31
How Fo Pay Back Da Midian Guys
Da One In Charge tell Moses, “Pay back da Midian guys fo wat dey wen do to da Israel peopo. Afta dat, you goin mahke an go by yoa ancesta guys.”
Az why Moses tell da peopo, “Make ready some a yoa army guys fo go fight da Midian guys, fo Da One In Charge pay dem back fo wat dey wen do. Sen one tousan guys from ery main ohana inside da Israel peopo fo fight dem.” So twelve tousan guys get dea stuffs ready fo war, one tousan from ery Israel ohana. Moses sen tousan guys from ery main ohana fo fight. He sen Finehas too, Eleazar da pries boy. Finehas take tings from da Place Dat Stay Spesho Fo God, an metal trumpets fo blow.
Dey fight da Midian guys, jalike Da One In Charge wen tell Moses fo do, an dey kill all da Midian army guys. Da five Midian kings, Evi, Rekem, Zur, Hur, an Reba, dey kill dem too. An dey kill Balaam, Beor boy, wit dea swords. Da Israel guys make da Midian wahines an kids dea prisonas, an take all dea animals an all dea stuffs. 10 Dey burn all da towns wea da Midian peopo live, an dea camps too. 11 Dey take all da stuffs dey wen rip off, an da peopo an da animals, 12 an dey bring all da prisonas an stuff dey rip off. Dey bring um by Moses an Eleazar da pries guy an by all da Israel peopo inside da camp on top da flat place Moab side, nea da Jordan Riva, da odda side from Jericho.
13 Moses, Eleazar da pries guy, an all da leadas fo da peopo go outside da camp fo meet dem. 14 Moses, he come huhu wit da officers fo da army, da leadas fo tousan guys an hundred guys, dat come back from fight da war.
15 Moses tell um, “Wassamatta you?! You guys let all da wahines stay alive, o wat?! 16  But you know wat?! Was dem, da ones wen lissen Balaam! Dey da ones turn da Israel peopo away, fo go agains Da One In Charge. Dass wat wen happen Peor side. An cuz a dat, da peopo a Da One In Charge get one real bad kine sick! 17 So now, go kill all da boys, an kill ery wahine dat wen sleep wit one guy! 18 But da girls dat neva sleep wit one guy, let dem stay alive. You guys own dem.
19 “All you guys gotta stay outside da camp fo seven days—anybody dat wen kill somebody, o touch one mahke body. Day numba three an day numba seven, you guys gotta make da religious kine ceremony fo make you an da prisonas you wen catch come clean, fo you go in front God.
20 “Make all yoa clotheses clean too, an eryting dey make from ledda, o goat hair, o wood.”
Da Stuffs Dey Wen Rip Off
21 Den Eleazar da pries guy tell da army guys dat wen fight, “Dis da rules dat Da One In Charge wen give Moses: 22 Da gold, silva, bronze, iron, tin, an lead dat you wen rip off— 23 all da odda stuff dat can go inside da fire, you gotta make um go inside da fire fo come clean da way Da One In Charge see um. But den you gotta clean um wit da kine watta fo make um clean too. An wateva no can go thru da fire, you gotta put um inside da watta fo make um clean, an den take um out. 24 Day numba seven wash yoa clotheses, an den you guys goin be clean an can come inside da camp.”
Dey Split Da Stuffs
25 Da One In Charge tell Moses, 26 “You an Eleazar da pries guy, an da leadas fo da blood lines inside da ohanas, count all da peopo an animals da army guys wen catch. 27 Den split um wit da army guys dat wen fight, an da odda peopo. 28 From da army guys dat wen fight, kapu fo me, Da One In Charge, one from ery five hundred peopo, cows, donkeys, sheeps, an goats. 29 Me, Da One In Charge. Kapu dem fo me from da army guys half, an give um to Eleazar da pries guy. 30 From da half from da odda Israel peopo, pick one from ery fifty, no matta peopo, cows, donkeys, sheeps, goats, o odda animals. Give um to da Levi guys dat take kea my Tent.” 31 So Moses an Eleazar da pries guy do wat Da One In Charge tell Moses fo do.
32 Da stuffs lef ova from da odda stuffs dat da army guys wen take was 675,000 sheeps, 33 72,000 cows, 34 61,000 donkeys, 35 an 32,000 wahines dat neva sleep wit one guy.
36 Da half part fo da army guys dat wen fight was: 337,500 sheeps an goats 37 an da part fo Da One In Charge from da sheeps an goats was 675. 38 From 36,000 cows, Da One In Charge part was 72. 39 From 30,500 donkeys, Da One In Charge part was 61. 40 From 16,000 peopo, Da One In Charge part was 32.
41 Moses give Da One In Charge part to Eleazar, da pries guy, jalike Da One In Charge tell Moses fo do.
42 Da half part fo da Israel peopo dat Moses put by one side from da part fo da army guys dat wen fight, 43 da Israel peopo half was 337,500 sheeps, 44 36,000 cows, 45 30,500 donkeys, 46 an 16,000 peopo. 47 From da Israel peopo half, Moses pick one from ery fifty peopo an animals, jalike Da One In Charge wen tell him fo do, an he give um to da Levi guys dat take kea da Tent Fo Meet Wit Da One In Charge.
48 Den da officers dat stay in charge a da army guys, da leadas fo tousan guys an hundred guys, dey go by Moses 49 an tell um, “Yoa worka guys wen count da army guys unda us. No mo even one a dem dat we neva count. 50 Cuz a dat, us guys bring dis stuff fo make one present fo Da One In Charge: da gold stuff we wen rip off, bracelets, rings, earrings, an necklaces, fo make us guys come pono wit Da One In Charge.”
51 Moses an Eleazar da pries guy take da gold tings from dem, all da jewelry stuff. 52 All da gold from da leadas fo tousan guys an hundred guys dat Moses an Eleazar give Da One In Charge fo one present, weigh bout 420 poun. 53 Ery army guy wen take stuff fo dem. 54 Az how come Moses an Eleazar da pries guy take da gold stuffs, an bring um by da Tent Wea Da Peopo Meet God, an put um in front Da One In Charge fo him no foget da Israel peopo.
31:16 31:16: Census 25:1-9