30
Da Strong Promises
Moses tell da leada guys fo da Israel ohanas: “Dis wat Da One In Charge tell dat us guys gotta do: Wen one guy make one strong promise to Da One In Charge, o make one strong promise fo no do someting, fo erybody know dat he goin do um o no goin do um, he betta not broke wat he wen promise! He gotta do eryting he tell he goin do.
“Wen get one young wahine dat still yet live inside her faddah house, an she make one strong promise fo Da One In Charge, o make one strong promise fo no do someting, if her faddah hear bout wat she wen promise, but he no tell notting to her, den eryting she promise goin stay. But if her faddah hear bout um, an dat same day he tell her she no can do um, den eryting she wen promise fo do no goin stay. Da One In Charge goin let her go, cuz her faddah no like let her do um.
“If she marry afta she make one strong promise, o afta she make one promise fo do someting stupid, an her husban hear bout um, but he no tell notting to her dat same day, den eryting she wen promise fo do goin stay. But if her husban hear bout um, an dat same day he tell her she no can do um, den eryting dat she wen promise fo do, she no can do um. He make um so she no can keep her promise. If goin be lidat, Da One In Charge goin let her go.
“If one widow o one wahine dat get divorce make one strong promise, den she gotta do um.
10 “If one wahine dat live wit her husban make one strong promise, 11 an her husban hear bout um, but no tell notting to her dat same day dat she no can do um, den eryting dat she wen promise goin stay. 12 But if her husban hear bout um, an dat same day he tell her she no can do um, den eryting dat she wen promise fo do, she no can do um. Her husban make um so she no can keep her promise, an if goin be lidat, Da One In Charge goin let her go. 13 Her husban can tell yes o no bout someting wen she make one strong promise fo do someting o fo no do someting. 14 But if her husban no tell notting da day he hear bout um, den dat mean he stay good wit da strong promise she wen make. 15 But if he tell her dat she no can do um mo den one day afta he hear bout um, den he da one get da blame wen she do wat she wen promise fo do.”
16 Dese da rules dat Da One In Charge tell Moses bout one guy an his wife, an one faddah an his young girl dat still yet live inside his house.
30:2 30:2: Rules2 23:21-23; Matt 5:33