35
1 Elihu asụ:
2 “Jobu; ?i tubesu l'ọ bụ
ngu odobe-ẹka-ndoo;
l'ẹke ịisuje l'ị ka
Nchileke odo odomu?
3 Obenu l'ịijije; sụ:
‘?Bụ ngụnu bụ uru iya?’
‘?Nanụ uru, iirita
kẹ l'ị haru ome ẹji?’
4 Tẹ ya yeeru ngu ọnu;
nggu lẹ ndu ọ̀nyà ngu phẹ.
5 Palikpoduaphu ẹnya
lee l'akpamigwe;
nggu aphụ urukpu ono,
nọ ngu oreke-imeli ono.
6 I -mee iphe, dụ ẹji;
?i mebataru Nchileke l'awe?
Ẹjo iphe, i meshiru;
m'ọ -ha ịha agha;
?ọo-kpọshi iya ngụnu?
7 Ọ -bụru l'i doberu ẹka ndoo;
?o gbe nweru ẹge iishi
gude iya l'eyetaru
Nchileke ẹka?
Mbụ; ?o nweru iphe
oogbe anata ngu l'ẹka.
8 Ẹjo iphe, iime kwa
madzụ ibe ngu bẹ iimebeta;
bụkwaruphu ẹphe;
bẹ odobe-ẹka-ndoo ngu agaru mkpa.
9 Ọobuje; a -kpanụka
ndiphe ẹhu;
ẹphe eye mkpu l'ọnu.
Ẹphe echije
‘Ojilẹka tọgbo;’
t'a bya anafụ ẹphe
l'ẹka ndu ike.
10 Ọle ẹ tọ dụdu onye arajẹ
araku Nchileke,
bụ onye keru iya nụ;
mbụ onye emeje
t'ayi mụa ọnu-ọchi
l'oge iphe-ẹhuka;
11 onye ka ayi ozi iphe
karia ẹge oozije ụnwu-anụ-ẹgu;
bya emee ayi;
ayi aka nwẹnu, ephe l'eli ọmaru iphe.
12 Ẹ too yejeduru madzụ
ọnu teke oochi mkpu.
Mkpata iya abụru lẹ ndu
ẹjo madzụ kunukaru onwẹphe ekuku.
13 Ishi iya bụlephu lẹ
Nchileke te eyejedu ọnu
teke eechi mkpu ìphòró.
Ọkaribe-Kakọta-Ike
te eyejedu ọnu l'egbe iphe ono.
14 ?Nanụ ẹge oo-gbechia
ngaarụ ngu nchị;
nggụbe onye sụru
l'ẹ t'ị phụdu iya lẹ phuu;
mbụ nggụbe onye sụru
l'ikpe ngu nọ iya l'ifu;
l'ịi-nọdu-a angaru iya?
15 Nggu asụkwaphu
l'iphe-eghughu Nchileke
ta dụdu iphe, oomeje;
ọphu ọokpajedu ẹjo madzụ ishi.
16 Ọo ya bụ l'iphe
nggụbe Jobu ekfu bụ mkpọkoro okfu.
Okfu nọ ngu l'ọnu;
ọle iphe iikfu te nwedu ishi.”