Luke
Tell Bout Jesus
1
How Come Luke Write Dis
1 Aloha, my fren Teofilus!
Plenny guys wen write down da tings dat wen happen wit us guys.
2 Dey write down da stuff da odda guys see from da time Jesus start fo teach. Dey teach us an plenny odda peopo bout wat wen happen.
3 An me, I wen check out real good all da stuff dat happen from da start. I figga dat I like write um down fo you one by one.
4 Den you can know dat da stuff you wen learn stay true.
How John Da Baptiza Born
(Malakai 4:5-6)
5 Wen Herod stay king fo Judea, had one pries guy name Zekariah. He work wit da Abijah pries hui. Elizabet, she his wife. She come from da Aaron pries ohana.
6 Zekariah an his wife do da right tings da way God see um. Eryting Da One In Charge tell um fo do, an all da Rules From God, dey do um. An no mo nobody poin finga dem.
7 Dey no mo kids cuz Elizabet no can. Her an Zekariah stay ol now.
8 An dis wat happen. Zekariah go in front God inside da Temple fo do da pries kine job wit his pries hui.
9 Dat time da pries guys pick Zekariah fo go inside God Spesho Place an burn da incense. Dey pull straw fo pick who goin go.
10 An all da peopo stan outside praying wen da time come wen Zekariah suppose to burn da incense.
11 Den he spock one angel messenja guy from Da One In Charge dat come an stan on da right side by da altar wea da incense stay burn.
12 Wen Zekariah see da angel guy, bodda him plenny an he come sked.
13 But da angel guy tell, “No sked, Zekariah! God wen hear wat you tell, an yoa wife Elizabet goin born one boy. You goin name um John.
14 You goin stay real good inside cuz a him, an plenny peopo goin stay good inside cuz he born.
15 John goin be one importan guy, da way Da One In Charge see um. He not goin drink wine o odda kine booze. Da Good An Spesho Spirit goin take charge a him befo he born.
16 He goin bring back plenny Israel peopo fo trus God, Da One In Charge.
17 John goin come firs, wit da same kine spirit an powa dat Elijah wen get. He goin make da faddahs get love an aloha fo dea kids one mo time. An da peopo dat no lissen God, he goin make dem stay tink jalike da peopo dat do wass right. He goin make da peopo ready fo wen Da One In Charge come.”
18 Zekariah tell da angel guy, “How I goin know dis fo shua? I one ol man, an my wife, she ol too.”
19 Da angel guy tell, “Me Gabriel, da one dat stan in front God, an he wen sen me fo tell you dis good stuff.
20 From now, you no can talk notting till yoa boy born, cuz you neva trus wat I tell. Dis goin happen fo shua wen da right time come.”
21 Wen dis happen, da peopo stay wait fo Zekariah outside, an dey try fo figga how come he stay long time inside da Temple.
22 Wen he come outside, he no can talk to dem. Az why dey figga he see someting spesho inside dea, cuz he make sign wit his hands, but no can talk.
23 Wen da time pau fo his job, he go home.
24 Afta dat his wife Elizabet come hapai, an fo five month she stay hide inside da house.
25 She tell, “Da One In Charge wen do dis fo me. He wen show me he goin do someting good fo me, an he goin take away my shame wit da peopo!”
How Jesus Born
(Start 18:14)
26 Afta six month God sen da angel messenja guy Gabriel to one Galilee town Nazaret.
27 He come by one wahine Mary. She neva come togedda wit one guy, but she make ready fo marry one guy Joseph. He from King David ohana.
28 Da angel guy come by her an tell, “Aloha! Da One In Charge goin do someting spesho fo you. He stay wit you.”
29 Mary come all bodda cuz a wat he tell, an tink wat dat mean.
30 Da angel guy tell,
“Mary, no sked.
God wen pick you, cuz he like do plenny good stuff fo you.
31 You goin come hapai, an goin born one boy.
You goin name him ‘Jesus.’
32 He goin be importan,
An God goin call him ‘my Boy dat come from me,
Da God Dass Mo Importan Den All Da Odda Gods.’
God Da One In Charge goin make him one king
Jalike King David, his ancesta guy.
33 He goin stay King fo da Jacob ohana,
Da Israel peopo, foeva.
Goin be lidat foeva.”
34 Mary tell him, “How can? I neva sleep wit one guy.”
35 Da angel guy tell, “Da Good An Spesho Spirit goin come ova you. Da God Dass Mo Importan Den All Da Odda Gods, his powa goin cova you. An da bebe you goin get, God goin call him ‘Spesho Fo Me’ an ‘God Boy.’
36 You know Elizabet, yoa ohana, aah? No matta she stay ol, she goin born one boy too. Peopo tell she no can born one bebe, but she six month hapai awready.
