16
Da Moab Peopo Give Bebe Sheeps
You guys dat stay in charge a da Moab land,
Inside Sela town, nex to da boonies,
Give bebe sheeps to Jerusalem,
Fo one gif fo show you an dem stay pono.
Take um to Zion Hill, Jerusalem side.
Da Moab wahines dat run away
Fo go cross ova da Arnon Stream,
Dey goin hang aroun dea an donno wea fo go,
Jalike wen somebody throw da bebe birds outa dea nes.
Dey like tell da Judah leada guys:
“Make jalike one judge
An tell us guys wat fo do!
Noon time, wen da sun stay high,
Make yoa shadow dark jalike nite time,
Fo hide us guys dat stay run away,
An no let nobody know wea we stay!
Let us Moab peopo dat no mo place fo stay
Make house wit you guys.
Be da place fo us guys hide dea
So da guys dat like wipe us out no can find us!”
 
Cuz bumbye, no goin get da guys dat bus up you guys inside yoa land.
All dat no goin be no moa.
Dat time, goin get one new king
Dat goin stay tight wit his peopo.
Dat king, goin come from King David ohana,
An da peopo goin trus him.
He goin be da judge,
An he goin work hard fo judge erybody da right way.
He no goin wase time notting
Fo make shua eryting dat happen stay pono.
 
We wen hear dat da Moab peopo get real big head.
Dey plenny high nose.
Dey go any place dey like.
But all dea big kine talk,
Az not true, an no mean notting!
 
Bummahs! Az why da Moab peopo
Cry an yell togedda fo dea country.
Dey make noise an cry,
Cuz no mo da raisin candy from Kir-Hereset.
Ony get bus up peopo ova dea.
Da grape fields Heshbon side
An da grape plants Sibmah side
Stay all dry up.
Da leadas a da diffren countries
Wen tell dea army guys
Fo go smash down da red grape plant.
Befo time, had grape farm all da way to Jazer,
An da shoots from da vine go all ova da place,
To da boonies an all da way down
To da odda side a da sea.
 
Dass why I stay cry plenny
Da same way da Jazer peopo cry
Fo da grape plants Sibmah side.
I cry mo plenny
Fo da Heshbon an Elealeh peopo.
Befo time, wen da Moab peopo bring dea summa fruit
An harves da wheat,
Erybody yell plenny,
Cuz dey feel good inside.
But now, da peopo no yell dat way no moa
Cuz no mo notting fo harves.
10 Nobody stay feel good inside
Nobody dance an sing
Inside da farms an fields,
Cuz no mo grapes fo make wine.
I make um so no mo party ova dea.
 
11 Dass why I stay cry inside fo da Moab peopo.
I stay cry real plenny,
Jalike one sad song you play wit da harp.
How I tink an how I feel,
I feel real sore inside fo da Kir-Hareset peopo.
 
12 Bumbye, no matta da Moab peopo go up
Da sacrifice places fo dea gods on top da hills,
An no matta dey work real hard an stay tired
Fo go pray inside da temple dat stay spesho fo dea gods,
All dat, no goin do notting fo dem!
13 Dass wat Da One In Charge wen tell bout da Moab peopo long time befo time. 14 An now Da One In Charge tell dis too: “Da Moab peopo, get choke plenny a dem, an dey awesome. But ony three year from today, jalike da day one work contrack pau, nobody goin tink da Moab peopo stay awesome. Cuz dat time, ony goin get litto bit Moab peopo inside dea. All da odda Moab peopo gone awready! Da ones dat stay back, dey no can do notting cuz dey no mo powa.”