8
Midiana taudia be tuari idia lusi momokani
1 Eparaima taudia ese Gideona idia nanadaia, idia gwau, “Edena bamona ai dekenai umui karaia? Midiana taudia tuari henia totona umui lao neganai, badina dahaka ai dekenai oi boiria lasi?” Gideona dekenai idia badu momokani.
2 Vadaeni Gideona ese idia dekenai ia haere, ia gwau, “Umui ese umui karaia karadia be bada, to lau karaia gaudia be bada lasi. Eparaima taudia e, sedira umui laloa umui karaia gauna be maragi, to emui kara ese lauegu kara ia hereaia momokani.
3 Dirava ese Oreba bona Sebe, Midiana gunalaia taudia emui imana dekenai ia atodia. Lauegu kara ese emui kara ia hereaia diba, a?” Unai bamona Gideona ia hereva, vadaeni edia badu ia ore ia lao.
4 Gideona mai ena tatau 300 be Ioridane Sinavai dekenai idia ginidae, idia hanaia. Idia be manori momokani, to idia ese Midiana taudia idia lulua noho.
5 Vadaeni Gideona ese Sukoto hanua taudia ia noia, ia gwau, “Mani emui kara, lauegu tatau dekenai aniani do umui henia, badina idia be manori, bona lau be Midiana king taudia Sebaha bona Salamuna lau lulua noho.”
6 To Sukoto lohia taudia idia gwau, “Be, Sebaha bona Salamuna umui dogoatao vadaeni, a? Badina dahaka ai ese beredi emui tatau dekenai do ai henia, a?”
7 Gideona ia haere, ia gwau, “Vadaeni! Lohiabada ese Sebaha bona Salamuna lauegu siahu henunai ia atodia neganai, lau ese tano kaukau dekena amo au ginigini bona ava ginigini do lau abia, idia dekena amo emui kopina do lau darea momokani.”
8 Unai dekena amo Gideona ia daekau lao Penuela dekenai, bona unai hanua taudia aniani totona ia noidia. To idia ese idia haere henia, Sukoto taudia idia haere henia hegeregerena.
9 Vadaeni Gideona ese Penuela taudia ia hamaoroa, ia gwau, “Dohore lau giroa mai, mai kwalimu danu neganai, lau ese emui kohoro do lau veria diho momokani.”
10 Sebaha bona Salamuna be Karakoro dekenai idia noho, mai edia Midiana tuari taudia danu. Inai Midiana tuari taudia do noho, be tatau 15,000 sibona, badina be Israela taudia ese ibounai 120,000 idia alaia ore vadaeni.
11 Vadaeni Gideona be Noba bona Iogobeha edia dina daekau kahana dalana dekenai ia lao. Unai dala be taunimanima idia noho lasi tano ena hetoa gabunai. Gideona be hunia dekenai ia ginidae, bona unai tuari taudia 15,000 idia hegaegae lasi neganai Gideona ese ia tuari henidia.
12 Sebaha bona Salamuna, Midiana king ruaosi be idia heau, bona Gideona ese ia luludia. Ia abidia, bona edia tuari taudia ibounai ia halusidia.
13 Vadaeni Gideona Ioasa be tuari dekena amo ia giroa lou, Here ena ororo dalana dekenai.
14 Ia ese Sukoto eregabe tauna ta ia dogoatao, bona ia nanadaia, ia gwau, “Sukoto gunalaia taudia edia ladana be daikadaika?” Vadaeni ia ese Sukoto lohia taudia bona tau badadia edia ladana ia torea, idia be ibounai 77.
15 Gideona be Sukoto taudia dekenai ia ginidae, idia dekenai ia hereva, ia gwau, “Sebaha bona Salamuna be inai. Umui ese lau dekenai umui hevaseha, umui gwau, ‘Be, Sebaha bona Salamuna oi dogoatao vadaeni, a? Badina be dahaka ai ese beredi emui tatau manoridia dekenai do ai henia, a?’ ”
16 Vadaeni Gideona ese hanua gunalaia taudia ia dogoatao, au ginigini, tano kaukau gaudia, bona ava ginigini dekena amo idia ia dadabaia.
17 Penuela hanua ena kohoro danu ia ese ia veria diho, bona hanua ena tatau ia alaia mase.
18 Vadaeni Gideona ese Sebaha bona Salamuna ia nanadaia, ia gwau, “Taboro Ororo dekenai umui alaia mase taudia be edeseni?” Idia ese Gideona dekenai idia haere, idia gwau, “Idia edia vairana be oiemu vairana hegeregere, bona edia toana be king ena natuna hegeregere.”
