8
Some Wahines Go Wit Jesus
Afta dat Jesus go thru da big an da small towns, an he teach da Good Stuff bout how peopo can get God fo dea king. Da Twelve Guys go wit him. An befo time Jesus make some wahines come good from da bad kine spirits an all kine sick. Dey all go too: Mary da Magdala wahine, dat had seven bad kine spirits dat take ova her befo time, but Jesus make um no bodda her no moa. An Joanna, Chuza wife, she go. (Chuza, he da guy dat stay in charge a King Herod palace.) An Susanna, an plenny odda wahines, dey all go too. Da wahines wen use dea money fo help take kea Jesus dem.
Da Farma An Da Seeds Story
(Matthew 13:1-9; Mark 4:1-9)
Plenny peopo stay come by Jesus from plenny towns, an he tell um one story fo teach dem. He tell, “You wen hear da farma guy story? He go plant seed. He throw da seeds all ova da groun fo plant. Some seeds fall down by da side a da trail. Da peopo walk on top um, an da birds eat um up. Some seeds fall down on top da rocks, an grow, an den dry up, cuz ony litto bit watta inside da dirt. Odda seeds fall down inside da kine bushes wit stickas. Da seeds an da bushes grow up togedda, an da bushes wit stickas choke um. Odda seeds, dey fall down inside da good dirt, an dey grow good, an come up plenny, one hundred times mo den da farma wen plant.”
Afta dat Jesus tell, “If you guys hear dis, den lissen up real good!”
How Come Jesus Teach Wit Stories?
(Matthew 13:10-17; Mark 4:10-12; Isaiah 6:9-10)
Da guys Jesus teach tell him, “Wat dis Seed story mean?” 10  He tell, “God let you guys know all da stuff bout how he stay king. But I tell stories fo teach da odda peopo, az why jalike da Bible tell, ‘dey see, but dey no can see fo real kine. Dey hear, but dey no can hear fo real kine.’ ”
Jesus Tell Wat Da Story Mean
(Matthew 13:18-23; Mark 4:13-26)
11 Den Jesus tell, “Dis wat da Seed story mean. Da seed, dass wat God tell. 12 Da seeds dat fall down on top da trail, dass jalike da peopo dat hear. But da Devil come make um foget wat God tell, fo dem no trus God. Dass why God no can take um outa da bad kine stuff dey do. 13 Da seeds on top da rocks, dass da peopo dat take wat God tell, an dey stay good inside wen dey hear um. Dey trus God litto bit, but wen get hard time dey pau trus, cuz dey no mo deep root, jalike da seeds on top da rocks. 14 Da seeds dat fall down inside da bushes wit stickas, dass da peopo dat hear, but den dey worry plenny, an dey like come rich an get plenny stuffs, an dey like play aroun all da time. All dat stuff grab um, an choke um. Dey foget wat God tell, jalike da seeds dat no mo wheat cuz dey stay inside da bushes wit stickas. 15 But ho! Da seeds dat fall down inside da good dirt, dass jalike da peopo dat hear wat God tell. Dey get one good heart, do da right ting, an no give up. Dey jalike da seeds dat give good kine wheat.”
Da Lamp Unda Da Bucket
(Matthew 5:15; Mark 4:21-25)
16  “You no light one lamp an cova um up wit one bucket, o put um unda da bed. No way! You goin put um on top one shelf fo da peopo dat come inside dea see da light. 17  Cuz eryting dat stay hide, bumbye God goin show um, an eryting dass hard fo undastan he goin make um mo easy fo da peopo undastan um. 18  Tink! You gotta lissen good! Da guy dat lissen good goin undastan plenny, but da guy dat no lissen good, God goin take away eryting he tink he know.”
Jesus Muddah An Braddahs
(Matthew 12:46-50; Mark 3:31-35)
19 Dat time Jesus muddah an braddahs come by him, but dey no can come togedda wit him cuz get choke plenny peopo ova dea. 20 One guy tell Jesus, “Eh, yoa muddah an yoa braddahs, dey outside, an dey like visit you.” 21 Jesus tell da guy, “My muddah an my braddahs, aah? Da peopo dat hear wat God tell an do um, dey da ones az my muddah an braddahs fo real kine.”
Jesus Make One Storm Pau
(Matthew 8:23-27; Mark 4:35-41)
22 One time Jesus tell his guys, “We go da odda side a da lake.” So dey go inside da boat an start fo go out. 23 Wen dey put up da sail, Jesus go sleep. One big wind storm come down on top da lake, an da waves was bussing ova da boat, an make da boat almos huli. Dey get in big trouble.
24 Da guys wake up Jesus, an tell, “Eh, Boss! We goin mahke!”
Jesus sit up. He scold da wind an da big waves. Da storm die down, an eryting come calm. 25 He tell his guys, “How come you guys no trus me?”
Dey come real sked, cuz wat dey see blow dea mind. Dey tell each odda, “Eh, who dis guy? Even da wind an da waves do wat he tell um fo do!”
