48
Da Israel Peopo, Dey Hard Head
1 You Jacob ohana peopo,
Lissen wat I goin tell you guys.
You guys get da Israel name too, from yoa ancesta,
An you Jerusalem peopo all come from Judah.
Wen you guys make one strong promise,
You use Da One In Charge name.
You tell da God dat Israel wen pray to
Fo him make shua you do wat you wen promise fo do.
Still yet, you guys no mean wat you tell,
An you no do wass right.
2 You guys tell dat you come
From Jerusalem, da town dat stay spesho fo God,
An dat you guys trus da God fo da Israel peopo—
His name, Da One In Charge,
Da God Ova All Da Armies.
3 Da One In Charge tell:
“Long time befo, I wen tell
All da firs tings dat goin happen.
I wen make shua peopo hear bout um.
Den, wen I stay ready,
Right den an dea I do um,
An da tings I wen tell, wen happen.
4 Cuz I know you guys get hard head.
Yoa neck jalike iron
An yoa forehead jalike bronze metal.
5 Az why I wen tell you guys all dis stuff
Long time befo time, befo wen happen.
I wen make shua you guys hear um,
So den you guys no can tell,
‘Az was my idol kine god dat do um,
My wood kine god an my metal kine god,
Dey da one tell fo make um happen!’
6 You guys wen hear all dis stuff.
Look, an tink bout um!
How come you guys
No tell az true, dat?!
“An from now, I goin tell you guys new kine stuff,
Secret kine tings dat you neva know befo time.
7 I wen make dem jus now,
Not long time befoa.
You guys neva hear bout um befo today,
Az why you guys no can tell,
‘Yeah, I know bout all dat stuff awready.’
8 You guys neva hear o know
Bout wat I tell goin happen.
From long time befo time you no like lissen.
“But I know dis fo shua—
No can trus you guys fo notting.
Erybody know, you guys stay go agains me
From da time you born.
9 Cuz I like peopo know wat kine god me,
An I like dem tell good tings bout me,
I goin wait an no come huhu yet.
I goin hold back
An no cut you guys off from me.
10 An you know wat I stay do to you?!
I stay take out da junk kine stuff inside you.
But I no goin melt you guys
Inside one real hot fire
Jalike peopo melt silva metal
Fo take out da junks.
Me, I make you guys suffa plenny.
Az how I tes you guys
An make shua you come okay inside.
11 I do all dis cuz a who me,
Cuz no way I goin let peopo ack
Like I not good an spesho.
I da Awesome One,
An I no goin let nobody tink
Dat anodda god can do wat I do.”
God Get Da Israel Peopo Outa Trouble
12 “You Jacob peopo from da Israel ohana,
Lissen wat I tell you guys.
You da guys I wen call
Fo come my peopo.
I da One dass God fo real kine.
I da One from da start,
An mo den dat, I goin be da las.
13 Me, wit my powa,
I wen make da foundation fo da earth
An spread out da sky an eryting inside dea.
Weneva I call da earth an da sky,
Dey all stan up.
14 “All you peopos, come togedda an lissen!
Wat idol kine god
Wen tell bout dis stuff dat goin happen?!
No mo!
Me, Da One In Charge, I wen pick my fren Cyrus.
He goin do eryting I like him do
Agains da Babylon peopo.
15 Me, I da One wen tell dis,
An I wen call Cyrus awready.
I make him go Babylon side,
An he goin be da winna ova dea.
16 Go come nea me, you guys,
An lissen dis.
From da firs ting I tell, till now,
I neva hide wat I tell.
Wen da ting happen, I stay dea.”
An now, Da One In Charge a me
Sen me, Isaiah, fo tell dis,
An he sen his Spirit too.
17 Dis one spesho message from Da One In Charge.
Him, da One dat pay da price
Fo get you guys outa trouble.
He God, da Spesho One fo da Israel peopo.
Dis wat Da One In Charge tell:
“Me, Da One In Charge, yoa God.
I da One stay teach you guys
Wass da bestes kine stuff fo you.
I stay show you guys da way fo go.
18 I wen like fo you guys lissen
Wat I tell you guys fo do befo time,
But you no like lissen!
I wen like fo eryting go okay fo you guys,
Jalike one riva dat no make noise
An stay full all da time,
But you not okay!
I wen like fo you guys get um right wit me,
Jalike da wave dat come in from da ocean all da time,
But you no get um right!
19 I wen like fo yoa kids come plenny
Jalike da sand on top da beach
Dat no mo nobody can count,
But dey no goin come plenny!
I wen like fo dem no come wipe out foeva
An no get cut off from me,
But now, dey goin come wipe out!
Dass wat Da One In Charge tell.
20 “Get outa Babylon town!
Run away from da Babylon guys!
Make big noise an dance an sing
Cuz you stay feel good inside!
Make da peopo hear dis
All da way to da mos far place on top da earth!
Tell dis: ‘Da One In Charge pay da price awready
Fo get his worka guys, da Jacob ohana, outa trouble.’
21 Da time Da One In Charge take oua peopo
Thru all da dry places,
Dey neva come thirsty.
He make da watta come outa da big rock fo dem.
He broke da rock, an da watta pour out.
22 “Da One In Charge tell dis:
‘Da peopo dat do bad kine stuff,
Dey no goin res!’ ”