49
Da Guy Dat Work Fo Da One In Charge
(Jesus Guys 13:47; Galatia 1:15; Efesus 6:17)
1 You peopo inside da islans, lissen me!
You peopo inside da far countries, lissen up too!
Befo I born,
Da One In Charge, he da One call me fo be his guy.
From da time I born, he tell peopo bout me
Cuz he know who me.
2 He make da stuff I tell, jalike one sharp sword.
He hide me inside his hand wea nobody can see me.
He make me jalike one shiny arrow dat he make sharp,
An he hide me inside his arrow bag.
3 Da One In Charge wen tell me,
“You, da guy dat work fo me,
Da Israel guy dass fo real.
From da tings you goin do,
I goin show erybody how awesome I stay.”
4 But I tell, “All da hard work I wen do,
No mean notting!
I stay strong befo time,
But now, I stay all wore out
Fo notting!
But fo shua, Da One In Charge, he da judge fo tell
If az ony wase time, o not.
My God, he da One goin pay me.”
5 So, now Da One In Charge tell me bout dis—
(He da One wen make me inside my muddah,
Fo me work fo him.
Da One In Charge like fo me bring back
Da Jacob ohana an all da Israel ohanas
Fo come his guys one mo time.
Da One In Charge get respeck fo me.
He my God, da One make me strong.)
6 So now, dis wat Da One In Charge tell:
“But dass ony one small kine job,
Fo you bring back by me
Da ohanas dat come from Jacob,
An da ones from da Israel ohanas
Dat I wen take kea.
Mo den dat, I goin make you
Jalike one light fo da peopo dass not Jew guys
Fo you come da one
Dat goin get peopo all ova da world outa trouble fo me,
Even da peopo from da mos far places inside da world.”
7 Dis anodda spesho message from Da One In Charge.
(He da One dat pay da price
Fo get da Israel peopo outa trouble.
He da Good An Spesho One fo da Israel peopo.)
Dis message, fo da one
Dat da peopo tink he no good inside,
Da one dat all ova da country,
Da peopo hate um,
Da one dey figga ony one slave
Dat work fo da leada guys.
Dis wat Da One In Charge tell dat guy dat work fo him:
“Wen da king guys see you,
Dey goin stan up fo show you respeck!
Wen da prince guys see you,
Dey goin go down in front you
Fo show you respeck!
An all dat goin happen cuz a me, Da One In Charge.
I da One you can trus.
I da Spesho One fo da Israel peopo.
An I wen pick you!”
Da One In Charge
Bring Back Da Israel Peopo
(Rome 14:11; 2 Corint 6:2)
8 Dis anodda message from Da One In Charge fo his worka guy:
“Wen da right time come,
I goin tell you wat you like know.
Wen da time come
Fo me get da peopo outa trouble,
I goin help you an take kea you.
I goin make you da one
Fo show da deal I get wit my peopo,
Az fo real.
I goin make da land fo dem use um one mo time,
Da fields wea nobody work um long time,
I goin give um back to da ohanas dat own um.
9 An I goin tell da prisona guys,
‘Go come! Go outside!’
An I goin tell da peopo
Dat stay inside one dark place,
‘Go! You guys not prisonas no moa!’
“Jalike da sheeps an da goats,
Dey goin find dea food by da side a da road,
An on top da hills wea no mo tree.
10 Dey no goin come hungry o thirsty.
Da hot an dry sun no goin burn dem.
Me, Da One In Charge, da One dat get love an aloha fo dem,
I goin give dem chance,
An show dem wea fo go,
An bring dem wea get pukas fo watta.
11 Jalike I goin make all my mountains
Come roads.
An all my big roads,
My peopo goin build um up
Mo high den da land da road go across.
12 Look! Da peopo goin come from far places.
Some a dem come from da north,
Some from da west,
Some from da south side a Egypt.
13 “Erybody inside da sky,
Yell cuz you stay feel good inside!
An you peopo all ova da world,
You stay feel good inside too!
Erybody inside da mountains,
Yell an sing!
Cuz Da One In Charge give good kine words
Weneva his peopo stay feel sore inside,
An he show love an pity
Fo da peopo dat stay suffa.”
14 But da Mount Zion peopo, dey tell,
“Da One In Charge wen leave us!
Oua Boss foget bout us!”
15 But Da One In Charge tell,
“Eh! You tink one muddah goin foget
Her bebe dat stay breas feed?
You tink she no mo love an pity
Fo da kid she wen born?
No matta she foget,
Me, no way I goin foget you Jerusalem guys!
16 Look! Jalike I wen write yoa name inside my hands.
Erytime time I look, I see da Jerusalem wall stay all bus up.
17 Yoa guys goin come back real quick
Fo build um one mo time,
An da guys dat wen broke down yoa wall
An wipe out yoa peopo,
Dey goin go way.
18 Look aroun you!
All yoa guys stay come back togedda
Fo come by you.
An jalike I shua dat I alive,
I shua dose guys goin come back
An make Jerusalem town look good,
Jalike wen one lady put on her jewels
Wen she go get married!”
Dass da ting Da One In Charge tell.
19 No matta no mo notting Jerusalem side,
An da town stay all bus up,
An yoa land all jam up yet,
I stay shua, da town goin be too small
Fo all da peopo live dea.
An all da guys dat wen make you guys dea slave,
Dey goin go way one far place.
20 An even mo den dat,
Da guys dat wen born ova dea,
Afta da Babylon guys take away oua peopo,
Bumbye you Jerusalem peopo goin hear dem,
Talking plenny to each odda.
Dey goin tell,
“Dis place, no mo room fo all us guys!
Give us guys mo place fo live!”
21 Den you Jerusalem peopo
Goin tink,
“Eh! Who give me all dese kids?!
Da Babylon guys wen take away my kids,
An I ol, an no can born kids no moa.
I was one prisona,
An dey throw me outa my house.
So! Who raise dese kids?
No mo nobody hea wit me.
So wea dese guys come from?”
22 Dis anodda spesho message from Da One In Charge, da Boss. He tell:
“Look! I goin put up my hand
To da peopo inside da odda countries,
An put up my flag
Fo all da diffren peopos know az time awready.
Den dey goin bring yoa small kids inside dea arm
An yoa girls on top dea shoulda.
23 You Jerusalem guys,
You goin get king guys fo take kea yoa kids
An be jalike dea hanai faddahs,
An da alii wahines goin be
Jalike da muddahs fo breas feed yoa kids.
Dey all goin go down
Wit dea face on top da groun
Fo show respeck fo you Jerusalem guys,
Jalike dey stay eating da dirt on top yoa feet.
Den, you guys goin know dass me, Da One In Charge.
Da peopo dat wait fo me, fo see wat I goin do,
No way dey goin come shame!”
24 Wen one strong army guy go fight an go steal some stuff,
You figga, you can steal da same stuff from da army guy?!
No way can!
One leada guy like take away peopo an make um his prisonas,
You tink he goin let um run away?!
Not even!
25 But dis, da message from Da One In Charge:
“Fo shua, I goin let da prisona guys go
From da strong army guys dat wen catch um!
Da stuff dat da leada guys steal,
I goin get um back!
I da One goin fight da guys dat fight you guys.
I da One goin get yoa kids outa trouble.
26 I goin make da guys dat give you guys hard time
Eat dea peopo.
Dey goin come piloot
Cuz dey drink dea blood jalike az was wine.
Den da peopo from all ova da world goin know
Dat me Da One In Charge, da One dat get you guys outa trouble.
I pay da price fo do dat.
I da Strong God, da One Jacob wen pray to.”