8
So, wat you tink?! Get guys dat know fo real kine wat fo do erytime?!
You figga get guys dat know wat tings mean, o wat?!
One guy dat know wat fo do erytime, his face goin show dat,
Cuz no goin look jalike he huhu.
Lissen Da King!
Dis wat I tell: Lissen wateva da king tell you fo do cuz you wen make one strong promise in front God fo do wat da king tell you fo do. No rush fo leave wen you stay wit da king. No stay pono wit guys dat like do someting bad. Cuz da king goin do wateva he like do. Wat da king tell, az wat goin happen. No mo nobody can tell um, “How come you do dat?!”
 
Whoeva do wat da king tell um fo do, no mo notting bad goin happen to dem.
Da guy dat know wat fo do erytime, he goin know wat he gotta do an wat time fo do um.
Get da right time an da right way fo eryting you like do,
No matta you get plenny trouble too.
 
Nobody know wat goin happen bumbye.
Az why no mo nobody can tell anodda guy wass goin happen.
No mo nobody get da powa fo stop da wind.
No mo nobody get da powa fo figga wen dey goin mahke.
Jalike da leadas no goin let nobody go home wen get war.
Same ting, da bad kine stuff peopo do,
No goin get um outa trouble.
I see all dis stuff, an I tink bout eryting peopo stay do unda da sun. Wen peopo boss aroun odda guys, dat hurt da boss guys too. 10 I see peopo bury bad kine guys but dey show respeck fo dem wen da guys mahke. Az was bad guys dat wen come an go from da place dat stay spesho fo God. An da peopo talk good bout da bad guys inside da big town wea dey wen do bad stuff. All dat no make sense too.
11 Wen one guy do someting bad, an peopo no punish um right den an dea, da peopo goin figga dey can do all kine bad kine stuff too. 12 Get bad guys dat do uku pile a bad kine tings, an still yet live long time, you know. But I know dis too: Da peopo dat stay sked a God, dey goin live mo betta den da bad kine guys cuz dey get choke respeck fo God. 13 But cuz da bad kine guys no stay sked a God, no mo notting goin go good fo dem. Dey no goin live long time, jalike dey one shadow.
14 Get anodda ting dat happen on top da earth dat no make sense: Get guys dat do wass right, but dey get punish jalike dey bad kine guys. An get guys dat do bad kine stuff, an dey get wat da guys dat do wass right suppose to get. Fo shua dat no make sense! 15 But me, I figga, az good fo erybody feel good inside. Cuz no mo notting mo betta den one guy unda da sun eat, drink, an stay good inside. No matta he work all da days God give um fo stay alive unda da sun, he goin stay good inside.
16 Wen I wen try fo undastan wat dat mean, fo know wat fo do erytime, an wen I try fo see da kine work peopo do in dis world—I no can sleep day time o nite time. 17 Den I see eryting dat God do. No mo nobody can undastan eryting dat happen unda da sun. No matta peopo try hard fo undastan wat happen, no can. No matta one guy dat know wat fo do erytime tell dat he undastan um, he no can undastan um fo real kine.