4
Hay Nahhun hi Inalin Eliphaz ay Job
1 Ya hi Eliphaz an nalpud Teman ya inalinay,
2 “Job, akkay adim pahiwon ta humapita'?
Ti ten adia' pa"edpol hi unna' didindinong!
3 Adya nomnomom din inatmun nuntugun an inal'alu'mu din nadismaya,
at hi Apo Dios di nange'kodanda,
ya binadangam din adi umday pangulugda.
4 Ya dumalat nan tugunmu ya din ad'addiy pangulugda ya pinumhod,
ya inal'alu'mu nan munduwaduwan mihamad.
5 Mu ten ad ugwan an he"ay a'atan di ligat,
ya nen adim edpol an nen madismaya'a.
6 He"a ya nahamad di aatmun hi Apo Dios di e'gonam,
ya mi'id ah numbaholam
at mahapul an nidugdugah di denolmu ya namnamam!
7 Nomnomom adya,
undan waday taguh nahamad di aatnan na'ubah?
Ya undan waday ma"aphod an tagun napa"i?
8 Hay inila' hi tinnig'u ya nan tagun mangamangat hi nappuhi
ya miballoh an hay nappuhi goh di ma'at ay hiya.
9 Ya mun'apa"idah nan yahyah Apo Dios,
ya mun'a'ubahdah nan bungotna.
10 Hanan nun'appuhin tatagu ya umatdah nan layon hi bubulung
an atata'ot an humeeheel an manganap hi patayona ta ihdana.
Mu hi Apo Dios ya pumpulupulna ta mun'a'aan nan babada.
11 Ya umatda goh hinan layon an mi'id ah panganana,
at matoy,
at la'tot ya nun'iwa'at an amin nan imbabaluyna.
12 Ya wada han himmapit ay ha"in
an unna inyab'abu'ab an hi'itangan an adi' donglon
13 an umat hinan enap di taguh un nimogmog di enlo'na.
14 At ha"in ya wimmogwoga' hi ta'ot'u,
15 ya enela' nan lennawan naluh hi angah'u,
ya mamgal an amin di dutdut'u.
16 Ya hin'alina ya inta'dogna,
mu adia' pa'immatun hi aatna.
Mu la'tot ya dengngol'un mun'ab'abu'ab an himmapit an inalinay,
17 Undan hay taguy nahamhamad ya un hi Apo Dios?
Un mah nan taguy nahamhamad di atona ya un nan nunlumun hiya?
18 Hi Apo Dios ya inilanan agguy nahamad di aat nan baalnad abuniyan
ti ta"on nan a'anghelna ya waday ibahhawanda,
19 at iyal'allanah nan tagun nunhituh nan abung an uklit an hay hupu' di nalmuwana
an nalakan megpa'dan umat hinan ul'ulappuy
20 Ti ta"on un mataguh nan helhelong ya mid mapto' ya matoy hi mapuyaw,
ya na'ubah,
at mi'id hi enggana.
21 Ya matoyda an adi umday la'engda,
ya an amin di wadan dida ya mi'id an alan di udum.”