1 Imbabale', igongaham tun itugun'un he''a ta hiyay pun'onanom hi nomnommu. 2 Ta wan adalom di atom an manomnoman ya luma'ing. 3 Ot pohdom'en ma'awatan nan ituddun nadan nun'anomnoman 4 ya mahapul an adi'a mangmanghop ta umat hinan atom an manama' i ha natala' hi pihhu onu ha nipa"eh nabalol an odon ta ingganah onmu hama'on. 5 Ot gahin di athidiy atom an manama' ta mabalin an innilaom di a'at Apu Dios ya ma'awatam di a'atna hi'on waday takutmu i hiya. 6 Te hi Apu Dios di mangdat hi la'ing ya abalinan an manginnilah an namin nadan nahamad hi ma'adal ya nan abalinan an manginnilah nadan nipto' hi aton. 7 Ya waday indadaana an nipto' an tugun an midat hinadan mangat hinan pohdona ta hiyay ay hapiyodan mangun'unud i hiya an Dios. 8 Te ipappapto'na nadan maphod di pangatda an nanongnan umun'unud i hiya. 9 Ot hi'on unudom nadan tugun'u ya innilaom an mangat hi maphod ya nipto' ya ta'on on nganney ma'at ya innilam di nipto' hi atom. 10 Te manomnoman'a ya mipa'amlong'ah nan na'adalmun tudtudu. 11 Ot nan abalinam an mangimatun hinan nipto' ya nan maphod an pangat ya diday ay mangipapto' i he"a. 12 Ta nan em anomnoman di mangihwang i he"ah nadan at'atton nadan adi maphod di pangatda an tatagun bumahbah di hapitonda. 13 Te dida ya inwalongda nan nipto' an pangiye"e ta nan ay nahilngan an pangiye"e di impa'inghadan aton. 14 Ya hay pun'amlonganda ya nan pangatandah nadan adi maphod an bumahbah. 15 Ya inaynayunda nan kuluk an pangatda te ningamut an ma'layyahda.

16 Mu hay oha boh iyatan nan e anomnoman ya mibaliwda hinadan mi'ilala'i an binabai an ta'on onda nalahin ya eda bumalbalih linala'i an gapuh nan panapitda. 17 Te tinaynanda nan ahawada ta imbahhoda nan imbagadan atondah din nun'addumanda. 18 Ot nan lala'in e mi'yinghah nan athidin babai ya paddungnay i'wanah nan awon di atayan ta e middum hinadan nate. 19 Te ma''id ha lala'ih e mi'yingha hi athidin babai ya mabalin an mibangngad hinan a'at di nitaguwanah din hopapna. 20 Ot hiya nan mahapul an iyunnudanmuh nan pangat di nun'anomnoman ta nan nipto' an pangat di ipa'ingham. 21 Te nan mangat hinan pohdon Apu Dios an dida nan nipto' di pangatda ya diday mabati hi munhituh nan numboblayanda. 22 Mu nadan adi maphod di pangatda ya nadan mumpunlayah ya mapogpog di nitaguwanda.