4
U hihatuts
A matsi hahatoulana, alimiou go tuol hakarapoto lasmia tara nitagala tara Tsunono. Alia e ngilin tara koru ragou limiou, a man hahikapien i tar. Alimiou e kato hasasaala korue moulia na limiou e heremi a prais i tar. Alimiou oro Yuodia mere Sintiki, alia e ranga hataatagi gia i tamilimiou, alimiou go torohanan hiakaka hanigaiam, taraha alimiou u mun toulana te hamana uami limiou tara Tsunono. Na lia e rangate goulö ti ron kui gono meiou lia, alia e ngilegu alö go taguhir a huol a tahol teka. Taraha, nori i kui hatagala koru me ti hahatei lamenien u Bulungana u Niga, nori mere Klemen na palair a man hahikapien hoboto i tar ti kui gono meioulia, na man solo i taren e kana turu bukuna tara nitöatöa.
Alimiou go sasaala nitöa meiam a Tsunono! Na lia e hatei lel ragou limiou, sasaalaiam! Alimiou go kato hatami mia turu katuun hoboto. A Tsunono e sukusukun kopis poutsnama. Alimiou goma hakats hapara nami ta töa ta ka. Kaba limiou go singo siliam a mamanaka, bate rangatemi e Sunahan a manka te makmakumuna i tamilimiou, ba limiou te haniga nitöa uamiou i tanen. Na masalohana te hala nena e Sunahan e pan balana. Na u katuun ema atei haniga silerien. Kaba a masalohana teka e ka noua i torimilimiou na turu hakats i tamilimiou, te hamana uami limiou tere Iesu Kristo.
Na töa patu a ka, a man hahatoulana. Alimiou go hakats nitöa neiam a manka a man mana, na manka a man niga, na manka te matsköna, na manka te gogosona, na manka te hanigeier u katuun. Alimiou go hakats siliam a mamanaka te tatei ranga haniga ner u katuun. Alimiou go katoeiam a manka tu hatuts railia limiou na manka ti tareiam limiou tu kati lia na man ka ti hengoeiam limiou tu kati lia. Be Sunahan te ka gono meranou limiou. Nonei te hala ranoui ra a masalohana.
E Pol e sasaala mena a manka te lueien
10 Alia e sasaala korugu na lia e haniga gia tara Tsunono te haröto mena milimiou te hakats sil noahas mena milimiou alia. Alimiou e ngilin taguhu nitöa namou lia, kaba limiou u möaiam ta maroro tego mar taguhu menami lia. 11 Alia ema makmakum nagi ta ka ba lia temar ranga uagu teka. E möa, alia e sasaala megu a man saha manka te ka megu lia. 12 Alia e antunan ka hanigagu tara pöata te makmakum na a manka, na tara pöata has te ka megia lia a manka man para. Tara mamana mar nikaka alia u hatuts hakapein tego mar sasaala uu lia, e noahasina tego masul uu lia na tego bes uu lia, tsi tego para uu a manka na tego makmakum uaien. 13 E Kristo nonei te hale noi lia a nitagala, na te hantune noulia tara mamanaka hoboto. 14 Kaba limiou e kato haniga koru memiou te taguhu noahas mena milimiou alia tara pöata teka te ka megia lia a nitiama.
15 Alimiou u katunura i Pilipai e atei miou, a pöata tu laba naia lia a provins i Masedonia temi rarare mameia lia u Bulungana u Niga, alimiou puku a pal katunura turu lotu tu taguhe moulia tara markato tu hala mena milimiou a moni na man taina manka has. Kaba palair u katuun, e möa. 16 Na tara pöata tu kaia lia tara taun i Tesalonaika, alimiou i molo hitaguhu hapara mia i tar. 17 Kaba limiou goma poeiemi alia e ngilin lu tunegu ta hitaguhu. E möa. Alia e sasaala koru megu te tara menagi lia alimiou u katuun u tatangana. E Sunahan e tatei kato haniga ranou limiou.
18 Alia e ka tala megu a manka tu hala namuma limiou. E Epaprodaitus e halei mei lia a manka hoboto tu hala namuma limiou. A manka teka e herenei u haats te soksoka hanigan töana te la uana tere Sunahan be Sunahan te haniga korue nen. 19 E Sunahan i tar e hala ranoui limiou romana a mamanaka te makmakum ba nami limiou tara mamanaka a niga koru i tanen, taraha ara u katuun tere Iesu Kristo. 20 Aragi solosei nitöani e Sunahan e Tamarara tara mamana pöata hoboto. U mana.
U kapakapana u ranga
21 Alia e hala negu u hanhaniga i tar turu katuun hoboto te pala uaier tere Iesu Kristo. Na man hahatoulana i tarara te ka gono meriou lia e hala has naier u rangan haniga i taren i tamilimiou. 22 U katuun tere Sunahan te kui ria tara luma pan tere Sisa a gamman pan e hala neruma u hanhaniga i tamilimiou, na u katuun hoboto tere Sunahan teka e hala has nariou u rangan haniga i taren i tamilimiou. 23 A nitaatagi tere Iesu Kristo a Tsunono e tatei ka gono mena u namnamei i tamilimiou.
Alia e Pol