19 Gideona ia gwau, “Idia be lauegu tadina taudia, lauegu sinana ena natuna. Lohiabada ena vairanai lau be momokani lau gwau, bema egu tadina umui alaia lasi neganai lau ese danu umui do lau alaia lasi.”
20 Vadaeni Gideona ese iena natuna vara guna Ietere ia hamaoroa, ia gwau, “Oi toreisi, ruaosi oi aladia mase.” To mero ese iena tuari kaia veria totona ia ura lasi, ia be ia gari, badina ia be mero sibona.
21 Sebaha bona Salamuna idia gwau, “Oi sibona ese ai do oi alaia, oi be tau momokani, vadaeni tau ena kara do oi karaia.” Vadaeni Gideona ia toreisi, Sebaha bona Salamuna ia alaia mase. Bona edia kamelo edia aiona herahera gaudia ia abia.
22 Vadaeni Israela taudia ese Gideona idia hereva henia, idia gwau, “Ai ura oi ese aiemai lohia do oi lao, oi bona oiemu natuna bona tubuna taudia, badina be oi ese Midiana taudia dekena amo ai oi hamauria vadaeni.”
23 To Gideona ia haere, ia gwau, “Umui do lau gunalaia lasi, lauegu natuna ese danu umui do ia gunalaia lasi. Lohiabada sibona ese umui do ia gunalaia.”
24 To Gideona be ia hereva lou, ia gwau, “Mani emui kara lauegu noinoi tamona be inai: Umui ta ta ese golo taiana herahera, tuari dekenai umui abia gaudia lau dekenai do umui henia.” Midiana taudia be Isamaela bese, bona idia ese golo herahera edia taiana dekenai idia atoa.
25 Idia be idia haere, idia gwau, “Mai moale danu oi dekenai do ai henia.” Vadaeni dabua ta tano dekenai idia atoa, bona idia ibounai ese tuari dekenai idia abia golo herahera gaudia, be unai dabua lalonai idia negea diho.
26 Vadaeni golo rini herahera gaudia, Gideona ese ia abia gaudia edia metau be 20 kilogaram. Inai metau be rini sibona. Ma gau haida be herahera idauidau, bona ageva bona dabua kakakaka, Midiana king idia atoa gaudia, bona kamelo edia aiona herahera gaudia.
27 Gideona ese unai golo ia abia, ia gaukaralaia, bona dabua helagana ta golo dekenai ia karaia. Iena hanua, Opera dekenai inai golo dabua ia atoa. Vadaeni Israela taudia ibounai ese Dirava idia rakatania, Opera dekenai unai golo dabua idia tomadiho henia. Inai golo dabua, Gideona ese ia karaia gauna, ese Gideona mai ena famili ia hakererea.
28 Israela taudia ese Midiana taudia idia halusia momokani, bona Midiana be idia manoka, idia tuari lou diba lasi. Vadaeni unai tano be ia maino noho, lagani 40 lalonai, Gideona ena mauri dinadia ibounai.
Gideona ia mase
29 Gideona be iena hanua korikori rumana dekenai ia giroa lao.
30 Gideona ena natuna memero be 70, badina be iena adavana be momo.
31 Iena hahine ta be Sekema dekenai ia noho. Unai hahine be mero ta ia abia, bona Gideona ese iena ladana ia atoa Abimeleka.
32 Gideona Ioasa be ia buruka herea, vadaeni ia mase. Iena tamana Ioasa ena guria gabuna dekenai idia guria, Opera dekenai. Abiesere taudia edia hanua be unai.
33 Gideona ia mase murinai, Israela taudia ese Dirava dekenai idia tomadiho henia lou lasi. Idia ese Bala dirava dekenai idia tomadiho henia, bona idia ese Bala Beriti edia dirava idia halaoa.
34 Israela taudia ese Lohiabada edia Dirava idia laloa lou lasi, ia ese idia ia durua, bona idia dekenai idia hagegea tuari taudia dekena amo ia ese ia hamauria kara be idia laloaboio.
35 Bona idia ese Gideona ena famili taudia idia hanamoa lasi, Gideona ese ia karaia kara namodia ibounai ena davana idia karaia lasi.