyeenya,
era ni gitengeeta, olwʼokubba oKibbumba yabbaire asunguwaire.
9 Omwosi ni gwedumbya engulu nga guzwa omu nindoye,
era omusyo ogujigirica ni guzwa omu munwagwe.
Era amanda agameigera ni gazwa omu munwagwe.
10 Nʼabiikulawo eigulu nʼaika ansi,
endikiirya ekwaite ozigi zigi nʼebba ansi wʼebigerebye.
11 Yatyaime oku keruubbi era okeruubbi nʼamuguluca,
era empewo nʼemuleeta kafuufu.
12 Yeebbuulisirye endikiirya,
kaisi ebireri bya ikendi ebiirugazire zigi, ni bimubiika.
13 Omu kitangaalakye ekyʼamaani,
ni muzwamu amanda agameigera omusyo.
14 Awo oMusengwa ngʼasinzirira omwigulu nʼatumula nʼeigono eryʼangulu ooti kubbwatuka kwʼeraadu;
eigono lyʼoNambulaku aMwagaagana ni baliwulira.
15 Nʼalasa obulasobwe, era nʼasalaanica abalabebe,
nʼabatiringania nʼokumesya kwa ikendi.
16 Musengwa, owewakaawukiire abalabebo
nʼofuwa nʼomwota gwʼomu nindoyo,
ansi wʼenyanza wabonekere,
nʼemisingi gyʼekyalo ni gibba waweeru aawo.
17 OMusengwa yasinziriire omwigulu nʼannunula,
era nʼantoola omu lwabi.
18 Yannunwire omu balabe bange abʼamaani,
era okuzwa mwabo abampalana, olwʼokubba babbaire bankiraku amaani.
19 Bannumbire nga ndi omu bugosi,
neye oMusengwa niiye eyambeereire.
20 Yantoireyo era nʼantwala omu kifo kyʼomweyaayo.
Yannunwire olwʼokubba yansiimire.
21 OMusengwa ampaire empeera kusinzirira ku bikole ebyʼobutuukirirye ebinkola.
Era ansaswire kusinzirira ku kutabbaaku musango.
22 Ekyo kityo olwʼokubba nkwaite amateeka ga Musengwa.
Era tinkolere ekikole ekibbikibbi ni kindeetera okuzwa oku Kibbumba wange.
23 Nakwaite amateekage gonagona,
era tinjeemerangaku ekiragirokye.
24 Mbulaku ekyokunnenya omumaiso ga Kibbumba,
era neekuumire okutakola ekikole ekibbikibbi.
25 OMusengwa kagira ampaire empeera kusinzirira ku bikole ebyʼobutuukirirye ebinkola.
Era nʼansasula kusinzirira kukutabbaaku musango omumaisoge.
26 Oo Musengwa, weeragisya ngʼobwoli mwesigwa eeri abo abeesigwa egyoli,
era weeragisya ngʼobwoli oNambulaku kyokukunenya eeri abo abanambulaku kyokubanenya.
27 Weeragisya ngʼobwoli mulongoole eeri abo abalongoole omu myoyo,
neye weeragisya ngʼobwoli muzira eeri ababbibabbi.
28 Onunula abawombeeki,
neye oswaza abʼeijoogo.
29 Musengwa, niiwe ekitangaala kyʼomwoyo gwange.
OMusengwa wange atoolawo endikiirya omu mwoyo gwange.
30 Niiwe onjezyesya okulumba amaje gʼabalabe bange,
nʼonjezyesya okumenya ebikomera byabwe.
31 OKibbumba ebikolebye byʼobutuukirirye;
oMusengwa byonabyona ebyasuubiza bituukirira.
Niiye engabo
yʼabo bonabona abairukira egyali.
32 Ekyo kityo olwʼokubba, aale naani oKibbumba okutoolaku oMusengwa?
Era naani eIbbaale omutwebisa okutoolaku oKibbumba waiswe?
33 OKibbumba niiye olugaga lwange olwʼamaani,
era annungamya omu nzira ennongoole.
34 Agumya ebigere byange ooti bya kimaadu,
era nʼankuumirayo e ngulu oku nsozi empaavu anambula bugosi.
35 Antendeka omu ngeri yʼokulwana entalo,
era ni mba nga mpezya okukolesya akalaso akʼekyoma ekigumu.
36 Musengwa, onteekereku obukuumi era nʼonnunula.
Engaloyo endiiro niiyo empanirira era obwikaikanibwo bunsuuca wʼamaani.
37 Ogalamiirye ebigere byange enzira,
era nandi ni ngwa.
38 Nabbingire abalabe bange ni mbakwata,
era nandi ni njirawo nga nkaali okubajigirica.
39 Nabasasaigwirye nandi ni bayezya okusetuka,
ni bafa ni mba nga mbamalire.
40 Wampaire amaani gʼokulwana olutalo,
era ni mpangula abannumba.
41 Wagirire abalabe bange ni banjiruka,
era najigiricirye ababbaire bancaawa.
42 Bakungire okubabbeera, neye nga mpaawo abanunula.
Era ni beekungirira nʼoMusengwa, neye nandi nʼabairamu.
43 Nabatentenere ni basuuka ooti nkungu,
era ni mbeemyaga ooti bitonyonyo byʼomu nzira.
44 Wannunwire okuzwa omu bulabe bwʼabantu bange,
nʼonsuuca mufugi wʼamawanga.
Era abantu abenabbaire timmaiteku ni babba nga ninze abafuga.
45 Era abʼamawanga agandi bakotamya emitwe okumpa ekitiisya;
babba bankuwulira ebibono byange ni bangondera,
46 Bawaamu amaani,
era ni bazwa omu ngaga gyabwe, ni baiza nga batukuta.
47 OMusengwa mwomi! Bamuwuujenge iye oyo eibbaale lyange omuneebisa!
Era oKibbumba iye oyo annunula bamugulumalyenge!
48 Niiye oKibbumba anjezyesya okuwangula abalabe bange,
nʼaica amawanga ansi wange.
49 Era andamya abalabe bange.
Oo Musengwa, onjezesya okuwangula abalabe bange,
era nʼonnunula eeri abantu abaizwire obukambwe.
50 Kagira Musengwa nakuwuujanga omu mawanga,
era ni nnyemba nga mpuuja eriinalyo.
51 OKibbumba awa okabaka obuwanguli obwʼamaani.
Akwatira ekisa oguyasukireku amafuta,
akwatira oDawudi nʼeibyairerye ekisa emirembe nʼemirembe.