3
Quesusi püve'eme, Muisexi hepaüna cave'emetücacu
1 Mericüte ne'ivama xemupasie Cacaüyarisie mieme, 'axeicüa xemuta'inierie que mü'ane taheima macave xehahüavecacu, müpaü mü'anecü 'ayumieme müpaü nepaine, xequena'erivani Quesusi. Mücü nü'ari nayani, mara'acameta nayani cuini mieme mütiuhüritüarie. Mücü canihücütüni hesiena teteviyatü temütahecüata.
2 Mücü yatinicamieni que maine que mü'ane mihüritüa, yaxeicüa que müticamiecai Muisexi, Cacaüyari quie quiecatari vahepaüsita hüritüarietü.
3 Peru 'icüsie pütiunaquixü masi yemecü ve'emecü müxeiyarienicü, Muisexi hepaüna catixeiyarievecacu, yaxeicüa qui vevivame cui ve'emecü que müticuxaxasiva, veviyaya hepaüna caticuxaxasivacacu qui.
4 Tevi pitivevie naime qui, peru que mü'ane nai mütiutivevie, mücü Cacaüyari canihücütüni.
5 Mericüsü, Muisexi yapüticamiecai Cacaüyari quie quiecatari yunaime vahepaüsita que mütiuhüritüarie, peru tiparevivame canihücütücaitüni xeicüa mucayeri mütihecüatanicü tita 'arique müticuxaxasivaniquecai hepaüsita.
6 Cürisitu püta yapüticamie quiecame nu'aya hücütütü, Cacaüyari quie quiecatari vahepaüsita que mütihüritüarie. Mericüsü tame quiena quiecatari tepühüme xüca tetahayeva tecamamatü 'aixüa te'utiyuatü tita temütecuevie hepaüsita tecacuyuitüarivatü quepaucua mütapareque.
Cacaüyari teüterimama que memüte'uxipitüarieca
7 'Ayumieme que maine 'Iyari Mütiyupata,
Hicü xüca xe'i'enieni 'utaniucacacu,
8 Xe'u'itutupetü xepüca'acüne yu'iyarisie
Que memüte'acü müme 'ana
Quepaucua memüyucuitüvecai nehamatü
Que memüte'uyuri mücü tucarisie
Quepaucua memünesi'uta'inüataxü
Macumavesie me'u'uvatü,
9 Haque xe'uquiyarima memünesihe'isipatüvecai,
Sepa ne'uximayasica memüxeiyacai huta teviyari viyari.
10 'Ayumieme nepuyeha'a 'ana miemetexi vahepaüsita.
Müpaü neputayü,
Yuheyemecü yu'iyarisie meneuyexürüveni, nehaitü.
Que nemütiuyeica, 'asimepücateheitimaivave.
11 'Ayumieme müpaü nepütinehüritüa neha'atü,
Müpaü ne'utaitü,
Yemecü mepüca'aye'axüani haque nemüvareca'uxipitüani.
12 Xequeneyucuerivayurieca xeme ne'ivama capa xevitü xeme 'iyarieya 'axa 'anenicü, capa yuri cati'eriecacü 'ihayevamütü Cacaüyari mayeyuri.
13 Masisü xexuime tucarisie xequeneyutuicani mexicuxi hicü xasiva, capa 'u'ituperecü xevitü xeme, tita 'axa müti'ane xecuamanacacu.
14 'Axeicüa tepütaxevi Cürisitumatü xüca yuri tete'erietü tetahayeva, matüaripai yuri que temüte'uta'erie, 'asitecacuyuitüarivatü quepaucua mütapareque,
15 müpaü que manuyüne,
Hicü xüca xe'i'enieni 'utaniucacacu,
Xe'u'itutupetü xepüca'acüne yu'iyarisie
Que memüte'acü müme 'ana
Quepaucua memüyucuitüvecai nehamatü.
16 Que hate mepüyucuitüvecai hamatüana sepa memi'eniecai. Müme mecanihümetücaitüni yunaitü 'Equipitu cuieyarisie memeyecü Muisexi varavitücücacu.
17 Mericüte, que hate vahepaüsita püha'acai huta teviyari viyari. Müpaü catinimasiücüni, müme mecanihümetücaitüni 'axa memüte'uyuri 'ana. Müme vacaxari 'apucuhetei me'atixüriecu macumavesie.
18 Mericüte, que hate tivarahüavetü tiyühüritüa, müpaü 'utaitü quename meca'aye'axüaniquecai yemecü haque müvareca'uxipietüaniquecai. Müme mecanihümetücaitüni yuri memücate'eriecai.
19 Mericüte 'ayumieme müpaü tepütemate, mepüyutatexi me'aye'axüanique yuri memücate'eriecaicü müme.