6
Eleazar Kah Thangthuinah
1 Eleazar tah Judah rhoek kah khosoih la om tih a hing khuiah tah bahoeng a hinyahnah uh. A taengkah mawt kung rhoek taengla hooi uh tih amih te thangthuinah bet toeng ham a thui pah. Te phoeiah a dangkah bangla thangthui:
2 Khohni Pathen, kamih kah cungkuem thaom manghai aw, na suentae he na rhennah neh na uk coeng.
3 Kamih he namah ca la ka om uh dongah n'dan thuk lah, Abraham neh Jakob kah cahlah rhoek ni. Hlamat vaengah ni na pilnam la kaimih nan tuek coeng. Tedae kholong kho ah kamih tah yinlai bangla ka duek uh pawn ni.
4 Kan napa rhoek khaw Egypt ah sal la om uh. Te vaengah amih te manghai hlangmuen loh a uk tih a leng neh a caem kah thaomnah dongah pomsang. Tedae na pilnam Israel ham te the rhennah a len la na tueng sak dongah manghai neh a caem khaw tuipuei khuila na buek sak.
5 Assyria manghai Sennacherib khaw a rhalkap hlangmi muep a yet dongah hoem bal. Te vaengah diklai namtom boeih te anih loh a uk bal. Tedae na khopuei cim Jerusalem te a hliphen tih a muk vaengah tah te manghai hlangmuen te na taekyaak dongah diklai ah na thaomnah na tueng sak.
6 Babylon mueirhol bawknah lakah hmaisai hmaitak khuiah duek ham aka tuek cadong pathum te khaw ka Boeipa namah longni na hlawt. Te vaengah a lu dongkah samtham pataeng a ung moenih ta. Hmaitak khaw buemtui neh na daeh sak tih amih kah rhal rhoek te lat na ung sak.
7 Namah long ni Daniel khaw na hlawt bal. Anih soah hlang tloe rhoek loh laithae a pael uh dongah dantatnah a dang dae te rhoek te khaw sathueng rhom khui lam ni na voeih.
8 Jonah loh tuipuei nga len bungpuei khuiah patang a khang vaengah khaw namah loh na hm uh. Anih te duek dalh khui lamloh na hlawt dongah a cako taengla bal ham sading la na hlah.
9 Kamih Israel pilnam la ka om uh dae hekah kholong hlangrhong loh n'phaep uh tih m'poeih uh coeng. Namah long tah hoemdam neh koevoeinah he na thinah tih thahnoeng hlang te na lungnah, na rhen tih a hoeptlang bal. Te dongah na thaomnah te kaimih mhmuh sak mai.
10 Egypt tamna la om khui lamloh namah taengla ka mael uh coeng, kaimih he ka rhal kut khui lamloh n'hlawt lah. Ka Boeipa aw, kaimih he phae hamni nan coelh oeh atah na ngaih bangla kaimih he n'saii laeh.
11 Kaimih he n'ngawn daengah nih amih kah a hong mueirhol te ka bawk uh van pawt eh. Na pilnam hlawt ham na thanah khaw thui kanoek laeh.
12 Nang tah dungyan Pathen la na om. Na tlung tih na tloengkhoelh na om coeng. Kamih n'tungaep lamtah kaimih soah n'rhen lah. Kaimih kamih he hmuiyoi bangla he kah hlangmuen rhoek kut ah duek hamla n'voeih uh coeng.
13 Na thadueng neh amih te hih lamtah thuen sak. Boeipa nang nih kan hinyah uh. Namah loh tanah na khueh yoeyah tih na thaomnah long kaimih dueknah khui lamkah n'hlawt.
14 Kamih kah thangthuinah neh ka ca rhoekkah thangthuinah he han ya lah.
15 Kamih taengah na om te he kholong rhoek taengah tueng sak lah. Na olkhueh te khoem lamah ka rhalcak kah ram kaimih n'om puei lah.
Pathen Phoe Tih Judah Rhoek Loeih
16 Eleazar kah thangthuinah a boeih van vaengaeh manghai Philopator khaw toltung la pawk tih a vuei rhoek, hoemnah rhalkap rhoek neh puei uh.
17 Judah rhoek loh a hmuh vaengah a len ngaih la thangthui uh a rhah a pang uh ol te kolvan boeih loh a yaak uh. Tekah ol loh rhalkap rhoek khaw a thuen sak.
18 Te van nen tah thaom koek Pathen, oltak Pathen kah maelhmai te vaan ah tueng. Amah loh vaan vongka te a ong tih puencawn panit te suntla thuk. Everyone in the stadium watched in complete horror, yet the Jews never saw a thing.
19 Puencawn rhoi loh caem rhal te a tloek rhoi tih amih te hlam thai pawt hil thirhui neh a pi. Amih a maehma neh a thuennah hil a caeh tak.
