23
Ebibono bya Dawudi ebisembayo
1 Binu niibyo ebibono ebisembayo okabaka oDawudi ebiyawandiikire:
“Ebibono bya Dawudi omutaane wa Yese,
ebibono byʼomusaiza oNambulaku aMwagaagana oguyagulumairye,
omusaiza oKibbumba wa Yaakobbo oguyasukireku amafuta,
omwembi omutake wa Isirairi.
2 “OMwoyo wa Musengwa niiye ampaire ebibono byʼokutumula;
ekibonokye niikyo ekiri omu munwa gwange.
3 OKibbumba wa Isirairi yatumwire,
iye omukuumi wa Isirairi yankobere ati,
‘Omuntu owaafuga abantu omu mazima,
owaafuga ngʼatya oKibbumba,
4 ayaka ooti isana eriri kuzwayo
nga mpaaku bireri;
ayaka ooti kitangaala kyʼeisana oluzwanyuma lwa ikendi
atoonya okumerya eisubi.’ ”
5 “Mazima eibyaire lyange lityo weryalibba omumaiso ga Kibbumba,
olwʼokubba yakolere na nze endagaano eyenkalaakalira,
egyatacuusacuusa era egiyakakasire.
Ekyo dala niikyo ekineegomba;
olwʼokubba obwo niibwo obwalibba obuwanguli bwange era oKibbumba mazima yalikituukirirya.
6 Neye abatatya oKibbumba bonabona babamuma eedi ooti mawa,
agebatakumbaania nʼengalo.
7 Era nabuli ataka okugatoolawo
ali nʼokukolesya kintu ekyʼekyoma ooba lunyago lwʼeisimo;
ni bagoocerya awebagakumbaaniirye ni gasiiriira.”
Abalwani ba Dawudi abʼamaani
(1Mi 11:10-41)
8 Ganu niigo amaliina gʼabalwani ba Dawudi abʼamaani:
Asooka niiye oYosebbu Bbaseebbesi omutaane wʼoMutakemoni, omukubbemberi wʼabalwani abakulu abasatu. Era oyo bamwetanga Adino owʼomu kika kyʼaBeezeni eyakoleserye eisimo nʼalwana nʼabasaiza 800, nʼabaita omu lulumba lumo.
9 Owokubiri yabbaire niiye Eryezaali, omutaane wa Dodo, oDodo owʼomu kika kyʼAkoki. Ngʼomoiza oku balwani abamaani badi abasatu yabbaire nʼoDawudi owebanyomooleire aBafirisuuti ababbaire bakumbaaniire e Paasi Daamimu oku lutalo ngʼaBaisirairi bonabona bairukirewo.
10 Neye iye Eryezaali nʼasigalawo nʼaita aBafirisuuti, paka engaloye oweyadembere era nʼesanyalalira oku mpiima. Era oMusengwa nʼamuwa obuwanguli obwʼamaani oku lunaku olwo. Awo kaisi aBaisirairi ni bakanga egiri Eryezaali kwambulya mirambo egyo, kyonkani.
11 Aiririraku nabba niiye oSaama omutaane wʼAge owʼekika kya Bakalali. Awo aBafirisuuti owebabbaire bakumbaaniire e Leki awabbaire omusiri gwʼenkolimbo, aBaisirairi ni bairuka aBafirisuuti abo.
12 Neye iye oSaama nʼayemerera aakati omu musiri ogwo. Era nʼagutaasa era nʼaita aBafirisuuti era oMusengwa nʼaleetawo obuwanguli obwʼamaani.
13 Lwabbaire lumo omu kiseera kyʼamakungula, abasatu oku balwani abakulu 30, ni baserengeta ni baaba eeri oDawudi omu mpuku okumpi nʼekibuga Adulaamu, nga ikyo ekibbula kyʼaBafirisuuti kikumbaaniire omu kiinamo kyʼe Lefayimu.
14 Omu kiseera ekyo oDawudi yabbaire mu lugaga, nʼenkambi yʼabalwani bʼaBafirisuuti ngʼeri e Bbeserekeemu.
15 ODawudi enyonta nʼemuluma, nʼakoba ati, “Kale singa wabbairewo omuntu andeeteraku amaizi agʼokunywa agazwa omwiruba eriri okumpi nʼegeeti yʼe Bbeserekeemu!”
16 Awo abalwani abakulu abasatu abʼamaani ni beejaala okwingira omu nkambi yʼaBafirisuuti, ni basena amaizi omwiruba eriri okumpi nʼegeeti eyʼe Bbeserekeemu, eriri aakati, ni bagatwalira oDawudi. Neye nʼagaana okuganywa, wazira nʼagasuka kwitakali okubba kyokuwaayo eeri oMusengwa.
