7
Philopator Kah Capat
Philopator loh Judah rhoek te im la a mael sak bueng kolla, amih kawng te ca a tael tih a ram khopuei kah rhalboei te boeih a pat. Te capat dongah:
1 Egypt manghai Ptolemy Philopator loh ka ram khuikah ka rhalboei rhoek neh rhaengsang boei rhoek kut kan tuk. Sading ngaimong la na om uh ti ngaiuep.
2 Pilnam khaw sueng tih then uh ngawn. Khohni Pathen tah bahoeng then tih mamih ram khui hnothen muep a saii coeng.
3 Te lalah khaw ka boei ka na hlangvang loh Alexandria ah a thae sai ham n'thaphoh uh. Amih loh ka ram khuikah Judah rhoek te boeih coi rhenten tih a aal atah amih te dantat hamla a bih uh.
4 He hlangmuen boei rhoek loh Judah rhoek he a omnah kung boeih ah rhap hnaemtaek ham a thui. Amih he boeih n'thup pawt koinih uknah he n'taem thai mah pawh a ti uh.
5 Judah rhoek te toltung la a khuen uh phoeiah sal neh hmuiyoih kangnah bang lam khaw a then la khueh uh pawh. Mamih kah boei rhoek he rhih om tih a muen nen ni boethen Judah rhoek te duek khuila a thak uh. Judah rhoek te ol kam at kangna khaw a dawt uh moenih.
6 Ka boei a tloe rhoek neh kamah loh hetla aka saii boei rhoek te dantatnah ka paek coeng. A tloe kholong rhoek ka hlawt bangla Judah rhoek he ka hlawt coeng. Vaan kah Pathen loh Judah rhoek a huul tih pa loh a ca rhoek a sawt bangla amih te a sawt te m'ming uh.
7 Judah rhoek he mamih taeng neh patuel taengah uepom neh paya then om yoeyah uh. Te dongah amih taengah tholh a pael uh te ka hmil uh coeng.
8 Te dongah amih te im la mael sak ham ka thui coeng. Judah rhoek te amah bueng mael cakhaw amih te thae la sai pawt ham, omsasaipat la khueh pawt ham neh, a tloe hno then pawt te amih soah saii pawt ham boeih ol ka paek coeng.
9 Na ming uh vanbangla Judah rhoek soah a thae la n'taeng a khaw, amih te ngaihmang la n'khueh vaengah khaw mamih he hlang ukkung la n'om uh pawt rhal lamni m'poeh uh. Khohni Pathen, hlang hing saithainah boeih aka uk Pathen te mamih taengla ha hoi vetih amih ham a thung ni. Yoethen uh saeh,” a ti.
Judah Hlang Boekoek rhoek dantatnah
10 Judah hlang uepom rhoek loh he capat he a tae vaengah amih te tlek nong uh pawh. Alexandria ah om dae dueknah te rhael hamla Pathen taengah aka tholh, Pathen olkhueng aka hnawt Judah rhoek te dantat hamla Philopator taengah a bih uh.
11 Boekoek rhoek he a taengah oltak la a om tlaih voel pawt ham khaw uepom Judah rhoek loh Philopator taengah a thui pa uh.
12 Philopator loh kotluepnah a khueh tih Pathen olpaek aka ngai pawh boekoek Judah rhoek te boeih khoe hamla uepom Judah rhoek taengah anaa a paek.
13 Philopator kah oltloeknah te a yaak uh vaengah, Khosoih rhoek neh Judah aka om rhoek loh kupaeng neh a uem uh tih Pathen taengah tamlung neh a koeh uh phoeiah mael uh.
14 Amih te Alexandria la a caeh van neh Pathen kah a doe pawt koi neh a olpaek aka aal Judah hlang boeih te dan a tat uh. Amih boekoek rhoek te hlang boeih kah a hmuh ah yahtoe la a duek sak uh.
15 Amah tekah khohnin ah tongpa hlang yathum a ngawn uh tih hnukpoh Judah rhoek muep a ngawnnah khohnin la a poek uh.
16 Te phoeiah tah uepom Judah rhoek Alexandria la mael uh. Rhaipai botui te a lu dongah a khuem uh. A napa rhoek kah a bawk Pathen hinyahnah neh koehnah laa then te a sak uh. A caeh uh neh Israel pilnam a hlawt yoeyah bangla amih aka hlawt Pathen te a uum uh.
Uepom Judah rhoek loh im a paan
17 A tue bet a di phoeiah tah Judah rhoek te “Rhaithak Khopuei,” la ming aka om Ptolemais a pha uh. Amih im la aka phuei sangpho tah teah te duem. Amih hlawtnah te koep uum hamla Judah rhoek loh kovainah a khueh uh dongah sangpho loh hnin rhih a rhing.
18 Amih loh Philopator te a oep uh. Amih im la a mael vaengkah ham a ngoe boeih te anih long ni a khaan pa tih a paek.
19 Sangpho dong lamloh sading la a rhum uh vaengah tah Judah rhoek loh bahoeng a uem uh. Te dongah tekah khohnin te tah yincaehnah khotue la rhawp poek ham oltloeknah a khueh uh.
20 A im la a mael uh hlan vaengah kaam lung te a hmuh uh tih kum takuem kah te khohnin ah khotue cim te saii hamla olpaek te a tarhit uh. Te hmuen te khaw thangthuinah hmuen cim la a nawn uh.
Amih kah im caeh long boeih tah lan ah khaw, tui dongah khaw sading la caeh ham te Philopator loh a saii pah coeng dongah sading la im a pha uh van. Amih te loeih uh coeng tih thongtla a poeih uh voel pawt dongah bahoeng omngaih uh.
21 Te dongah a rhal rhoek long khaw Judah rhoek te a hinyahnah coeng tih amih paya la khueh ham ol a kam uh.
22 Judah rhoek kah koerhang aka lo rhoek long khaw Pathen loh ns'saai pawn ko a ti uh dongah lakueng uh. Te dongah ukkung cabu dongah a om bangla Judah rhoek kah koerhang te koep mael ham khaw pilnam loh a thahlue uh.
Pathen Koeh Pai Saeh
Khohi Pathen loh khobaerhambae a saii te he cabu dongah tael la om coeng. Te dongah Judah rhoek khaw dueknah lamloh hlawt pai rhoe saeh.
23 Israel pilnam aka khang Pathen a yoeyah yuhui neh thangthen pai saeh. Amen.