34
1 Elihu asụkwaphu:
2 “Unubẹ ndu mmamiphe;
unu ngabẹkwaru mu nchị.
Unu ngabẹkwaru mu nchị;
unubẹ ndu gụru ẹkwo;
3 kẹ l'ọ bụ ẹge ire edeje ọnu lẹ nri;
bụ ẹge nchị egeje nchị l'okfu;
maru ọphu bụ ọkpobe iya.
4 Ọ kwa ayịbedua
b'ọ nọ l'ẹka;
t'ayi lee ẹnya l'okfu ọwaa;
maru ẹge ọola;
shi iya mụta iphe,
dụ mma.
5 Jobu sụru lẹ ya doberu ẹka ndoo;
ọphu Nchileke 'ekwedu iya ọharu enge.
6 Ẹ to nwedu ẹke ya mesweru;
e gbe sụ lẹ ya adzụ ẹjire.
Ẹ tọ dụ ẹke ikpe iya nmaru iya;
ọbule akfụ, ọogba iya yeekwaru iya ọru.
7 ?Unu phụjewaru onye dụ l'ọ bụ Jobu;
mbụ onye angụ
ẹjo-ọnu l'ọ bụ mini.
8 Ndu ẹphe l'iya anọduje
achị idzi bụ ndu ẹjo madzụ;
bụru ndu akirishi bẹ ẹphe l'iya ayị;
9 kẹle ọosuje l'ẹ tọ dụdu
iphe, madzụ erita l'ome
iphe, dụ Nchileke mma.
10 Unu ngabekwaru mu nchị;
unubẹ ndu nweru egomunggo.
Tụswekwa!
Ẹ to nwekwa lẹ
Nchileke emee ẹjo iphe!
Ọkaribe-Kakọta-Ike
te emeghekwa iphe,
ẹ te vudodu nhamụnha!
11 Ọ kwa ụgwo iphe,
onye meru bẹ ọokfuje iya.
Oowolatajeru onye
l'ẹge umere iya dụ.
12 Ire-lanụ bụ lẹ Nchileke
te emejekwa ẹjo iphe;
mbụ kẹ tẹ
Ọkaribe-Kakọta-Ike nmaa
madzụ ikpe ịnyigirinyi.
13 ?Bụ onye meru
Nchileke t'ọ bụru ishi kẹ mgboko-a.
?Bụ onye sụru iya t'o
letaje eliphe gbaa
mgburumgburu ẹnya.
14 Ọ -bụru l'ọ chịru iya l'obu;
lẹ ya a-nafụ madzụ ume iya;
15 bụnu iya bụ lẹ madzụ
kpoogba a-gwụ;
laphukota azụ l'ẹja.
16 Ọ -bụru l'iphe edoje ngu ẹnya;
ngabẹkwa nchị;
nụa iphe-a, mu ekfu-a.
17 Onye ikpe,
vudo nhamụnha dụ ashị;
?nanụ ẹge oo-shi bụru ishi; l'achị.
Onye ono,
doberu-ẹka-ndo;
bya abụru iya bụ
Ọkaribe-Kakọta-Ike ono;
?nanụ ẹge ii-shi nma iya ikpe.
18 ?Tọ bụdu Nchileke bụ
onye asụje ndu eze
l'ẹ tọ dụdu iphe,
ẹphe bụ!
Yọ sụ ndu nweru ẹnya
l'ẹphe bụ ndu ẹjo madzụ?
19 Ẹ tọo kpadụ ókè
l'ẹke ndu eze nọ;
ọphu oowotajedu
iphe gbaru onye ụkpa
nụ oke amadụ;
kẹle ndu ono ẹphe ẹbo
bụ iya gude ẹka iya kee ẹphe.
20 Ẹphe agbajihuje
agbajihu l'echi-abalị.
Nchileke alọ-woje
ndiphe alọ-wo;
ẹphe anwụshihu.
Ndu oke amadụ;
bẹ oowofuje;
to nwe madzụ nwigbaleke-ọma,
oogbe ele ẹnya t'o yetaru iya ẹka.
21 Ẹnya Nchileke
anọjekwa l'ụzo, madzụ eshi.
Ọophukotaje ẹke ẹphe aha ọkpa l'eshi.
22 Ẹ tọ dụdu ẹge ọchi
gbaru; tọ dụ ẹke,
gbaru tsụkiribangu;
bụ ẹke ndu ẹjo madzụ
e-domighe onwẹphe.
23 Nchileke te eyekwaa
oge teke ndiphe
a-bya iya ifu t'o kpee ẹphe ikpe.
24 Ẹ too jejeodudu ọkpata ishi;
tẹmanu yo wofu ndu
ishi; chịta ndu ọdo
dochishia ẹnya ẹphe.
25 Ọ bụ okfu l'ọ makọtaru
iphe, ẹphe eme
meru iphe oonwutsuje
ẹphe l'ẹnyashi;
gwee ẹphe rakaraka.
26 Ọonoduje l'edzudzu ọha
l'ẹke onyemonye ọbule a-phụ ẹphe;
hụ̀a ẹphe àhụ̀hù k'iphe, dụ ẹji, ẹphe eme;
27 okfu l'ẹphe haru otso Nchileke;
ọphu ọ dụdu iphe,
ọ sụru t'e mee,
nweru ọphu ẹphe emeje.
28 Ẹphe emeje ndu ụkpa;
mkpu, ẹphe erua Nchileke nchị;
k'ọphu bụ lẹ Nchileke
anụje ẹkwa, ndu ẹ-ta
dụdu ẹge ọ haru ẹphe.
29 Ọlobu; ọ -sụkwanu lẹ
ya te eyedu ọnu;
?bụ onye a-nma iya ikpe.
O -domia ifu iya;
?bụ onye a-dụ ike phụ iya.
Ọ bụ iya nwe madzụ;
mẹ iphe bụ mbakeshi.
30 Oomeje t'onye te emedu
ele Nchileke ba anọshi l'ọchichi;
k'ọphu ẹ tọo watadu
ọgbaru madzụ ọnya.
31 Ọ -bụru lẹ madzụ sụru
Nchileke l'o tewaru iya;
lẹ ya te emehedu ẹji ọdo;
32 t'o koshinu iya ẹke
o teru iya;
k'ọphu ya te emehedu iya ọdo.
33 ?Ịiri lẹ Nchileke e-gbe
bya ebua ngu nggo
k'ẹji, i meru;
l'ẹke ụta iphe ẹji ngu ta ladụ ngu azụ.
Ọ kwa nggụbedua
e-kfu iphe ịiri;
ẹ tọ kwa mbẹdua.
Ọo ya bụ; kfunua iphe,
ị maru.
34 Ndu iphe edoje ẹnya;
mẹ ndu mmamiphe
a-sụkwa:
35 L'iphe Jobu ekfu kwa
okfu onye egomunggo swehuru;
mbụ l'iphe ookfu te nwedu ishi.
36 Ọ dụ mu t'a sụ lẹ Jobu;
bẹ aa-data darua ya l'ishi;
kẹ l'okfu iya ada l'ọ bụ
okfu ẹjo madzụ.
37 O meru iphe, dụ ẹji;
bya etsubekwa l'ẹke ono
l'ekwefuru Nchileke íkè.
Ayi l'iya -nọdu;
yọo kụ ẹka l'aja ayi ewena;
l'ekfu ẹjo okfu l'ekpu Nchileke.”