3
Hay Immamuyuan Job ay Apo Dios
1 Ya la'tot ya himmapit hi Job, ya inidutanah de han algaw an gutud di nitungawanan
2 inalinay,
3 “Hay maphod ya mami'id din algaw an nitungawa'
ya din labin nangalyandah nalmuwa'!
4 Ya henen algaw ya pumbalinom ni' hi helong,
ya maphod ni' un aliwan Apo Dios ta un homehellong ta adi mapatalan!
5 Ya maphod hi un paddungnay maliduman, ya mahehelngan, ya munnonong nan ma'ugtul an bunut
ta way atonan adi mapmaptangan!
6 Ya humehellong ta adi mibilang hi ohay algaw eden bulan
unu ta adi goh mi'yuyap hi ohay algaw eden tawon!
7 Hay maphod ya ibilangyuh nen mahdom hi mi'id di hulbina
ya mi'id ah amlong!
8 Ya nan tume'om an abalinandan mummandal hinan atata'ot an animal
an wah nan baybay an ma'alih leviathan ta unudonda
ya maphod hi unda idutan henen algaw an nitungawa'!
9 Ya adi ni' bumbummuhu' nan bittuan hinan helhelong
ta adi ni' goh mapatpatalan,
10 ta ma'idutan henen nahdom ti tuwali ta inyabulutnay nitungawa'
ta omod unna' munholtap hi nidugah an ligat!
11 Anaad ta agguya' tuwali natoy hidin nangipabuhu'an inan ha"in
ta hidin nitungawa' ya nami'ida'?
12 Anaad tuwali ta hinaha'lia' ay ina,
ya hinalimunana' an impa'inuman hi huhuna?
13 Ti unna' at nin natoy hidin nitungawa',
at mid al'alin ha"in,
at ihnaa' at an unna' molmolo' an me'yeb'eblay
14 hidin a'ali ya nan u'upihyal hitun luta an din numpangiyammah
nan o"ongol an palasyuh din ataguda (an ta"on un napa"id ugwan),
15 ya din numpumpapto' an adadangyan
an nun'apnuy abungdah balitu' ya silver.
16 Onaynah unna' nitungaw ya nanattoya' ta inlubu'a'
ya ta agguy'u tinnig di mapatal!
17 Gulat ta nilubu' nan tagu ya hiyay apogpogan di pangatandah nappuhi,
ya hiyah ne pun'eblayan nan na'ab'ablay an tatagu!
18 Ya ta"on nan nibalud ya mi'id di al'alin didah di
ti mi'id mahkay mangihingal ay dida.
19 Ya an amin din nun'awotwot ya adadangyan ya wah dida,
ya din baal ya liblida mahkay hinan apuda.
20 Anaad udot ta ipa'alin Apo Dios di patal hinan tagun munligligat an umat ay ha"in,
ya anaad ta adina pogpogon di nitaguan di tagun hay lungdayay wan hiya ya anggay?
21 Ti iyahupanday atayanda mu adida matmattoy,
ya iyod'odolnada nan lubu' ya un nan mapla'an an gina'u.
22 Ya nidugah di pundenolanda ya umamlonganda
hi unda ah'upan nan lubu'.
23 Anaad ta inaynayun Apo Dios an taguon nan agogohgoh di nitaguanan
mi'id di hulbina ti mi'id di namnamana?
24 Ya ten unna' umale'alengeng,
at hiyanan mid ato' an mangan,
ya tun ungi' ya ay danum an mun'ihiit.
25 Ya an amin di ita'ot'u ya nipa'annung ay ha"in,
ya nan iyogyat'u ya na'at ay ha"in.
26 Ha"in atog ya mi'id ah lenggop'u,
ya mi'id ato' an mun'eblay
an adi ahan mapogpog tun punligata'!”