2
Jesus Wen Born
(Matthew 1:18-25)
1 Dat time, da king fo da Rome peopo, Cesar Augustus, make all da peopo sign up fo find out how many peopo get ery place.
2 Dis da firs census dey make wen Quirinius stay govna fo Syria.
3 Erybody go back da town dea ohana come from fo sign up.
4 So Joseph go from Nazaret town Galilee side, to Betlehem Judea side. Az King David town, cuz he come from King David ohana.
5 He go ova dea fo sign up wit Mary, da wahine da ohana wen promise fo marry him. She stay hapai.
6 Wen dey stay dea, da time come fo her fo born her bebe.
7 An she born her numba one boy, an wrap him up inside some cloths, an lay him down inside one ting fo hold da cows food, cuz no mo room fo dem inside da small hotel.
Da Sheep Guys
An Da Angel Messenja Guys
8 Dat nite, ova dea inside da fields, get sheep guys dat take kea dea sheeps.
9 Right den an dea one angel messenja guy from Da One In Charge come by dem. All aroun dem one awesome light shine from him. Da sheep guys come real sked.
10 But da angel guy tell, “No sked. I come fo tell you guys Good Stuff From God dat goin make you guys an all da peopo stay good inside.
11 Today inside King David town, one boy wen born dat goin get you guys outa da bad kine stuff you stay do. He da Christ Guy, da Spesho Guy God Wen Sen. He Da One In Charge!
12 Dis how you goin know him. You goin find one bebe dat stay wrap up inside plenny cloths, laying down inside one ting fo hold da cows food.”
13 Right den an dea uku pile angel guys from da sky show up wit da firs angel guy. Dey stay tell good stuff bout God lidis:
14 “Up inside da sky wea God stay,
He stay awesome!
An ova hea on top da earth,
If God like wat peopo stay do,
He goin make dem
So notting bodda dem.”
15 Den da angel guys go way from dem an go back by God inside da sky. Da sheep guys tell each odda, “Eh brah, we go Betlehem fo see dis ting dat wen happen, dat Da One In Charge tell us bout.”
16 So dey run an find Mary an Joseph. Da bebe stay lie down inside one box fo da cow food.
17 Wen dey see da bebe, dey tell erybody wat da angel guys wen tell bout dis boy.
18 Erybody dat hear dat, tink bout wat da sheep guys tell um.
19 But Mary put all dese tings inside her, an tink plenny how spesho dey stay.
20 Da sheep guys go back, an dey tell erybody how God stay plenny good an awesome. Cuz all da stuff dey hear an see was jalike da angel guy wen tell um.
His Name Jesus
21 One week layta da time come fo cut skin. An dey call da bebe Jesus, jalike da angel guy from God tell befo Mary come hapai.
Dey Bring Jesus Inside God Temple
Da Sacrifice
(Prieses 12:6-8)
22 Befo time, Moses wen write down inside da Rules From God, all da stuff dat peopo gotta do wen one bebe born, cuz da muddah stay kapu fo pray wit odda peopo fo forty day. But wen da kapu pau, da muddah an da faddah gotta make one sacrifice, den she can go pray wit da odda peopo. Az why wen da time come, Joseph an Mary take Jesus to Jerusalem fo bring him inside da Temple, in front Da One In Charge.
23 In da Rules dat Moses write down befo time, Da One In Charge tell, “Bring me ery numba one boy fo make him spesho fo me.”
24 An Joseph an Mary make one sacrifice cuz dea numba one boy born, jalike da Rules from Da One In Charge tell, “If dey no mo notting, den bring two doves o two pigeons fo da sacrifice.”
Simeon
25 Dat time get one guy Simeon inside Jerusalem. He one guy dat erytime do da right ting an pray. He stay wait fo da One dat goin kokua da Israel peopo. An da Good An Spesho Spirit stay in charge a him.
26 Da Good An Spesho Spirit wen show him dat he no goin mahke befo he see da Christ Guy, da Spesho Guy dat Da One In Charge goin sen.
27 God Spirit tell him an he go inside da open lanai fo da Temple. Wen da faddah an muddah bring da boy Jesus inside fo do wat da Rules tell dey gotta do,
28 Simeon carry him in his arms an tell good stuff bout God lidis:
29 “You, Da One In Charge!
You do wat you wen promise fo do
To me, da guy dat work fo you.
Az why now you can let me mahke.
Notting goin bodda me,
30 Cuz now I see wat you wen do
Fo take us outa da bad kine stuff we stay do.
31 You wen make dis Boy ready fo do all dat
In front all da peopo.
32 He jalike one light
Fo make yoa peopo come awesome,
Da Israel peopo,
An fo show all da odda peopos
Inside da world
Wat stay right.”
33 Da faddah an muddah tink plenny bout da stuff Simeon tell bout da boy.
34 Simeon tell God fo do good tings fo dem too. He tell Jesus muddah Mary, “God wen sen dis boy, an plenny Israel peopo goin jam up cuz a him. But plenny odda Israel peopo, dey goin come good cuz a him. He goin be jalike one sign dat tell peopo fo watch out. Plenny peopo no goin like dat, an dey goin grumble bout him.
35 Dat goin show wat plenny peopo tink. An you too, Mary, you goin come sore inside, jalike one sword goin go thru yoa heart.”
Anna
36 Had one ol wahine Anna dea dat talk fo God. She Fanuel girl, from da Asher ohana. She wen stay marry seven year,
37 an now, she one widow fo eighty-four year. She no go outside da open lanai fo da Temple eva. Day time an nite time she stay do stuff fo God. She skip food an pray.
38 Dat time she come an tell God “Mahalo plenny!” an tell erybody bout da boy. She tell all da peopo dat stay wait, cuz dey know God goin cut loose da Jerusalem peopo so dey no gotta be jalike slaves no moa.
Dey Go Back Nazaret
(1 Samuel 2:26; Smart Guys 3:4)
39 Wen Joseph an Mary pau all da stuff dey gotta do, jalike Da One In Charge tell inside da Rules, dey go back Galilee side, Nazaret town.
40 Da boy grow an come strong. He come akamai, an God do good tings fo him.
Da Boy Jesus Inside Da Temple
41 Ery year Jesus faddah an muddah go Jerusalem fo da Passova ceremony.
42 Wen Jesus make twelve year, dey go da Passova jalike dey erytime go.
43 Wen da days fo da Passova pau, dey start fo go home, but da boy Jesus stay inside Jerusalem. His faddah an muddah neva know he stay dea.
44 Dey figga Jesus stay wit da odda peopo dat go wit dem. So dey go fo one day, an den dey start fo look fo him wit dea ohana an dea frenz.
45 Dey no can find him, so dey go back Jerusalem side fo look fo him.
46 Day numba three, dey find Jesus inside da open lanai fo da Temple, stay sitting dea wit da Jew teachas, lissening to dem, an aksing dem stuff.
47 Erybody dat hear Jesus, blow dea mind, cuz dey see he akamai da way he talk to dem.
48 His faddah an muddah come all shook up wen dey spock him, an his muddah tell him, “My boy, how come you do dis to us? Me an yoa faddah neva feel good inside, wen we try fo look fo you.”
49 He tell, “How come you wen look fo me? You neva know I gotta do my Faddah kuleana?”
50 But dey neva undastan wat he tell dem.
51 So Jesus go back wit dem to Nazaret, an erytime he do wat dey tell um fo do. But his muddah no tell notting to nobody, but tink plenny bout um.
52 An Jesus grow mo an mo fo know wat fo do erytime, an grow up mo an moa. An God an all da peopo tink good bout him.