9
Abimeleka
1 Abimeleka, Gideona ena natuna, be Sekema hanua dekenai ia lao, iena sinana ena varavara dekenai. Ia ese idia bona iena sinana iduhu taudia ibounai dekenai ia hereva, ia gwau,
2 “Sekema taudia ibounai edia lalona do umui veria, umui nanadaia, umui gwau, ‘Edena be namo? Gideona ena natuna 70 ese umui do idia gunalaia, o tamona ese?’ Umui laloa danu, Abimeleka be umui emui varavara korikori tauna.”
3 Vadaeni Abimeleka ena sinana ena varavara taudia ese unai hereva ibounai be Sekema taudia ia hamaoroa. Unai hereva idia kamonai, bona Sekema taudia ibounai idia laloa tamona Abimeleka ena murinai do idia raka, badina be idia gwau, “Ia be aiemai varavara tauna.”
4 Idia ese siliva moni 70 Bala Beriti ena dubu dekena amo idia abia, Abimeleka dekenai idia henia. Unai moni dekena amo Abimeleka ese tau dikadia haida, lalona dika taudia dekenai davana ia henia, ia do idia durua totona.
5 Vadaeni iena tamana ena ruma, Opera dekenai ia lao, unuseni iena tadikakana taudia 70, Gideona ena natuna, ia alaia mase, nadi tamona ena latanai. To Gideona ena natuna mero maragina, ladana Iotama, be gabu ta dekenai ia hunia dainai idia alaia lasi.
6 Vadaeni Sekema taudia ibounai bona Bete Milo taudia ibounai be idia lao, Sekema ena ouki auna helagana dekenai, bona unuseni Abimeleka idia abia dae, bona edia king idia halaoa.
7 Inai kara ena sivarai be Iotama ia kamonai neganai, ia be Gerisima Ororo ena ataiai dekenai ia gini, ia haroro mai boiboi bada, ia gwau, “Umui Sekema taudia e, lauegu hereva do umui kamonai, bona Dirava ese umui do ia kamonai henia.
8 Nega ta, au momo ese edia king idia ura abia hidi. Vadaeni idia ese olive auna dekenai idia hereva, idia gwau, ‘Aiemai king do oi lao.’
9 “To olive auna be ia haere, ia gwau, ‘Bema lau king neganai lauegu huahua ena digara do ia doko, do lau henia diba lasi. Inai digara be taunimanima bona Dirava hanamoa totona.’
10 Gabeai unai au momo ese huahua auna ta, ladana fig idia hereva henia, idia gwau, ‘Aiemai king do oi lao.’
11 Ia haere, ia gwau, ‘Bema lau king neganai, lauegu huahua namodia do idia doko, do idia vara lasi. Inai be ia namo, a?’
12 “Vadaeni unai au momo ese vain auna dekenai idia hereva, idia gwau, ‘Oi mai, aiemai king do oi lao.’
13 To vain be ia haere, ia gwau, ‘Bema lau king neganai, lauegu uaina, Dirava bona taunimanima ia hamoalea gauna do lau hadokoa, do ia vara lasi. Inai be ia namo, a?’
14 Unai dainai unai au ibounai ese au ginigini dekenai idia hereva, idia gwau, ‘Oi mai, aiemai king do oi lao.’
15 Vadaeni au ginigini ese ia haere, ia gwau, ‘Bema umui ura momokani lau be emui king, vadaeni lauegu keruma lalonai do umui laga-ani. To bema lasi, lahi be au ginigini dekena amo do ia mai, Lebanona sida audia do ia gabua ore.’ ”
16 Iotama ma ia hereva, ia gwau, “Umui ese Abimeleka emui king umui halaoa neganai, mai laloa maoromaoro bona momokani umui karaia, a? Gideona mai ena famili ese kara namodia umui totona idia karaia, be umui ese kara namodia idia dekenai umui haloua, a? Umui mataurai henidia, a?
17 Badina be lauegu tamana ese umui totona ia tuari, bona iena mauri ia laloa lasi. Ia ese Midiana taudia edia siahu dekena amo umui ia hamauria.
18 To umui ese hari dina lauegu tamana ena famili umui tuari henia vadaeni, iena natuna 70 nadi tamona ena latanai umui alaia mase. Bona Abimeleka, lauegu tamana ena hesiai hahine ena natuna, be Sekema taudia edia king umui halaoa vadaeni, ia be emui varavara dainai.
19 Umui ese Gideona mai ena famili dekenai kara dika bada herea umui karaia vadaeni. Vadaeni hari dina do umui laloa, Abimeleka dekenai umui moale diba, a? Bona umui dekenai Abimeleka do ia moale diba, a?
