10
1 Mahke flies make da perfume smell haunas.
Same ting you do one litto bit stupid kine ting,
Den nobody goin stay shua you know wat fo do erytime,
An no mo nobody goin respeck you!
2 Da guy dat know wat fo do erytime, he goin pick da right ting fo do,
But da stupid guy goin pick da wrong ting fo do.
3 Even wen da stupid guy walk on top da road, he no mo one brain.
He show erybody how stupid him.
4 If one leada guy come huhu wit you,
No good you bag from yoa kuleana. No quit!
One cool head can cool down da odda guy,
Even wen dey jam up big time.
5 Get one bad kine ting dat I see unda da sun.
Da guys dat stay in charge sometimes do wrong kine tings,
But dey donno was wrong.
6 Dey give da stupid kine guys plenny importan jobs.
Same time dey put da importan guys in da junk kine jobs.
7 I wen see da slave guys ride horse,
An da prince guys walk aroun jalike dey slaves.
8 You dig one deep hole, maybe you fall inside um.
You dig thru one wall, maybe one snake bite you.
9 You cut out stones, maybe da stones hurt you.
You split wood, maybe da wood hurt you too.
10 If one ax not sharp,
An nobody make um sharp,
Den you gotta wack mo hard wit um.
But if you know how fo use um, can use um.
11 If one snake bite you
Befo da guy dat train snakes teach um fo no bite,
Den da snake guy no goin earn notting.
12 Da guy dat know wat fo do erytime talk good kine,
But da stupid guy mout make him come wipe out.
13 Wen da stupid guy start fo talk, he talk stupid kine.
Bumbye he goin tell bad kine stuff an pupule kine stuff.
14 An da stupid guy talk plenny.
No mo nobody know wat goin happen.
Nobody can tell wat goin happen afta dat.
15 All da stuff da stupid guy do,
Make him come tired.
He donno even how fo go town.
16 Bummahs fo you guys inside one country
Dat get one guy dass too young fo be yoa king!
An yoa prince guys pig out all day from morning time.
17 But you guys can stay good inside
If you live inside one country dat get one king dat wen born fo come king,
You guys stay good inside cuz yoa prince guys eat at da right time.
Dey eat cuz dey like come strong, not piloot.
18 If one guy lazy, da raftas come weak.
Cuz he no do notting, da rain drip inside da house.
19 Peopo cook food fo dem laugh,
An wine make peopo stay good inside, da way dey live.
An money take kea eryting!
20 No even tink fo put kahuna on top da king, even inside yoa head.
No put kahuna on top da rich guys, even inside yoa bedroom.
Cuz maybe one bird goin carry yoa word
An tell dem wat you wen tell.