24
1 Balama be hari ia diba Lohiabada ia ura Israela taudia do ia hanamodia momokani. Unai dainai ia be meamea karadia edia hunia gaudia ia karaia lasi, nega gunadia ia karaia bamona. To ia be taunimanima noho lasi tano dekenai iena vairana ia giroa.
Balama ese Israela besena ma ia hanamoa
2 Unai tano Balama ese ia itaia noho neganai, ia be Israela iduhuna ta ta, edia kamepa, edia kamepa, ia itaia. Unai neganai Dirava ena Lauma, be Balama dekenai ia siahu bada,
3 vadaeni inai peroveta hereva ia gwauraia, ia gwau,
“Balama Beoro ena hereva be inai:
Iena matana idia kehoa noho momokani tauna,
Balama, ena hereva be inai:
4 Lau be Dirava ena hereva lau kamonai noho tauna.
Siahu Ibounai Diravana ena hairaina lau itaia noho.
Lau tomadiho noho,
to lauegu matana idia kehoa noho.
Lauegu hereva be inai:
5 Iakobo e, oiemu palai rumadia be namo herea.
Israela e, oiemu kamepa gabudia be namo bada.
6 Umui emui namo lau itaia be,
sinavai edia koura gabudia dekenai au momo idia noho bamona,
bona umui be sinavai badibadinai uma momo idia noho bamona.
Umui be Lohiabada ese ia hadoa aloe muramura audia bamona,
bona umui be sida audia ranu gabudia dekenai bamona.
7 Israela taudia ese medu namona momokani do idia abia,
bona edia uma do idia hadoa gabudia,
be mai edia ranu momo.
Edia king ese Agaga do ia hereaia momokani.
bona iena basileia do ia bada herea momokani.
8 Dirava ese Israela taudia Aigupito dekena amo ia hakaudia.
Idia edia goada be uda boromakau ena goada bamona.
Israela taudia ese,
idia dekenai idia dagedage taudia do idia halusia.
Edia turiana do idia hamakohia momokani,
bona idia edia diba bona peva dekena amo,
Israela taudia ese,
idia hadikaia gwauraia taudia do idia pidia mase.
9 Israela taudia be laiona bamona idia hekure hegaegae noho.
Idia laga-ani noho, laiona hahine bamona.
Daika ese idia do ia hanogaia?
Israela do idia hanamoa taudia,
ese namo do idia davaria.
To Israela do idia hadikaia taudia,
ese dika do idia davaria.”
Balama ena peroveta hereva
10 Balaki be Balama dekenai ia badu dikadika. Iena imana ruaosi ia hakapua, ia gwau henia, ia gwau, “Lau ese oi lau boiria, lau dekenai idia dagedage taudia do oi hadikaia totona. To oi ese nega toi oi hanamodia vadaeni.
11 Harihari oi giroa lou haraga, oiemu gabu do oi lao. Guna lau gwau davana namona oi dekenai do lau henia. To Lohiabada ese oiemu dala ia koua dainai, davana do oi abia lasi.”
12 Vadaeni Balama ese Balaki dekenai ia haere, ia gwau, “Oiemu hesiai taudia dekenai lau hamaoroa, ani, lau gwau,
13 ‘Bema Balaki ese iena ruma badana mai ena siliva bona golo ibounai lau dekenai ia henia gwauraia, to Lohiabada ena oda lau utua diba lasi. Lau sibona lauegu ura dekenai kara ta, namo o dika, lau karaia diba lasi. To Lohiabada ena hereva sibona lau gwauraia diba.’
14 Vadaeni, hari lauegu bese dekenai do lau giroa lou. To guna oi dekenai do lau sisiba henia, vaira neganai dahaka karadia Israela taudia ese oiemu bese dekenai do idia karaia.”
15 Vadaeni Balama be ma ia haroro, ia gwau,
“Balama Beoro ena hereva be inai:
Iena matana idia kehoa momokani tauna,
Balama, ena hereva be inai:
16 Lau be Dirava ena hereva lau kamonai noho tauna.
Ataiai Momokani Diravana dekena amo diba lau abia.
Siahu Ibounai Diravana ena hairaina lau itaia noho.
Lau tomadiho noho,
to lauegu matana be idia kehoa noho.
17 Lau be vaira dinadia lau itaia noho.
Israela besena lau itaia.
King ta, hisiu badana bamona,
be Iakobo dekena amo do ia toreisi.
Dagi bada auna ta, Israela dekena amo do ia toreisi.
Ia ese Moaba gunalaia taudia do ia botaia,
bona Seti taudia ibounai do ia botaia diho.
18 Ia ese Edoma, ia idia dagedage henia besena,
do ia halusia,
bona Edoma taudia edia tano do ia abia.
Israela be do ia kwalimu, do ia goada lao.
19 Lohia tauna ta Iakobo dekena amo do ia mai,
bona Edoma ena hanua badana taudia ese,
do idia heau mauri diba lasi.”
20 Unai neganai Balama ese Amaleka taudia iena mata hanai dekenai ia itaia, bona peroveta hereva ma ia gwauraia, inai bamona:
“Amaleka sibona be bese bada herea,
bese ibounai edia huanai.
To dokona neganai do ia dika ore momokani.”
21 Unai neganai Balama ese Kene taudia iena mata hanai dekenai ia itaia, bona peroveta hereva inai bamona ma ia gwauraia:
“Umui emui ruma be auka,
bona emui noho gabuna be hagahaga nadina lalonai.
22 To umui Kene taudia be do idia hadikaia ore.
Asuria taudia ese umui do idia abia mauri.”
23 Ma Balama ia peroveta lou, ia gwau:
“Be, Dirava ese inai bamona ia karaia,
vadaeni daika do ia mauri diba?
24 Lagatoi be Kitima dekena amo do idia mai.
Idia ese Asuria bona Ebere taudia do idia halusia,
to unai Kitima taudia danu be do idia mase ore.”
25 Vadaeni Balama ia toreisi, iena gabu dekenai ia giroa lou, Balaki danu sibona ena dala dekenai ia lao.