67
One Song Fo Tell God “Mahalo!”
(Jesus Guys 28:28)
Fo da main music guy, one song fo sing wit string kine instrument
Eh God! I like fo you ack
Real good to us guys,
An do good tings fo us guys,
An smile an show
You stay good inside cuz a us.
(Time out fo da music.)
 
Wen you do dat,
Peopo all ova da world
Goin find out da way you do tings,
An all da nations goin know
Dat you get um outa trouble.
God, I like fo diffren peopos tell
Dat dey yoa peopo,
All da diffren peopos.
 
I like fo da diffren peopos
Stay real good inside
An sing cuz dey feel
Good inside bout you,
Cuz wen you judge da diffren peopos,
You no make diffren kine
To diffren peopo.
Dass how you show da nations
All ova da world how fo live.
(Time out fo da music.)
 
God, I like fo diffren peopos tell
Dat dey yoa peopo,
Fo all da diffren peopos.
Da land stay give us guys
Da tings dat grow dea.
Oua God stay do good tings fo us.
I like fo God stay do good tings fo us.
In da mos far parts a da world,
I like fo peopo feel sked an shaking
Wen dey in front him!