Jesus Make One Guy
Wit Bad Kine Spirits Come Good
(Matthew 8:28-34; Mark 5:1-20)
26 Dey ride boat da odda side a Galilee Lake to da Gerasa town fields. 27 Jesus go on top da beach. One guy from dat town come dat get some bad kine spirits in charge a him. Long time dat guy neva wear clotheses o stay inside one house, but he stay inside da caves wea dey put da mahke guys. 28-29 Plenny times befo, one bad spirit take um ova. No matta da guy get chains on his hands an feets, an anodda guy watch um real good, he still broke da chains. An da bad spirit make da guy go odda places wea nobody stay. So wen da spirit spock Jesus, da guy yell, an fall down by Jesus feet. Jesus tell da bad spirit, “Let go da guy!”
Da spirit yell, “Eh, wat you like do to me, Jesus? Da God Dass Mo Importan Den All Da Odda Gods, I know you his Boy! I beg you, no hurt me!”
30 Jesus tell da guy, “Wat yoa name?”
He tell, “My name ‘Army.’ ” He tell dat cuz uku pile a bad kine spirits wen take ova him. 31 Da bad kine spirits, dey beg Jesus plenny times fo no make um go suffa inside da Deep Dark Hole.
32 Had plenny pigs dat stay grind on top da hill. Da bad kine spirits beg Jesus, “If you make us no bodda da guy, we like go take ova da pigs, aah?”
Jesus tell um, “Go!” 33 So da bad kine spirits no bodda da guy no moa, an go take ova da pigs. An den all da pigs run down one steep hill, an fall inside da lake an drown.
34 Wen da guys dat take kea da pigs see wat happen, dey run go tell erybody inside da town an all ova da place wat dey wen see. 35 All da peopo come fo look. Wen dey come by Jesus, dey spock da guy, an he no mo da bad kine spirits now. He stay sit by Jesus feet wit clotheses on, an he tink good stuff now. An all da peopo come real sked. 36 Da guys dat see wat happen, dey tell da peopo bout da guy dat da bad kine spirits wen take ova, dat he stay good now. 37 Den all da peopo from aroun Gerasa town tell Jesus fo go way from dem, cuz dey real, real sked. So he go inside da boat an go way.
38 Da guy dat no mo bad kine spirits now, he beg Jesus fo him go wit Jesus, but Jesus tell him, “No, brah. No can.” Jesus tell, 39 “Go home. Tell how God wen help you plenny.” So da guy go way an tell all ova da town how Jesus wen help him plenny.
One Mahke Girl An One Sick Wahine
(Matthew 9:18-26; Mark 5:21-43)
40 Wen Jesus come back, plenny peopo feel good inside fo see um, cuz dey stay wait fo him. 41 Had one leada guy from da Jew church, name Jairus. Right den an dea he come an go down by Jesus feet. He beg Jesus fo go his house, 42 cuz his ony girl, bout twelve year ol, litto mo mahke ova dea.
Wen Jesus stay go, get plenny peopo stay jam him. 43 An had one wahine ova dea dat stay bleed twelve year. She wen pay eryting she get to da doctas, but nobody can make her come good. 44 She come behind Jesus an touch his clotheses. Right den an dea she pau bleed.
45 Jesus tell, “Who wen touch me?”
Erybody tell him, “Not me!” Peter tell, “Boss, get uku pile a peopo aroun you, jamming agains you.”
46 But Jesus tell, “Somebody wen touch me. I know, cuz powa go out from inside me.”
47 Den da wahine know dat dey goin find out, an she come an go down by Jesus feets, sked an shaking real hard. In front all da peopo she tell how come she wen touch him, an how real fas she come good. 48 Jesus tell her, “Sistah, you trus me. Dass why you come good awready. Go. Now you no need suffa no moa.”
49 Wen Jesus still talking, one guy come from Jairus house, an tell, “Yoa girl mahke awready. No need bodda da teacha no moa.”
50 Wen Jesus hear dat, he turn aroun an tell Jairus, “No sked, ony trus me, an she goin come good.”
51 Wen Jesus come Jairus house, he ony let Peter, John, an James, an da faddah an muddah go inside wit him, an no odda peopo. 52 Same time all da peopo stay cry an moan fo her. Jesus tell, “No cry no moa! She not mahke, she ony stay sleep.”
53 An dey all laugh an make fun a him, cuz dey know she mahke. 54 But Jesus take her hand an tell, “Eh litto girl, sit up!” 55 Right den an dea her life come back an she sit up. Den Jesus tell her faddah an muddah, “Give her someting fo eat.” 56 Dat blow dea mind. But Jesus tell um, “Eh! No tell nobody wat wen happen, aah.”
8:2 8:2: Matt 27:55-56; Mark 15:40-41; Luke 23:49 8:10 8:10: Isa 6:9 8:16 8:16: Matt 5:15; Luke 11:33 8:17 8:17: Matt 10:26; Luke 12:2 8:18 8:18: Matt 25:29; Luke 19:26