39
1 “?Ịimaje teke eghu-ọswa,
bu l'ugvu amụ nwa iya.
?Ịiphujewaru teke
nne ele amụ nwa iya.
2 ?Ị maru ọnwa ole
ọopaje ẹpho-ime iya.
?Ịimaje teke
ọomu nwa iya gẹdegede.
3 Ọobuje; ọ -bya amụ nwa iya;
yo gbezita egbezita.
Ọ -mụ-gee ya;
ẹhu agụa ya pherengu.
4 Ụnwu iya ono anọdu
l'ime ẹgbudu l'ẹke ono vua; kaa.
Teke ono; ẹphe aparu
nne ẹphe ono haa;
gbakashịhu;
ẹphe ta alaphutahẹdu azụ ọdo.
5 ?Bụ onye haru
nkakfụ-ịgara-ọswa ẹka;
yọo kpaphe;
tọ dụ iphe, eme iya nụ.
?Bụ onye tọshiru iya eri,
e liberu iya; haa ya;
yọ wata akpaphe.
6 Ọ bụ yẹbe Nchileke;
bẹ nụru iya echi-ẹgu ọkponku
t'ọ bụru ufu iya;
bya ahaa alị ono,
bụlephu únú-únú ono
t'ọ bụru ẹke, oo-buru eburu.
7 Wọwowo, anọduje ada lẹ
mkpụkpu adụje iya ẹji;
ọphu ookwejedu t'o
nweru onye a-tuziru iya ẹke, oo-shi.
8 Ọonoduje l'ugvu l'akpa nri;
l'aghaphe achọ
nwiru-ẹgbudu, ọo-taa.
9 Atsụ; ?oo-kwe-e;
jelahaaru ngu ozi.
?Oo-kwe-e radụ l'ẹke iiyejeru anụ nri.
10 ?Ii-dụ-ghe ike tụa ya eri
kpụta t'o jeeru ngu ozi ẹgu;
?Ii-gudeghe iya t'ọ kọoru
ngu ọkori lẹ nsụda.
11 ?Ịi-chị-gheru ụkfu
kwẹe kẹ l'o shihuru ike.
?Ịi-ha-ghe ozi ngu l'ẹke
o shihuru ike;
t'o jeeru ngu.
12 ?Ii-kwe t'o vuta witu ngu;
je edoberu ngu l'ẹke, eetsuje witu.
13 Enyi-nwẹnu anọduje ajị
ẹ́bà iya kpakpakpa;
gude iya l'eku onwiya.
Ọle ẹ tịi tụdu ẹ́bà iya
eyeru ẹ́bà torotoro.
14 Enyi-nwẹnu atụje ẹkwa haa l'eli evevee;
yọ nọdu l'ẹke ono vụa onwiya.
15 Enyi-nwẹnu l'onwiya ta
kpa ishi; kẹ wo;
?ta dzọ-dụ iya nụ ọkpa;
dzọpyaa ya; m'ọ bụ:
?ụnwu anụmanu ta
adzọpyashidu iya nụ.
16 Ụnwu iya bẹ ọonoduje
eme l'ẹ̀phè ta bụdu ụnwu iya;
ọphu ọ kpadu ishi l'akanya,
o seru a-bụru iya kẹ mmanu.
17 Ishi iya abụru lẹ Nchileke
ta nụdu iya mmamiphe;
tọ nụ iya egomunggo.
18 Obenu l'o -wowaru ẹ́bà
iya gbasaa; wata ọgba ọso;
yọ gbasweta ịnya;
mẹ onye agba iya nụ.
19 ?Bụ nggu anụje ịnya ike.
?Bụ nggu gbaru iya nza l'olu;
yọ dụ kẹ nwa yikayika.
20 ?Bụ nggu emeje ịnya
t'ọo kfụ wugowugo l'ọ bụ igube;
ọ -zụa ume;
ndiphe atsụhu egvu?
21 Oogudeje ẹhu-ọtso-ẹna
l'adzọ garamu garamu;
l'eme ẹnari eje l'ifu ọgu.
22 Ịnya ta madụ iphe bụ ọtsu egvu;
tọo lajẹ azụ l'ifu ọgu.
23 Arwa; mẹ akfụ,
ndu l'agba iya nụ chị
anọduje egbu ngerengere;
dọru iya lẹ mgberemẹku.
24 Nkọroshi k'ọgu ono ejije iya ẹhu;
yọ bụru kẹ t'o lee alị
l'ẹke ọokfu atụgbu;
ọphu ọodujedu ike vudo
l'ẹkalanu teke e gburu ụpyoku k'ọgu.
25 E -gbua ụpyoku k'ọgu; yọ kpọ geru-geru.
Ọonodujeru l'ẹke teru ẹnya
kpọ-vu ẹgburu ọgu;
nụa olu ndu ishi sọja;
mẹ mkpu-ọgu, ada nụ.
26 Mbụ; ?bụ nggu ziru ivu
ẹge oo-shije gbasaa ẹ́bà iya l'ephe
ala ụzo ọhuda.
27 ?Bụ nggu ezije ugo t'o
phee oreke-imeli;
je anọdu kpaa ẹkfuna iya
l'ẹke dụ ẹringe-ẹringe.
28 Ẹke oobu bụ l'eli-eli
mkpuma, nọ l'ephekerephe.
Yọ bụru ẹke ono bụ ufu iya.
29 Ọ bụ l'ẹke ono;
bẹ ọonoduje edo iphe oo-ri.
Ọ -nọdujeru ụzenya; phụa ya.
30 Ụnwu iya anọje l'angụ mee.
Yọ bụru l'ẹke odzu nọ;
bẹ yẹbedua anọje.”