17
Wat God Tell Isaiah Bout Damascus
1 Me, Isaiah, I get heavy kine stuff fo tell bout wat I see goin happen to da Damascus peopo:
Look! Damascus no goin be one big town no moa.
Da whole place goin come one pile a bus up junks.
2 Da peopo goin leave all da towns Aroer side.
Dey all goin go way from ova dea.
Goin come one place fo da cows an sheeps an goats.
Dey goin lay down dea,
An no goin get nobody fo make dem sked.
3 Inside da Efraim land,
No goin get towns dat get strong wall no moa.
Inside da Damascus land,
No goin get kings no moa.
Da Aram kings from Damascus,
An da Israel kings from Efraim,
Dey was awesome befo time.
But bumbye, da ones dat still stay alive
From da Aram peopo an da Israel peopo,
Dey no goin be awesome no moa.
Az how goin be, Da One In Charge, Da God Ova All Da Armies tell.
4 Dat time, eryting dat stay awesome now
Bout da Israel ohanas,
Dat goin change, an dey no goin stay awesome no moa.
Jalike wen one guy had plenny fo eat
An now he come skinny.
5 Goin be jalike Refaim Valley
Right afta da guys harves da wheat ova dea.
Dey harves da wheat,
An take away plenny inside dea arm.
Den da Israel ohana goin be
Jalike wen some odda guy come layta,
Cut wateva da firs guys neva take wit dem,
An dey pick up ony litto bit.
6 Goin be hard fo da Israel ohana peopo,
Jalike afta you wack one olive tree wit one stick
Fo bring down da ripe olives, an ony litto bit stay on top,
Two-three olive on da high branch,
Four o five on top da branches wea da fruit come out.
Az how goin be, Da One In Charge, Da God Ova All Da Armies tell.
7 Dass da time erybody goin start fo tink
Bout da God dat wen make dem.
Dey goin start fo look
At da One Dat Stay Spesho fo da Israel peopo.
8 Dey no goin even tink
Bout da altars dey wen build wit dea hands fo da odda gods
An da small kine tings dey make wit dea fingas.
Dey no even goin look at
Dea spesho tiki pos fo da wahine god Asherah
An da places fo burn incense fo da odda gods.
9 Dat time, nobody goin live inside da towns dat get one strong wall now. Any kine stuff goin stay grow all ova da towns. Goin be jalike da time da Israel peopo come inside da land, an da peopo dat live dea, go way from dea towns an leave eryting. Ony goin get da boonies wea nobody stay no moa.
10 Fo shua you guys foget bout God
No matta he da One dat get you guys outa trouble.
You no even rememba
Dat he jalike one big rock fo you hide dea.
Dass why you stay plant nice plants fo da god Adonis
An da gods from anodda place.
11 No matta you put one fence
Da same day you plant um,
An da nex morning you make da seed start fo grow,
You goin get ony junk kine plants
From da seed you plant,
Cuz you goin get one sick dat nobody can make come good,
An you goin hurt plenny.
12 Bummahs! Plenny army guys stay make big noise
Jalike da noise wen da rough ocean stay poun.
Da armies from da diffren countries stay make noise,
Jalike wen da watta stay come down from da mountain
An no can stop um.
13 All da army guys from diffren countries make big noise,
Jalike da big watta stay running.
But God tell um, “No do dat!”
An dey run away one far place,
Jalike da junk kine stuff from da wheat
An jalike da dry weeds in front one storm
Dat blow in da wind in da hills.
14 Bummahs! Sun down time we all sked.
But befo da morning time,
Dis wat happen:
Da guys dat like steal oua stuffs
An take eryting,
Dey no stay no moa.