20 “To bema lasi, lahi be Abimeleka dekenai do ia toreisi, Sekema taudia bona Bete Milo taudia do ia gabua ore, bona lahi be Sekema taudia bona Bete Milo taudia dekena amo do ia toreisi, Abimeleka taudia do ia gabua ore!”
21 Vadaeni Iotama ia heau, Bere dekenai ia lao, unuseni ia noho, badina be iena kakana dekenai ia gari dainai.
22 Abimeleka ese Israela taudia ia gunalaia lagani toi.
23 Dirava ese lauma dikana ta ia siaia, bona ia ese Abimeleka bona Sekema taudia edia huanai badu ia havaraia. Vadaeni idia ese Abimeleka idia dagedage henia.
24 Dirava ese inai bamona ia karaia, Abimeleka bona Sekema taudia edia kerere davana do ia henia totona. Badina be Abimeleka ese Gideona ena natuna tau 70 ia alaia neganai, Sekema taudia ese Abimeleka idia durua.
25 Sekema taudia ese ororo dekenai idia hunia noho, idia naria, Abimeleka ia mai neganai do idia alaia totona. Bona unai dala dekenai idia loaloa taudia ibounai edia kohu idia dadia. To tau haida ese Abimeleka idia hamaoroa.
26 Unai neganai Gala Ebedi, iena varavara taudia danu, be Sekema dekenai idia mai. Vadaeni Sekema taudia ese Gala idia abidadama henia.
27 Vadaeni idia lao, edia vain audia edia anina idia gogoa, bona vain huahua idia moia, uaina idia karaia. Unai neganai edia dirava ena dubu lalonai aria idia karaia, idia aniani bona uaina idia inua. Vadaeni idia ese Abimeleka idia hereva dika henia, bona idia kirikirilaia.
28 Gala Ebedi ia gwau, “Abimeleka be daika? Bona ita Sekema taudia be daika? Badina dahaka Abimeleka ena hesiai gaukara ita karaia noho? Guna inai Gideona ena natuna Abimeleka bona iena opesa tauna Sebulu be Sekema ena tamana Hamoro ena hesiai gaukara idia karaia, ani? Unai dainai, badina dahaka ita be Abimeleka ena henunai ita noho?
29 “Namona be lau ese inai Sekema hanua taudia lau gunalaia! Lau ese Abimeleka do lau kokia momokani. Lau ese ia do lau hamaoroa, do lau gwau, ‘Abimeleka e, oiemu tuari taudia momo do oi haboua, bona do umui raka mai, do ita tuari.’ ”
30 Sebulu, Sekema hanua ena lohia, ese Gala Ebedi ena hereva ia kamonai, bona ia badu.
31 Vadaeni ia ese hunia dekenai hesiai taudia Aruma dekenai ia siaia, Abimeleka idia hamaoroa, idia gwau, “Gala Ebedi, mai ena varavara taudia be Sekema dekenai idia mai, bona idia ese hanua taudia edia lalona idia veria noho, oi do idia hadikaia totona.
32 Unai dainai hanuaboi neganai do oi toreisi, mai oiemu tuari taudia danu, hanua ena murimurinai hunia dekenai do umui naria.
33 Vadaeni daba maragi neganai do umui toreisi haraga, hanua dekenai do umui raka mai haraga. Gala Ebedi bona iena tuari taudia ese umui tuari henia totona idia lao neganai, do umui tuari henidia mai emui goada ibounai danu!”
34 Unai dainai Abimeleka bona iena tuari taudia ibounai ese idia toreisi, bona orea 4 dekenai Sekema hanua kahirakahira hunia dekenai idia naria.
35 Vadaeni Gala Ebedi be hanua magu ena iduara dekenai ia raka lao, unuseni ia gini. Unai neganai Abimeleka bona iena tuari taudia edia hunia gabudia dekena amo idia toreisi.
36 Gala ese idia ia itaia neganai, ia ese Sebulu ia hamaoroa, ia gwau, “Oi itaia, taunimanima haida be ororo ena ataiai dekena amo idia raka diho mai noho.”
Sebulu ia haere, ia gwau, “Ororo ena laulau oi itaia noho, edia toana be taunimanima edia toana bamona.”
37 To Gala ma ia hereva, ia gwau, “Oi itaia, taunimanima haida be ihuana dekenai idia mai noho, bona orea ta danu be ouki auna, helaga gauna, ena dala dekenai idia raka mai noho.”
38 Vadaeni Sebulu ese Gala ia gwau henia, ia gwau “Harihari oiemu hevaseha bona hekokoroku hereva Abimeleka dekenai be edeseni? Oi gwau, ‘Abimeleka be daika, bona, badina dahaka iena hesiai gaukara ita karaia noho?’ Oi negea taudia be idia mai noho, ani? Harihari do umui raka lao, do umui tuari henia!”