37 Notting too hard fo God, you know.”
38 Mary tell, “I da helpa fo Da One In Charge. Do to me jalike you wen tell.” Den da angel guy go way.
Mary Go See Elizabet
39 Dat time, Mary get up an go fas to one town in da hills Judea side.
40 Ova dea she go inside Zekariah house, an spock Elizabet, an tell her, “Aloha!”
41 Wen Elizabet hear Mary tell dat, da bebe huli inside her, an da Good An Spesho Spirit take ova Elizabet.
42 She talk loud an tell, “God stay do mo good fo you den fo all da odda wahines, an he stay do mo good fo da boy you goin born too!
43 But why dis good ting happen to me, dat you come by me, an you goin be da muddah fo Da One In Charge a me?!
44 Cuz wen I hear you tell ‘Aloha,’ right den an dea da bebe inside me wen huli cuz he stay good inside.
45 Da One In Charge stay do plenny good stuff fo you, cuz you stay shua dat da ting he tell goin happen.”
Mary Tell Good Tings Bout God
(1 Samuel 1:11; 2:1-10)
46 Mary tell,
“Inside, I like tell good tings
Bout Da One In Charge.
47 I feel real good inside
Cuz God take good kea a me.
48 He wen tink bout me, his pooa worka!
From now on all da peopo goin tell
God wen do plenny good stuffs fo me,
49 Cuz God get powa
An do plenny importan tings fo me.
He stay good an spesho,
Dass wat kine god him.
50 He give da peopo chance
Dat show respeck fo him,
From da granfaddas to da grankids.
51 He stay show his powa
An stay make da peopo wit big head
So dey no can do
All da stuff dey like do.
52 He stay pull down plenny big kings
From dea thrones,
An he stay make da peopo
Dat no mo notting, come importan.
53 He stay give da hungry peopo
Good stuff fo eat,
An he stay sen away da rich guys
Wit notting.
54 He stay help da Israel peopo
Dat work fo him.
He no foget fo give dem chance,
55 Jalike he wen tell oua ancesta guys,
Abraham an his ohana, foeva.”
56 Mary stay ova dea wit Elizabet three month, an den she go home.
John Da Baptiza Born
57 Da time come fo Elizabet fo born her bebe, an she born her boy.
58 Da peopo from ova dea an her ohana hear how Da One In Charge do plenny fo Elizabet cuz he get pity fo her, an dey all come real good inside wit her.
59 One week layta da ohana come fo cut da bebe skin. Dey figga dey goin name him Zekariah jalike his faddah.
60 But his muddah tell, “No way! We goin name him ‘John.’ ”
61 Dey tell her, “But you no mo nobody in yoa ohana wit dat name!”
62 Den dey make sign wit dea hands to his faddah, an go aks him wat he like name da boy.
63 Zekariah aks fo one paypa an write down, “He get da name ‘John.’ ” An dea jaws drop!
64 Right den an dea Zekariah start fo talk an tell good tings bout God.
65 Da peopo from ova dea come sked. An erybody tell dis story all ova da place in da hills Judea side.
66 Erybody dat hear dat story tink plenny, an tell, “Wat kine kid dis goin be?” Cuz da powa from God stay wit him.
Zekariah Tell Tings From God
(Songs 1:3; 72:18; 108:12; Isaiah 40:3; 9:2; 58:8; 60:1-2; Malakai 3:1)
67 Da time da Good An Spesho Spirit take ova John faddah Zekariah, he tell tings from God, lidis:
68 “Tell good tings bout Da One In Charge,
Da God fo da Israel peopo!
He come fo cut loose his peopo
From da peopo dat stay agains us.
69 He give us one Guy dat get da powa
Fo get us outa da bad kine stuff we stay in.
Dat Guy come from King David ohana,
Da king dat work fo God.
70 From befo time da guys dat talk fo God
Cuz dey stay spesho fo him,
Dey tell dis:
71 He wen promise fo take us away
From da guys dat stay agains us
An from da powa dey get.
72 He tell he goin give oua ancesta guys chance,
An he no goin foget da spesho deal he wen make wit dem.
73 He wen promise oua ancesta Abraham fo shua
74 Dat he goin take us away from da guys dat stay agains us,
An from da powa dey get,
He goin help us work fo him an no stay sked,
75 Fo us come spesho an make right da way he see us
All da days we stay alive.
76 An you, my boy John, dey goin call you
One guy dat talk fo da God Dass Mo Importan Den All Da Odda Gods,
Cuz you goin go firs, befo Da One In Charge come,
Fo make da roads ready fo him,
77 Fo make da peopo know
Dat he goin bring dem outa da bad kine stuff dey stay do,
An he goin let um go an hemo dea shame fo dat.
78 Oua God give chance cuz he get one big heart.
Dass why one new day goin come up fo us guys from God in da sky.
79 Da peopo dat stay do bad kine stuff,
Jalike dey stay live inside da dark an no can see notting,
An dey goin mahke inside,
God goin help dem fo know da trut.
Den us guys goin see da right way,
An den notting goin bodda us guys.”
80 Da boy John grow up, an his spirit come strong. He live inside da boonies till da day he come out an da Israel peopo see him.