Jesus Make One Lepa Guy Come Good
(Mark 1:40-45; Luke 5:12-16)
Jesus go down from da mountain, an plenny peopo go wit him. Had one lepa guy go by him an go down in front him. He tell, “Boss, if you like, try make me come good, aah? jalike da way God like.” Jesus wen stick out his hand an touch him, an tell, “Okay, I do um. Come good.” Right den an dea da lepa guy come good. Den Jesus tell him, “Make shua dat you no tell nobody bout dis. Go let da pries guy check you out. No foget make da kine sacrifice jalike Moses tell in da Rules From God. Den erybody goin know dat you stay good now, an you can pray wit da odda peopo.”
Jesus Make One Captain Worka Guy Come Good
(Luke 7:1-10)
Wen Jesus go inside Capernaum town, one captain fo da Rome army guys come by him fo beg um, “Boss, I get one worka guy dat stay home sick. He no can move, an he stay suffa plenny.”
Jesus tell him, “Kay den. I goin go yoa house fo make him come good.” But da captain tell, “Eh Boss, you know, I not good enuff fo you fo come inside my house. Ony tell ‘Go come good,’ den my worka guy goin come good. You know, I get one army boss dat tell me wat fo do. An I tell my army guys wat fo do. I tell dis guy, ‘Go,’ an he go. An I tell dat guy, ‘Go come,’ an he come. An my slave guy, I tell um, ‘Do dis,’ an he do um.”
10 Jesus hear dat, an he tell da odda guys dat follow him, “Ho! Dis guy get um! An I like tell you guys dis: no mo no Israel peopo dat trus me lidat! 11  An I like tell you guys one mo ting: wen God in da sky stay King, goin get plenny guys dat goin come from far away an all aroun, east side an west side, an dey all goin make big party togedda wit Abraham, Isaac, an Jacob. 12  But goin get odda guys fo God suppose to be dea King, but dey no like um be dea King. An den he goin throw um outside inside da dark. Ova dea dey goin cry plenny an grind dea teet cuz dey so huhu an futless.”
13 Den Jesus tell da captain, “Go. Jalike how you stay trus me, dass how goin be fo you now.” Dat same time, da worka guy come good.
Jesus Make Plenny Peopo Come Good
(Mark 1:29-34; Luke 4:38-41; Isaiah 53:4)
14 Den Jesus go Peter house. He go inside, an see Peter muddah-in-law on top da bed. She get one feva. 15 An wen Jesus touch her hand, her feva pau. She get up an she bring food fo Jesus dem. 16 Afta da sun go down, den da peopo dea bring plenny guys dat get bad kine spirits dat stay take ova dem. Jesus tell da bad kine spirits, “Let um go!” an dey let um go. He make all da sick peopo come good. 17  Dis happen jalike da guy Isaiah, da guy dat talk fo God long time befo time, tell: “Was him wen make all oua sick come good an take um away.”
Da Guys Dat Tell Dey Goin Go Wit Jesus
(Luke 9:57-62)
18 Bumbye, Jesus see choke peopo aroun him. He tell his guys fo go ova da odda side a da lake. 19 One teacha guy dat teach da Rules From God come by him, an tell, “Teacha, I goin go wit you wea evas you go.”
20 Jesus tell him, “Da foxes get hole fo house, an da birds in da sky get nes. But me, da Fo Real Kine Guy, I no mo house fo lay down.”
21 Anodda guy dat Jesus stay teach tell him, “Eh, Boss, try let me go home firs. I no can go wit you till afta my faddah mahke. Gotta bury um, aah?”
22 But Jesus tell him, “Jus come wit me an be my guy! Let da mahke peopo bury da mahke peopo.”
Jesus Make Da Storm Pau
(Mark 4:35-41; Luke 8:22-25)
23 Jesus an his guys go inside one boat. 24 Den had one big storm ova dea, an da waves stay bus ova da boat. But Jesus still yet stay sleeping. 25 His guys go wake him up, an tell him, “Eh, Boss! Get us outa dis! We goin mahke!” 26 But he tell, “How come you guys sked? You guys ony trus me litto bit, o wat?!” Den he get up. He scold all da winds an da waves. Den eryting come calm. 27 His guys, dat blow dea mind, an dey tell, “Eh, wea dis guy from? Even da winds an da waves do wat he tell um fo do!”
Jesus Make Two Guys
Wit Bad Kine Spirits Come Good
(Mark 5:1-20; Luke 8:26-39)
28 He go da odda side a da lake, ova dea wea da Gadara peopo get dea land. Had two guys dea dat da bad kine spirits take um ova. Dem guys, dey ack so wild, jalike dey pupule. Dass why nobody strong enuff fo go dat road. Dey live ova dea wea da mahke peopo stay buried. Da two guys come outa dea, an den dey go by Jesus. 29 An dey yell, “Wat you like do to us, Jesus? You God Boy! You come hea fo make us suffa befo da time come, o wat?”
30 Had plenny pigs nea dea, grinding. 31 Da bad kine spirits beg Jesus, “Wen you goin make us let go da guy, we like go inside da pigs an take um ova.”
32 He tell um, “Go.” So dey let go da guys, an take ova da pigs. An you know wat? All da pigs run down one steep hill an fall ova da cliff inside da lake, an drown inside da watta. 33 Den da pig guys run, an go inside da town, an tell erybody wat wen happen. Dey tell bout da guys dat get da bad kine spirits too. 34 All da peopo from inside da town go out fo see Jesus. An wen dey see him, dey beg um fo go way from dea.
8:4 8:4: Pries 14:1-32 8:11 8:11: Luke 13:29 8:12 8:12: Matt 22:13; 25:30; Luke 13:28 8:17 8:17: Isa 53:4