7
Da Guy Dat Know Wat Fo Do Erytime
1 If you get one good rep, az mo betta den you get good perfume.
Da day you mahke stay mo betta den da day you born.
2 Mo betta go visit one house wea da peopo make one funeral,
Den visit one house wea dey make one party,
Cuz erybody goin mahke bumbye.
Good, da peopo dat stay alive tink serious kine bout dis.
3 Mo betta stay sad inside den laugh,
Cuz one sad face make you tink strait!
4 Da peopo dat know wat fo do erytime like go da place wea peopo stay sad inside.
But da stupid guys like go da place wea peopo ony like get good fun.
5 Mo betta lissen wen somebody dat know wat fo do erytime scold you.
Den lissen wen da stupid guys sing.
6 Wen da stupid guys laugh,
Az jalike wen thorn branches pop inside one fire.
Dat no make sense too.
7 If one guy dat know wat fo do erytime scam somebody, goin make him come stupid.
If he put presha on anodda guy fo give him money unda da table, dat goin jam up how he stay inside.
8 Wen someting pau, az mo betta den wen start.
Wen you hang in dea, az mo betta den get big head.
9 No come huhu fas, aah?!
Cuz dass how da stupid guys stay inside.
10 No go tell, “How come eryting wen stay mo betta befo time den now?”
If you tell dat, ony show you donno wat fo do erytime.
11 Good fo know wat fo do erytime,
Jalike az good get property from yoa faddah.
Dat two tings make eryting come out mo betta fo da peopo dat live unda da sun.
12 Wen you know wat fo do erytime,
Az jalike one roof ova yoa head.
An money, az jalike one roof ova yoa head too.
But fo know plenny stuff stay mo betta,
Cuz da guy dat know wat fo do erytime,
Dat goin make him stay alive long time.
13 Tink bout wat God wen do:
No can make strait
Wat God wen make kapakahi!
14 So wen eryting go good, stay good inside.
But wen eryting go bad, figga lidis:
God make good tings an bad tings happen.
Az why no mo nobody can figga wat goin happen bumbye.
15 All dis time I live, no make sense.
But I see two tings:
Get guys dat stay do da right kine ting erytime an dey mahke.
An get guys dat stay do bad kine stuff an dey live long time.
16 No go ack jalike you do da right ting mo den anybody.
An no go ack jalike you know wat fo do erytime mo den anybody.
You like wase yoa life, o wat?!
17 No go ack mo bad den anybody.
No go make stupid kine.
You like mahke befo yoa time fo mahke, o wat?!
18 Mo betta you hang in dea an do da right ting,
An no do wass wrong.
Da guy dat stay sked a God,
He no goin try go too far.
19 One guy dat know wat fo do erytime
Get mo powa den ten a da leada guys inside his town.
20 Get peopo all ova da world
Dat do wat da Rules From God tell um fo do,
But no mo even one a dem dat do wass right erytime,
An no do notting bad eva.
21 No come bum out bout eryting peopo tell
Cuz maybe you goin hear dat yoa worka guy talk bad bout you.
22 Cuz you know dat plenny time
You wen talk bad bout odda peopo too.
23 All dis stuff I wen learn, I wen use eryting da smart guys know fo tes um.
An I tink, “I goin know wat fo do erytime!”
But still yet dass someting I no can handle!
24 Wateva dat mean fo know wat fo do erytime,
Stay far away, an hard fo undastan.
No mo nobody can find out wat dat mean!
25 So den I change my mind an try fo study stuff.
I like learn mo, an find out wat fo do erytime, an figga out how come eryting happen.
An I like know how come az stupid fo do bad kine stuff,
An how come da stupid guys come pupule.
26 I find out dat wen get one wahine dat like make one trap,
Dass mo worse den fo mahke.
She tink how fo trap you,
If she put her arms aroun you,
Goin be jalike you stay tie up wit chains.
Da kine guy dat make God stay good inside
Goin bag from her.
But she goin catch da guy dat do bad kine stuff.
27 Da Teacha tell, “Look wat I wen find out:
I put togedda one ting wit anodda ting
Fo find out how come eryting happen,
28 Da time I wen stay look fo stuff fo learn,
I neva find notting.
I ony find one guy outa tousan guys dat stay do da right ting.
But I no find even one wahine outa all dem dat do da right ting.
29 Da ony ting I wen figga out, az dis:
God make peopo fo do wass right,
But dey look fo all kine scam.”