38
Ojejoje eyeru Jobu ọnu
1 Ya ndono; a nọnyalephu oke phẹrephere awata ephephe. Ojejoje eshi l'oke phẹrephere ono wata oyeru Jobu ọnu; sụ iya:
2 “?Bụ ngụnu b'ị maru
kẹ t'ị bya awata oye ọnu
l'iphe ẹ te dodu ngu ẹnya?
3 Rụkotakwa ẹhu ẹge nwoke arụkotaje;
tẹ mu bya ajịa ngu ajị!
Yejekwaaru mu iya ọnu!
4 ?Bụ awe b'ị nọ teke mu
tọru ntọ-l'alị mgboko?
Karu mu iya; m'ọ bụru l'o doru ngu ẹnya!
5 ?Bụ onye chị-buru ẹge ọo-ha?
?Bụ onye gude ụdo tụa
ẹge ụsa iya a-ha?
6 ?Bụ lẹ ngụnu
b'a kpọbetsuaru ọkpa iya?
?Bụ onye gvuberu itso,
bụ iya gude mgboko;
7 teke ono, e metsuaru;
mkpọ-kpodo nchi-abọhu awata ọgu egvu;
ụnwu ojozi-imigwe
atụlahaa okokooko ono.
8 ?Bụ onye meru t'o nweru
iphe a-nọ-buhu mini
yẹle alị teke ono,
mini lụfutaru l'ọdungu ono?
9 Ọ kwa mubẹ Nchileke
bẹ wotaru urukpu
yee mini ono l'ọ bụ uwe;
bya ewota ọchi, gbaru tsụbalangu
phụ-kpua ya l'ọ bụ ẹkwa;
10 bya akpaaru iya
oke ẹke oo-jebebe;
gude igwe gbaa ya ụpho
mgburumgburu;
kpọ-chia ya;
yeshia ya ibo.
11 Mu asụ mini t'o lekwa
ẹke eyii-mini e-jebebeje;
t'ẹ b'o swejekwa ẹke ono.
12 Jobu; ?ị sụjewaru anwụ
l'ọo teke ọo-hata ndọ-ọ?
?T'ị sụjewaru
ọ-nmẹwa-ụtsu
l'ọo ẹke ọo-nọdu ndọ-ọ?
13 ?Ị sụjewaru
ọ-nmẹwa-ụtsu
t'o je azugude mgboko
jịa ya kpaphukpaphu
jịshia ya ndu eme ẹji?
14 Mgboko l'ophu;
bẹ kpụru rogbodongu
l'ọ bụ ụra, e gude eme iphe-ọhubama.
E dengashia ya l'ọ bụ uwe.
15 Ẹ te kwejedu t'iphoro
nwuaru ndu ẹjo madzụ;
aanashịje ẹphe ike,
ẹphe gude eme ẹnari.
16 ?I jejewaru ẹke
eze ẹnyimu amụ amụmu;
?t'i jejewaru ije
l'ebo eze ẹnyimu?
17 ?E koshijewaru ngu
ọnu-ụzo alị-maa;
?t'i phụjewaru ọnu-ụzo
nwonyonyo anwụhu?
18 ?Ị rị-vujewaru ẹge
mgboko-a habe nshinu?
Ọ -bụru l'ị maru iya;
ngwanụ kfuru mu iya!
19 ?Bụ awe bẹ eeshije eje
l'ufu ẹke iphoro bu?
?Bụ awe bụ ufu kẹ ọchi?
20 ?Ịi-dụ ike dua ẹphe
t'ẹphe laa ẹke ẹphe shitsua?
?Ị maru ụzo, eeshije ala ufu ẹphe?
21 Mu marua l'ị makọtaru
iphe ono l'ọ ha;
keshinu a mụha-oduru
ngu rụ; b'e kederu iphe ono l'ọ ha.
Ị kawanụru nka
kalịhu akalịhu!
22 ?Ị bahụjewaru l'ụlo ẹke
aakụbeje aka-mini;
t'ị phụjewaru ụlo ọphu
aakụbeje mini suno,
23 bụ iphe, mu doberu
kwabẹru oge iphe-ẹhuka;
mẹ oge ọgu.
24 ?Nanụ ụzo ẹke,
anwụ eshije hata;
m'ọ bụ ẹke phẹrephere
ụzo ẹnyanwu-ahata
eshije tsogbaru mgboko?
25 ?Bụ onye waru ọswa
ẹke eze mini eshije teke ọochi;
bya atọoru egbe-igwe ụzo, ooshije;
26 gude iya agba mini
l'ẹke madzụ te budu ebubu;
mbụ l'echi-ẹgu,
ẹ ta dụdu onye bu iya nụ;
27 gude iya mee t'alị,
daburu ochobo,
ẹ ta dụdu iphe, nọ iya nụ
ngụta mini wata ofu ẹwu.
28 Mini ono, igwe achịje ono;
?o nweru nna tọo?
Tọo iji ono, adaje nụ ono;
?bụ onye bụ nna iya?
29 ?Bụ onye bụ nne, mụru
mini ono ejije oyi, nmụa anmụnmu ono?
Iji ono, eshije l'imigwe
adashị ono;
?bụ onye tsụru ime iya;
30 mbụ iji ono, bụ iya
emeje tẹ mini nmaa l'ọ bụ mkpuma;
mekwaaphu t'ebo mini nmaa kpụngu?
31 ?Ịi-dụ-ghe ike kekoo
mkpọ-kpodo, Puleyadesu?
?T'ịi-dụ ike tọshia
mkpọ-kpodo Orayọnu
t'ọ nọdu nanụ nanụ?
32 ?Ịi-dụ ike mee iphe,
bụ mkpọ-kpodo,
nọnu t'ọo fụje l'ògè iya?
?T'ịi-dụ ike dua
mkpọ-kpodo Beya yẹle ụnwu iya?
33 ?Ị maru ekemu,
a tụru doberu iphe, nọtsua l'imigwe?
?Ịi-dụ ike mee tẹ ekemu
ono, achịgbaa iphe, nọ
l'imigwe ono wata ọchi
iphe ọphu, nọ lẹ mgboko?
34 ?Ịi-dụ-ghe ike raa ọra
t'o rua ẹke urukpu nọ;
k'ọphu oo-me tẹ
mini wata ngu anmanma?
35 ?Bụ nggu atụjeru
egbe-igwe ẹke, oo-shi;
o -jede; yọ sụ ngu lẹ ya ejeekwa.
36 ?Bụ onye anụje madzụ egomunggo;
l'emeje tẹ iphe doo ya ẹnya?
37 ?Bụ onye bẹ mmamiphe
iya ha kẹ t'ọ dụ ike gụa urukpu ọgu?
?Bụ onye a-wụshi-ghe
ite-mini, sụtsuaru l'imigwe
38 teke evevee jiru alị;
ụda anmaa anmanma.
39 ?Bụ nggu akpatajẹru nyee agụ nri;
mbụ kpata kpata ọphu
e-ji ụnwu iya ẹpho;
40 teke ẹphe nọ l'ọka ẹphe;
m'ọ bụ teke ẹphe kpuru l'ẹkfukala ẹphe.
41 ?Bụ onye anụje ọphegu nri, oorije;
teke ụnwu iya ararụ yẹbe
Nchileke ẹkwa nri;
tsoru; l'aghaphe achọ nri ono.”