36
1 Elihu asụ Jobu
2 “Taa nshi nwanshịi;
tẹ mu koshi ngu
l'o nwetsukwaru-a
iphe ọdo, mu e-kfu;
gude gbataru Nchileke.
3 Ẹke mmamiphe mu
shi tekwaru ẹnya.
Mu e-koshi ngu
l'onye ono, keru mu nụ
ono bụ onye vudo nhamụnha.
4 Iphe ịi-tụbe nvọ bụ
l'okfu mu ta bụdu ẹjire.
L'onye kẹ mmamiphe
katsụa odota ẹnya;
bẹ nggu l'iya nọkwa l'ẹke-a nta-a.
5 Nchileke hakwa nshinu;
obenu l'ẹ to nwedu onye
ọokpoje ẹbo-ẹbo l'afụ.
Ọ ha nshinu; bya abụru
onye iphemiphe ọbule edoje ẹnya.
6 Ndu ẹjo iya b'ẹ too dobejedu ndzụ.
Obenu lẹ ndu aakpa ẹhu;
bẹ ọonuje iphe,
gbaru ẹphe.
7 Ẹnya ta alụfujedu iya
l'ẹke ndu doberu ẹka ndoo nọ.
Oomeje; ẹphe lẹ ndu eze
atụko bụru eze;
bya emee t'aakwabẹje
ẹphe ugvu gbururu jeye lẹ gbururu.
8 Obenu; l'a -tụa madzụ mkpakọbe;
ọkpukpu iphe-ẹhuka ono,
a tụru iya ono ekee ya;
kee ya dụngu
9 bẹ Nchileke ekoshije
onye ọbu l'o shiwa l'ekuku,
ooku onwiya;
yeswee ẹka.
10 Oomeje t'ẹphe ngabẹ nchị
l'ụzo, ọokpo-ziru ẹphe;
mẹ t'ẹphe taa onwẹphe ụta
iphe, dụ ẹji, ẹphe eme.
11 Ẹphe -mee iphe, o kfuru;
jelahaaru iya ozi;
bẹ nwoge ọphu phọduru
lẹ ndzụ ẹphe teke ono
a-bụru ẹphe ụpete;
ẹphe anọdulephu l'àgó.
12 Obenu l'ẹphe -jịka
l'ẹphe te yeduru iya ọnu;
bẹ ẹphe a-laa l'ọgu;
nwụshihu l'ẹphe be enwe egomunggo.
13 Ndu Nchileke ẹ ta nọdu
l'obu evujeru iwe l'ọkpoma;
k'ọphu bụ;
l'o -kee ẹphe m'ọo ẹgbu;
bẹ ẹphe ta arakujekwa iya
t'ọ gbaaru ẹphe mkpu.
14 Ẹphe agbakwohuje agbakwohu;
tsoru unwoke ọkpara,
a gọru lẹ nte laa l'ite lanụ.
15 Obenu lẹ ndu eje
iphe-ẹhuka bẹ ọonafutaje.
Oogudeje iphe-ẹhuka
ono mee t'ẹnya doo ẹphe.
16 Iphe oome kwa tẹ ya
defuta ngu l'iphe-ẹhuka;
dobe ngu l'ẹke ịi-tụsaru ẹhu;
nụ ngu nri, adụje ngu mma.
17 Obenu lẹ nta-a;
bẹ ikpe, e kperu ngu
kwa ikpe, gbaru ẹjo madzụ.
Ọ kwa iswi-ọdu-mma
yẹle ikpe, dụ mma;
bẹ guderu ngu nụ.
18 Kwabẹkwa ẹnya t'ẹ b'ọ
dụ onye e-gude ẹku deru ngu ye.
Be ekwekwa tẹ oke
ẹka-azụ kpuchia ngu ifu.
19 Ẹku ngu ono;
?oo-me t'iphe-ẹhuka ngu laa tọo.
?Tii-gude ike nahụ iya.
20 Ba akpọtakwa iya l'ẹnwa;
mbụ ẹnyashi ono,
aakpụtaje ndiphe kpụfu l'ufu ẹphe ono.
21 Kwabẹkwa ẹnya t'ẹ b'i ye ẹka l'ẹjo iphe;
bụ ọphu, dụ l'ọ ka ngu ntse;
ma l'oje iphe-ẹhuka.
22 Nchileke b'a chiliru ẹka lẹ k'ike iya.
?Bụ onye bụ o-zì-iphe, aa-tụru yeru iya?
23 ?Bụ onye kpọ-zijewaru Nchileke ụzo;
m'ọ kwanu koshi iya l'ọ
kwa ẹke o meru ẹji ndọ-ọ.
24 Nyatakwa kutsee
Nchileke k'ọru iya ono,
ndiphe gụwaru l'egvu
gude kele iya ono.
25 Ndiphe mgburumgburu phụwaru iya.
Aanọdu ụzenya ele iya ole-ẹnya.
26 Mmamiphe ayi te rukwa
l'ẹge Nchileke habe.
To nwe onye a-dụ ike kọta
ẹge ọgurenya iya beru.
27 Ọomikobeje mini l'urukpu;
yọ chịa latsụa lẹ nggele.
28 Igwe -vụa nwa
tsụtsutsu; yọ chịa ụduruku
wụshiru ụnwu eliphe.
29 ?O nweru onye maru
ẹge Nchileke eshije keshia urukpu.
?Bụ onye maru ẹge
ooshije l'ọkpoku iya l'atụ
egbe-igwe kẹ tarara tarara.
30 Phụwaru ẹge o woru
ebemu-igwe doo onwiya
mgburumgburu;
k'ọphu bụ l'ooruje l'ẹbo eze ẹnyimu.
31 Ọ bụ ẹge ono bẹ ooshije
l'eleta ndiphe ẹnya;
l'anụ ẹphe nri;
l'anụ iya k'etsutsu iya.
32 Ọochijeru egbe-igwe l'ẹka;
yọ bụru ẹke ọ gọberu iya;
bẹ ọotuje iya.
33 Ọ bụ edede bẹ oodeje;
gude gbaa ama lẹ mini, abya achịchi.
Eswi, eeche echeche
emejekwaphu t'a maru
lẹ mini abyawa achịchi.”