8
Da Israel Peopo Goin Get It!
1 Da One In Charge tell,
“Blow da sheep horn war trumpet!
Da ones dat stay agains dem,
Az jalike get one eagle bird stay come down fo attack my Temple.
Az cuz da peopo wen broke my deal wit dem.
Dey go agains my rules.
2 Da Israel peopo call to me fo help. Dey tell,
‘Eh, oua God! Us Israel guys know dat you da One!’
3 But da Israel peopo like throw out wat stay good.
Dass why da peopo dat stay agains dem goin go afta dem.
4 Dey pick dea kings, but az not da ones I pick.
Dey pick princes, but az da ones I no like.
Dey make dea idol kine gods from da silva an gold dey own,
But da ones dat make um ony goin get wipe out.
5 “You Samaria peopo, throw out yoa idol kine god
Dat look jalike one bebe cow!
I stay real huhu wit you guys.
How long you guys goin stay do stuff
Dat I punish, aah?!
6 Somebody from Israel wen make dat idol!
One guy dat work wit metal
Wen make da bebe cow kine idol from Samaria.
Dass not me, God!
Gotta broke um in small pieces awready!
7 “Az jalike da Israel guys plant da wind,
An harves da whirlwind!
Da wheat stalk no mo wheat berry,
An no can make flour.
An if some wheat plant get wheat berries,
Fo shua, goin get guys from anodda place goin eat um!
8 Az jalike odda peopo swallow da Israel peopo.
Now da Israel peopo come jalike one a da odda peopos
Dey jalike one ol pot dat not worth notting!
9 Cuz da Israel peopo ack jalike one wild donkey dat go look fo one wahine donkey.
Az how dey wen go Assyria side.
Jalike da Israel peopo sell dea body
To da guys dat pay fo fool aroun dem.
10 No matta dey sell dea body to odda peopos,
Now I goin bring dem back togedda
Fo punish dem.
Dey goin start fo come weak
Cuz one strong king an his leada guys
Goin put presha on dem.
11 “No matta da Efraim peopo build plenny altars
Fo make sacrifice wen peopo do bad kine stuff,
Now dey use da altars fo do bad kine stuff dea.
12 I wen write uku plenny rules fo dem,
But dey ack jalike dose rules not fo dem.
13 Dey make sacrifices fo me, an dey eat da meat.
But fo me, Da One In Charge, no mean notting.
So now I no goin foget dat dey get da blame,
An I goin punish dem cuz a all da bad kine stuff dey do.
Den dey goin go back Egypt side.
14 “Da Israel peopo foget me, da One dat wen make dem.
Dey build palaces.
Da Judah peopo make one strong wall aroun plenny towns.
But I goin burn down all dea strong towns
An dea strong wall.”