20 Philopator amah khaw let uh tih a rhih coeng dongah hoemdamnah neh phuel uh voel pawh.
21 Te phoeiah tah vuei cako te khaw hoi uh tih a hnuk kah rhalkap caem aka cet te koe a til.
Philopator kah olpaek
22 Philopator loh a thintoek te rhennah kopoek la a hoi vilvak. Judah rhoek soah a thae la a taengnah nah te khaw mikphi la bo.
23 Judah rhoek kah a rhungrhah te a yaak tih dueknah yook ham diklai la bakop uh te khaw a hmuh vaengah a uepnah a payaa rhoek te khaw a pang thil coeng.
24 Nangmih loh kai nan tloelh uh tih Salboei lakah a thae la sai ham na saii uh. Kai loh nangmih taengah rhennah ka saii coeng dae ta. Te lalah khaw kai olngai ham na aal uh tih ka ram ham rhaidaeng la he bang na mangtaeng uh.
25 Judah rhoek a im lamloh na loh uh tih Alexabdria la na khuen uh te na boe uh tih na ang uh coeng. Amih long la kum teyet te namtu soah uepomnah a khueh.
26 A hmanhu bueng ah ni kai soah na then uh. Ka olkhueng na poe uh tih thinom pilnam poeih ham na taeng uh te ka tangnah thai moenih. Amih puet a patang khaw rhoeh laeh saeh.
27 Judah rhoek te hlah tih aka thuem mueh dantatnah khui lamloh loeih sak ham nangmih ol kan paek coeng. Amih te amah im ah ngaimong la tueih uh lamtah a caeh vaengah khaw mih taengah khodawkngainah bih uh.
28 He rhoek teh thaom koek Pathen, vaan kah aka hing Pathen ca rhoek ni. Mamih patuel rhoek tue lamloh amih long hi mamih ram khang a paipuei. Te dongah a ca rhoek he loeih saeh, a ti.
29 Philopator kah ol thui bawt a khah nen tah Judah rhoek te a loeih sak. Te dongah dueknah khui lamloh amih aka hlawt amamih kah Pathen te a koeh uh.
Judah Rhoek Kah Kohoenah
30 Philopator te Alexandria mael tih ramkah tangka aka khoem boei te a tah. Philopator loh anih te a uen tih Judah rhoek loh khohnin rhih khui poei sainah rhoeh ah misur tui neh buh a lai sak. Amih ta duek ham a poek coeng dae toltung ah poei te a saii uh.
31 Omngaih la tamhoenah te Judah rhoek loh a uum uh. Amah he pilnam rhoek loh yarhai neh dueknah a paan uh. Duek tih up ham ni a ngai uh coeng dae hmuen takuem ah omngaih uh.
32 Amih loh rhaengsae laa te a toeng uh tih ana patuel rhoek kah a sak bangla Pathen koehnah a sak uh. Thaomnah tanglue neh amih aka khang Boeipa te a uem uh. Omngaih laa sak tih laam hamla tumbael khaw a tarhoek uh.
33 Philopator mah ham poei a saii van tih Judah rhoek aka hlawt Pathen te a koeh.
34 A boei rhoek long tah Judah rhoek he duek vetih vaa kah buh lam nih a om eh tila a poek uh. Amah a boei he rhaidaeng la nguek uh coeng. Amih loh Judah rhoek te duek sak ham a mangkhak la thintoek thinsa neh ming a hlum pah. Tedae amih te rhep yak uh coeng.
35 Judah rhoek loh Pathen a uum uh tih bukkoknah te a vael uh vaengah, laasa rhoek kah a sak koehnah laa te a hnatun uh.
36 Poei a poeng uh phoei ah tah tahae kah he kum takuem khohin rhih khui ah saii tih poek ham ol a tloek uh. Tedae hekah poei he yurhuinah ham pawt tih Pathen loh amih dueknah khui lamkah a hlawtnah te poeknah ham a saii uh.
37 Te phoeiah tah amamih im la mael ham te Philopator taengah a bih uh tih, anih long khaw a ngai pah van.
38 Philopator kah a boei rhoek loh Judah rhoek minghlumnah te Pachon hla hnin pakul panga vaengah a tong tih Epeiph la a hin li vaengah a coeng uh.
39 Te dongah khohnin likip di uh. Judah rhoek te dantat ih Epeiph hla a hnin rhih vaengah ngawn ham a taeng uh.
40 Tedae Boeipa loh a rhennah te a tueng sak tih amih pakhat rhip te boeih a hlawt.
41 Te dongah Judah rhoek long tah Epeihp hla hnin rhet lamloh hnin hlai li hil poei a saii uh. Te vaengah Philopator amah loh buh neh misurtui te boeih a paek.