7
1 Erytime I wen like make da Israel peopo come good,
I neva do um!
Az cuz a da bad kine stuff da Efraim peopo do,
An da crooked kine stuff da Samaria peopo do,
All dat kine stuff show up.
Dey bulai.
Da steala guys bus inside da houses!
Gangs wit da bad kine guys rip off peopo on top da streets!
2 But dey no tink dat I rememba
All da bad kine stuff dey do.
Da bad kine stuff dey do still stay all aroun dem.
I erytime see da bad kine stuff dey do.
3 Da prince guys make da king tink az good fun
Cuz dey stay do bad kine stuff.
Da prince guys like fo dem bulai.
4 Dey all fool aroun erytime behind dea wife back.
Dey get da hots jalike dey one oven
Wea da guy dat bake bread no need make da fire mo hot,
From wen he poun down da dough till come mo big.
5 “Wen oua king make one holiday party,
An da prince guys come hot wit wine,
Den dey make deals
Wit guys dat ack jalike da prince guys junk.
6 Inside dey stay huhu
Az jalike one oven dat still stay hot.
Dey come nea da king fo trick um.
Inside dey all huhu, az why dey stay burn all nite.
Az why morning time da guys dat make fun a da king,
Dey stay jalike one real hot fire, ready fo kill him.
7 Dey all stay huhu jalike one oven dat still stay real hot.
Dey wipe out dea leada guys.
Dey kill all dea kings cuz a dat.
But not even one a da king guys call to me,
Da One In Charge, fo help um.
8 “Da Israel leadas mix wit odda leadas dat donno me.
Da Efraim guys jalike one roun bread dat stay bake ony one side,
But nobody turn um ova fo bake da odda side.
9 Da peopo from anodda place take away dea powa.
But da Efraim peopo tink notting wen happen to dem.
Az jalike da Efraim peopo hair come all gray,
But dey donno dey stay weak.
10 Da Israel peopo get big head,
Az why erybody know dey lose face.
But no matta, still yet dey no come back to me.
Dey no look fo me, dea God, Da One In Charge.
11 “Da Israel peopo wen come jalike one dove,
Stupid kine dat no can undastan notting.
Firs ting, dey call da Egypt peopo fo help dem.
Den dey turn aroun an call Assyria.
12 Wen dey stay fly, I goin throw my net on top dem.
I goin pull dem down jalike fo catch birds in da air.
Wen I hear dey stay come togedda,
I goin punish dem fo all da bad kine stuff dey wen do!
13 “Bummahs fo dose guys
Dat wen bag from me!
Dey goin get wipe out,
Cuz dey wen go fight agains me.
I stay ready fo buy dem back,
But dey bulai bout me.
14 Dey no call me wit one good heart.
Dey ony lay on top dea beds an cry loud.
Dey cut dea body
Fo odda gods give um wheat an barley an new wine,
But dey tell ‘Laytas’ to me!
15 Was me Da One In Charge wen teach dem an make um strong.
But dey plan now fo do bad kine stuff agains me.
16 Dey no turn to me,
Da God Dass Mo Importan Den All Da Odda Gods.
Dey jalike one bow dat you no can trus fo shoot strait,
Dey good fo notting.
Dea leadas goin mahke in da war.
Cuz dey tell how dey stay piss off wit me.
Cuz a dat, erybody inside Egypt
Goin make fun a dem.”