17 Nʼakoba ati, “Oo, Musengwa, kinzwerawo nze okunywa amaizi ganu, olwʼokubba kiri ooti kunywa musaaye gwʼabasaiza banu abawaireyo obwomi bwabwe okugasyoma!”
Kagira oDawudi yagaine okuganywa. Ebyo niibyo abalwani abakulu abasatu abʼamaani ebibakolere.
18 Abbisaayi omuganda wa Yowaabbu, era omutaane wa Zeruyiya niiye eyabbaire omwekubbemberi wʼabalwani 30 abʼamaani. Yakoleserye eisimo nʼalwana nʼabasaiza 300, nʼabaita omu lulumba lumo, nʼatutumuka nʼabba moiza oku balwani 30 abʼamaani.
19 Atyo nʼabba niiye akiraku okututumuka mwabo 30, nʼasuuka mwekubbemberi waabwe, neye tiyabbaire mututumuki ngʼabalwani badi abasatu abʼamaani.
20 Nʼogondi niiye oBbinaaya omutaane wa Yekoyaada owʼomu kibuga oKabbuzeeri yena eyabbaire omulwani owʼamaani. Yakolere ebikole ebyʼamaani. Yaitire abalwani abasinsigu aBamowaabbu babiri, era lumo omu biseera ebyʼobuwolondoki yaikire omu kiruba nʼaita ompologoma.
21 Era yaitire omusaiza ombalamba oMumisiri, eyabbaire nʼeisimo. OBbinaaya yaabire e gyali ngʼali nʼomwigo, nʼanyaga oku Mumisiri oyo eisimo nʼalimusumuta nʼeisimolye eryo, nʼamwita.
22 Ebyo niibyo oBbinaaya omutaane wa Yekoyaada ebiyakolere, yena eriinalye ni litutumuka mwabo 30.
23 Ni bamuwa ekitiisya okukiraku badi abandi 30, neye iye tiyatutumukire ooti baadi abasatu. ODawudi nʼamusuuca mwekubbemberi wʼabakuumibe.
24 Abandi oku beekubbemberi bʼabalwani 30 niibo banu:
Asakeri omuganda wa Yowaabbu,
nʼErukanani, omutaane wa Dodo owʼe Bbeserekeemu,
25 nʼoSaama owʼekika kyʼaBakalodi,
nʼErika yena owʼekika kyʼaBakalodi,
26 nʼoKerezi owʼomu kibuga oPaluti,
nʼoIra omutaane wa Ikeesi okuzwa omu kibuga oTekowa,
27 nʼAbbiyezeeri owʼomu kibuga Anasosi nʼoMebbunaayi owʼekika kyʼaBakusaki;
28 nʼoZalumoni owʼekika kyʼaBakoki,
nʼoMakalaayi owʼomu kibuga oNetofaki,
29 nʼoKeredi omutaane wa Bbaana yena owʼomu kibuga oNetofaki,
nʼoItaayi omutaane wa Libbayi owʼomu kibuga oGibbeya oMubbenyamini,
30 nʼoBbinaaya owʼomu kibuga oPirasoni;
nʼoKidaayi owʼomu biinamo ebyʼokumpi nʼolusozi oGaasi,
31 nʼAbbi Alubboni owʼekika kyʼaBaalabba,
nʼAzumavesi owʼomu kibuga oBbakulimu,
32 nʼEriyabba owʼomu kibuga oSyalubboni,
nʼabataane ba Yaseni, nʼoYonasani
33 omutaane wa Saama owʼomu kibuga oKalali,
nʼAkiyamu omutaane wa Syalali yena owʼomu kibuga oKalali,
34 nʼErifereti omutaane wʼAkasubbayi owʼomu kibuga oMaaka,
nʼEryamu omutaane wʼAkisofeeri owʼomu kibuga oGiro,
35 nʼoKeziro owʼomu kibuga oKalumeri,
nʼoPaalayi owʼomu kibuga Alubba,
36 nʼoIgali omutaane wa Nasani owʼomu kibuga oZobba,
nʼoBbani owʼekika kyʼaBagaadi,
37 nʼoZereki oMwamoni,
nʼoNakalayi owʼomu kibuga oBbeerosi eyakwatanga ebyʼokulwanisya bya Yowaabbu omutaane wa Zeruyiya;
38 nʼoIra owʼomu kibuga oYatiri,
nʼoGalebbu yena owʼomu kibuga oYatiri,
39 nʼoWuliya oMukiiti.
Bonabona aamo babbaire 37.