21
Israela taudia ese Kanana taudia idia halusia
1 Arada ena king, Kanana tauna, be Kanana ena diho kahana dekenai ia noho. Ia kamonai Israela taudia be Atarima dalana dekenai idia mai noho. Vadaeni ia tuari henidia, bona ia ese haida ia abia mauri.
2 Unai neganai Israela taudia ese gwauhamata metauna Lohiabada dekenai idia gwauraia, idia gwau, “Bema oi ese ai oi durua, vadaeni inai bese do ai halusia neganai, ai ese idia bona edia hanua ibounai oi dekenai do ai henia, boubou bamona. Do ai hadikadia ore momokani.”
3 Vadaeni Lohiabada ese Israela taudia edia noinoi ia abia dae, ia durudia, bona idia ese Kanana taudia idia halusia. Unai dainai Israela taudia ese Kanana bese taudia ibounai idia alaia ore, bona edia hanua ibounai idia hadikaia ore. Bona unai gabu ena ladana idia atoa Horoma.
Gaigai auri dekenai idia karaia
4 Vadaeni Israela taudia ese Horo Ororo dekena amo ma idia laolao, Davara Kakakaka dalana dekenai. Inai dala dekenai idia lao, Edoma tanona ena murimuri kahana dekenai do idia raka hanaia totona. To unai dala dekenai Israela taudia idia hesiku lou.
5 Idia ese Lohiabada bona Mose dekenai idia maumau, idia gwau, “Dahaka dainai Aigupito dekena amo ai oi hakaua? Inai taunimanima noho lasi tano dekenai do ai mase, badina aniani be lasi, ranu danu be lasi. To inai aniani gauna dikana dekenai be ai hesiku momokani.”
6 Vadaeni Lohiabada ese koria gaigai momo ia siaia, idia edia huanai. Gaigai ese taunimanima momo idia koria, vadaeni Israela taudia momo idia mase.
7 Israela taudia be Mose dekenai idia lao, idia gwau, “Ai be ai kara dika vadaeni, Lohiabada dekenai ai maumau, oi dekenai danu ai maumau vadaeni. Lohiabada dekenai do oi noinoi, ia ese ai dekena amo gaigai do ia abia siri.” Vadaeni Mose ese Israela taudia dainai ia guriguri.
8 Lohiabada ese Mose ia hamaoroa, ia gwau, “Gaigai ena laulauna ta do oi karaia, bona au latana ena dorina dekenai do oi atoa, vadaeni gaigai ese idia koria taudia ese unai ataiai gaigai idia itaia noho neganai, do idia mauri.”
9 Unai dainai Mose ese gaigai ena laulauna ta auri labora dekena amo ia karaia, bona au tubua ena dorinai dekenai ia kokoa. Vadaeni gaigai ese ia koria taudia bema unai gaigai ena laulau ataiai idia itaia noho neganai, idia mauri momokani.
Israela taudia ma idia laolao
10 Israela taudia be ma idia raka lao, bona Oboto dekenai idia kamepa.
11 Oboto dekena amo idia toreisi, vadaeni hanua gunana ta, ia dika vadaeni, ladana Abarimi dekenai idia kamepa, taunimanima noho lasi tano dekenai. Unai taunimanima lasi tano be Moaba kahirakahira, Moaba ena dina ia daekau kahanai.
12 Ma Israela taudia idia toreisi, Seredi ena koura dekenai idia kamepa.
13 Seredi dekena amo idia toreisi, idia lao ela bona Aranona Sinavai unai kahana dekenai idia kamepa. Unai be taunimanima idia noho lasi tano, Amoro taudia edia tano hetoana dekenai. Unai Aranona Sinavai be Moaba bona Amoro taudia edia tano hetoana.
14 Unai dainai Lohiabada ena tuari buka lalonai inai bamona hereva idia torea vadaeni:
“Wahebe hanua, Supa kahanai,
bona Aranona Sinavai ena koura dekenai.
15 Koura ena hekei tanona,
ia lao bona Ara hanua ena noho gabuna,
bona Moaba ena tano hetoana.”
Israela taudia edia ane
16 Aranona Sinavai dekena amo idia toreisi, bona gabu ta ladana Bere dekenai idia lao. Unai be ranu guri gabuna. Inai gabu dekenai Lohiabada ese Mose ia hamaoroa, ia gwau, “Taunimanima do oi haboua mai, bona lau ese ranu idia dekenai do lau henia.”
17 Vadaeni Israela taudia ese inai ane idia abia:
“Ranu e, do oi lohilohi daekau!
Ane do ita abia!
