9
Same Ting Happen To Erybody
1 So I tink bout all dis. From dat, fo shua God da One stay in charge a da peopo dat do da right kine stuff an know wat fo do erytime. But nobody know if peopo goin love um o hate um.
2 Same ting goin happen to erybody—da peopo dat do wass right, an da peopo dat do wass wrong, da good guys an da bad guys, da ones dat can go in front Da One In Charge an da ones dat no can, da peopo dat make sacrifice, an da peopo dat no make sacrifice.
Wateva happen fo da guy dat do good kine stuff,
Same ting happen fo da guy dat do bad kine stuff.
Wateva happen fo da guy dat make one strong promise,
Same ting fo da guy dat stay sked fo make um.
3 Dis wat stay bad fo erybody unda da sun: Same ting happen fo erybody! Inside, peopo get fill up wit bad kine stuff, an dey ack stupid all da time dey alive. An afta dat, dey all mahke.
4 But anybody dat still yet stay alive still can trus God an wait. Even one dog dass alive stay mo betta den one mahke lion.
5 Da peopo dat stay alive know dat dey goin mahke,
But da mahke peopo donno notting.
Dey no goin get notting back,
An erybody goin foget dem.
6 No matta dey love, o hate,
O come jealous, all dat stuff pau wen dey mahke.
Dey no goin conneck wit notting dat stay happen unda da sun.
7 So eat yoa food an stay good inside. Drink yoa wine wit one good heart. Cuz God awready stay good inside bout wat you do.
8 Erytime, wear nice clotheses, an no hold back fo put olive oil on top yoa head.
9 Live good wit yoa wife dat you get love an aloha fo, all da time God give you unda da sun, no matta hard fo make sense. An bus ass unda da sun cuz az yoa kuleana unda da sun.
10 Wateva work you get, geev um wit all yoa powa! Cuz inside da Mahke Peopo Place wea you going, no can work, no can make plan, no can know stuff o know wat fo do erytime.
11 I wen see anodda ting unda da sun too:
Da mos fas guys no goin win da race erytime,
An da mos strong guys no goin win da fight erytime.
Da guys dat know wat fo do erytime, dey no mo food erytime,
Da smart guys not rich erytime.
Nobody show respeck erytime fo da guys dat know plenny.
But dey all gotta chance um wen da right time come.
12 Nobody know wen dey goin mahke.
Az jalike wen peopo trap fish in one net,
O snag birds inside one trap.
Hard times catch peopo,
Wen dey figga notting bad goin happen!
Mo Betta Know Wat Fo Do Erytime
Den Stay Stupid
13 An I see dis too unda da sun. I wen spock how one guy ack dat know wat fo do erytime. Da stuff I wen see was good:
14 Had one small town an ony litto bit peopo live inside um. An one strong king attack um, an put army guys all aroun um, an build big ramps fo go ova da top a da wall.
15 Inside dat town, had one guy dat no mo notting, but he know wat fo do erytime. Az how he get da town outa trouble cuz he know wat fo do. But no mo nobody rememba dat guy dat no mo notting.
16 Az why I tell, “Mo betta know wat fo do, den get one big army.” But da peopo dea no show respeck fo da guy dat no mo notting, no matta he know wat fo do erytime. No mo nobody lissen now wat da guy tell.
17 Mo betta lissen wat da guys tell dat know wat fo do erytime,
No matta dey no talk loud,
Den lissen one leada fo da stupid guys, dat yell.
18 Mo betta know wat fo do erytime,
Den get plenny stuff fo use fo make war,
But one guy dat mess up one time
Can wipe out plenny good kine stuff.