39 Gala ese Sekema taudia ia gunalaia, bona idia ese Abimeleka ena taudia idia tuari henia.
40 Gala be ia heau, bona Abimeleka ese ia lulua lao. Taunimanima momo herea idia bero, idia moru, edia tauanidia be dala dekenai idia noho ela bona hanua magu ena iduara.
41 Abimeleka be Aruma dekenai ma ia noho. Bona Sebulu ese Gala bona iena varavara taudia ia lulua lao, vadaeni Sekema dekenai idia noho lou lasi.
42 Kerukeru Sekema hanua taudia be ma hanua dekena amo idia raka, hanua ena murimurinai tano dekenai idia raka lao. Haida ese Abimeleka idia hamaoroa.
43 Vadaeni ia ese iena tuari taudia ia hakaua lao, idia be orea toi dekenai ia haria, bona au bona kurukuru lalonai idia hunia, idia naria noho. Edia matana idia negea, hanua taudia idia raka mai idia itaia, vadaeni idia toreisi, idia aladia mase.
44 Abimeleka bona iena tuari taudia be hanua ena magu iduara dekenai idia heau, magu iduara idia gimaia. Bona Abimeleka ena tuari orea rua ese hanua ena murimurinai idia noho, Sekema taudia idia tuari henia, bona ibounai idia alaia mase.
45 Unai dina ena daba ela bona hanuaboi Abimeleka ese hanua taudia ia tuari henia. Vadaeni ia ese hanua ia abia, bona hanua taudia ibounai ia alaia mase. Hanua ia hadikaia ore, bona hanua ena tano be damena dekena amo ia koua.
46 Sekema ena gabu aukana, kohoro, dekenai idia noho taudia ibounai ese unai sivarai idia kamonai, vadaeni idia be edia dirava ta, ena ladana El Beriti, ena dubu ena ruma aukana dekenai idia hunia.
47 Tau haida ese Abimeleka idia hamaoroa, Sekema taudia be unai gabu dekenai idia haboua.
48 Vadaeni Abimeleka be Salamona Ororo dekenai ia daekau lao, ia bona iena tuari taudia ibounai. Abimeleka ese ira ta ia abia, au rigi haida ia utua, bona lahi au totona ikumi ia karaia, iena pagana dekenai ia atodia. Iena tuari taudia danu ia ese ia hamaoroa, ia gwau, “Lauegu kara umui itaia vadaeni. Inai kara hegeregerena umui danu do umui karaia. Karaharaga!”
49 Vadaeni idia ibounai ta ta ena au, ena au, idia utua, ena ikumi, ena ikumi idia huaia, bona Abimeleka ena murinai idia raka. Edia lahi au ikumi be ruma aukana ena haba ena badinai idia atodia. Vadaeni idia ese ruma aukana idia gabua, bona unai dainai Sekema ena kohoro, gabu aukana dekenai idia noho taudia ibounai idia gabua mase. Idia be tau bona hahine, ibounai be 1000 bamona.
Abimeleka Ia mase
50 Vadaeni Abimeleka be Tebese dekenai ia lao, bona inai hanua ia koua hagegea, vadaeni ia abia.
51 Hanua ena lalonai be gabu aukana ta, o kohoro, vadaeni hanua taudia ibounai, tau bona hahine, be idia heau vareai, idia koua auka, bona kohoro ena guhi dekenai idia daekau lao.
52 Abimeleka ese kohoro ia tuari henia, bona kohoro ena iduara dekenai ia raka kahirakahira, lahi dekenai do ia gabua totona.
53 Vadaeni hahine ta ese nadi badana ta, uiti moia totona ataiai nadi be Abimeleka ena kwarana dekenai ia negea diho. Abimeleka ena kwarana koukouna ia makohia momokani.
54 Vadaeni Abimeleka ese uhau ta, iena kesi huaia tauna, ia boiria haraga, ia hamaoroa, ia gwau, “Oiemu tuari kaia dekenai lau do oi alaia, taunimanima ese lau do idia herevalaia garina, do idia gwau, ‘Hahine ta ese ia alaia mase,’ garina.” Vadaeni iena hesiai tauna ese ia gwadaia, vadaeni ia mase.
55 Israela taudia ese idia itaia, Abimeleka ia mase, vadaeni ibounai be edia ruma ta ta dekenai idia giroa lou.
56 Unai dala dekenai Dirava ese Abimeleka ena kara dika ena davana ia henia, ia ese iena tadikakana 70 ia alaia mase dainai. Badina unai ala-ala kara dekena amo, Abimeleka ese iena tamana Gideona ia hadikaia vadaeni.
57 Dirava ese danu Sekema taudia edia kara dika ena davana ia henia. Gideona ena natuna tau Iotama ese guna hadikaia hereva metauna idia edia latanai ia gwauraia gauna be idia dekenai ia vara momokani.