66
Mahalo, God
One Song Fo God, fo da main music guy
Yell to God, erybody all ova da world,
Sing fo tell God he pono,
An he da bestes!
Tell um you stay good inside cuz a dat!
Tell God: “Skery,
Da awesome tings you do!
Cuz you get supa plenny powa,
Even da peopo dat stay agains you
Gotta tell dat you da greates,
No matta dey no like talk lidat!
Peopo all ova da world
Go down in front you
Fo show you love an respeck!
Dey sing bout you
Cuz dey know wat kine god you.”
(Time out fo da music.)
 
Go come ova hea! Look, da tings God do!
Skery, da kine stuff he do!
He wen make da bottom a da Red Sea
Come dry land,
Fo da peopo walk to da odda side.
Dass da place wea da peopo
Come real good inside cuz a God!
God da One get da right
Fo stay in charge foeva,
Cuz he strong.
All da time he stay watch
Da diffren nations real good.
Da nations dat like go agains him,
No good dey tink dey mo big den him.
(Time out fo da music.)
 
All you diffren peopos,
Good, you tell oua God,
“Mahalo plenny fo da good tings
You do fo us!”
Good, God hear you guys
Tell him, dat he da bestes!
Cuz God, he da One dat make shua
Us guys stay alive,
He no let us fall down an mahke.
 
10 God, I talk lidis,
Cuz you wen tes us guys,
Jalike wen peopo melt silva fo make shua
No mo junks inside.
11 Jalike you wen catch us inside one trap
An put on top oua back
Heavy kine stuff fo carry,
12 Jalike you wen make army guys
Ride horse ova oua heads,
An jalike us guys wen go
Thru fires an floods.
But now, you wen get us outa dat
An give us eryting us guys need.
 
13 I goin come yoa Temple
Wit animals fo make
Burn up kine sacrifice.
Eryting I wen promise fo do fo you,
I goin do um.
14 I wen make plenny promise lidat
Da time I wen get in big trouble.
15 An now, I goin bring you da animals
I wen feed fo make um fat,
Sheeps, an cows, an goats.
I goin kill um fo make one sacrifice fo you,
An burn um up fo smell good fo you.
(Time out fo da music.)
 
16 All you peopo dat feel
Sked an shaking in front God,
Go come ova hea an lissen up!
I goin tell da story
Bout eryting God wen do fo me.
17 I wen yell to him fo help me,
An I wen tell erybody
Dat he da mos importan one.
18 Even if I wen like do someting
Ony litto bit bad,
My Boss no goin lissen me.
19 But fo shua,
Wen I pray, he lissen.
 
20 I like tell God “Mahalo!”
Cuz he wen do good tings fo me.
He neva make deaf ear wen I pray,
He erytime stay tight wit me
Cuz I his guy.
66:6 66:6 a: Outa 14:21; Josh 3:14-17