18 Bese ena gunalaia taudia ese ranu guri idia geia,
bese ena lohia taudia ese ranu guri idia hadobua.”
Unai neganai Israela taudia ese taunimanima idia noho lasi tano idia rakatania, idia raka lao ela bona gabu ta ladana Matana.
19 Matana dekena amo idia raka ela bona Nahaliele, bona Nahaliele dekena amo ela bona Bamoto.
20 Bamoto dekena amo idia raka lao, ela bona koura ta Moaba taudia edia tano dekenai. Inai koura be Pisiga Ororo ena henuna kahanai, bona unai gabu dekena amo Pisiga ena tano kaukau idia itaia diba.
Israela taudia ese king Sihona bona king Oga idia halusia
21 Unai neganai Israela taudia ese hesiai taudia idia siaia, Sihona, Amoro ena king dekenai idia hereva, idia gwau,
22 “Mani emu kara, oiemu tano do ai raka hanaia. Ai be do ai raka siri lasi, uma dekenai o vain audia dekenai do ai raka vareai lasi, ranu guri edia ranu danu do ai inua lasi. To emui basileia dala dekenai sibona do ai raka, ela bona oiemu tano do ai rakatania.”
23 To Sihona ese Israela taudia ia koua, ia gwau iena tano dekenai do idia raka hanaia lasi. Vadaeni Sihona ese iena tuari orea ibounai ia haboua, bona tano kaukau gabuna ladana Iahasa dekenai ia ese Israela taudia ia tuari henia.
24 To Israela taudia ese tuari kaia dekena amo Sihona idia alaia mase, bona iena tano ibounai Aranona Sinavai dekena amo ela bona Iaboka Sinavai idia abia. To Amono taudia edia tano hetoana idia hanaia lasi, badina be Amono taudia ese edia tano hetoana idia gimaia auka masemase.
25 Vadaeni Israela taudia ese Amoro taudia edia hanua ibounai idia abia, bona idia be Hesebona bona Amoro hanua maragidia ibounai dekenai idia noho.
26 Badina Hesebona be Sihona, Amoro ena king, ena hanua.
Gunaguna Sihona ese Moaba ena king gunana ia tuari henia, bona Moaba ena tano ibounai ia abia, ela bona Aranona Sinavai.
27 Unai dainai Israela ane karaia taudia ese inai ane idia abia:
“Hesebona dekenai umui mai.
Ia be king Sihona ena hanua!
Namona be ita ese inai hanua do ita haginia lou.
28 Badina be gunaguna Hesebona dekena amo,
King Sihona ena tuari taudia idia raka lao,
lahi ia hururu bada bamona.
Inai lahi ese Moaba ena hanua badana,
Ara, ia hadikaia ore,
bona Aranona Ororo ena tano ia ania ore.
29 Moaba taudia e, emui noho be dika!
Kemoso dirava dekenai umui tomadiho henia taudia e,
emui noho mauri dalana be ia ore vadaeni.
Emui dirava ese umui ia durua lasi,
unai dainai emui tatau ibounai idia heau boio,
bona emui hahine be Amoro king Sihona,
ese ia abia mauri.
30 To hari ita ese Amoro taudia ita halusia vadaeni.
Hesebona hanua ela bona Dibona hanua,
ita ese ita hamakohia vadaeni.
Tano be ita ese ita hadikaia ore ela bona Nopa,
bona ela bona Medeba danu.”
31 Unai dainai Israela taudia ese Amoro taudia edia tano dekenai idia noho.
32 Mose ese Israela taudia haida ia siaia, hunia dekenai Iasera hanua ena manoka gabudia idia itaia totona. Unai murinai Israela taudia ese tuari dekena amo Iasera, mai ena hanua maragidia idia abia, bona unuseni idia noho Amoro taudia idia lulua ore.
33 Unai neganai Israela taudia be ma idia raka lao, Basana ia lao dalana dekenai idia raka. Vadaeni Oga, Basana ena king, mai ena tuari taudia danu idia raka lao, bona idia ese Israela taudia idia tuari henia, Ederei dekenai.
34 To Lohiabada ese Mose ia hamaoroa, ia gwau, “Oga dekenai do oi gari lasi. Lau ese kwalimu oi dekenai do lau henia, ia dekena amo. Oi ese iena tuari taudia do oi halusia, bona edia tano do oi abia. Sihona, Amoro ena King, Hesebona dekenai oi karaia hegeregerena, be inai Oga dekenai danu do oi karaia.”
35 Vadaeni Israela taudia ese Oga, iena natuna tau, bona iena taudia ibounai idia alaia mase, ta ia mauri noho lasi. Bona Israela taudia ese king Oga ena tano idia abia.