40
1 Ojejoje asụkwaphu Jobu:
2 “Nggụbe ọphu atụru
Ọkaribe-Kakọta-Ike okfu;
?bụ nggu a-karu iya iphe, oo-me?
Nggụbe ọphu ebo
Nchileke ibo;
yenuaru iya ọnu nta-a!”
3 Tọ dụ iya bụ; Jobu abya eyeeru Ojejoje ọnu; sụ iya:
4 “M'ẹ tọ dụkwa iphe, ya bụ.
?Nanụ ẹge ya e-shi
agba ngu okfu?
Ya wookwaru ẹka kpuchia l'ọnu.
5 Ọphu ya kfuru edzuwa;
ya te ekfuhekwa ọdo.”
6 Ya ndono; Ojejoje abya anọdu l'ime oke phẹrephere ono kfuru nụ Jobu; sụ iya:
7 Rụkota ẹhu ẹge nwoke arụkotaje;
tẹ ya jịa ngu ajị.
Ya -jịa ngu ajị;
nggu eyeeru iya ẹya ọnu.
8 ?Ịi-sụ lẹ yẹbe Nchileke te
ekpejedu ikpe, dụ mma tọo.
?Iime t'ị nma iya ikpe;
k'ọphu ikpe a-laru nggụbedua tọo.
9 Ike ngu;
?ọ ha l'ọ bụ kẹ Nchileke.
Olu ngu; ?oo-deghe
igidi l'ọ bụ nk'iya.
10 Ngwaa; gudenu
o-gbu-nwịi-nwịi
gude ọdu-biribiri
kwaa onwongu ngwa!
Nggu ewota ugvu;
wota onweru ẹnya yee
onwongu l'ọ bụ uwe!
11 Vụa ọvuma gude koshi
ẹge iphe eghutabe ngu eghughu!
Lemua iphe bụ ndu eku
onwẹphe ekuku;
lọ-tsuta ẹphe;
12 Lenua iphe bụ ndu eku
onwẹphe ekuku;
mee ẹphe t'ẹphe gọo!
Tụko iphe bụ ndu eme
iphe, dụ ẹji dzọ-byashia
l'iphe bụ ẹke ẹphe nọ!
13 Chịkobe ẹphe lia l'ẹkalanu;
nggu egude ẹkwa-odzu
kechishia ẹphe ifu l'ili.
14 Ono teke ya e-kweta l'ọo
nggụbe Jobu b'ọ laru.
15 Lenua oke anụ ono;
mbụ Enyi-mini.
Ọ bụ yẹbedua keru iya;
bụkwaru iya phụ keru nggụbe Jobu.
Enyi-mini ata ẹwu l'ọ bụ eswi.
16 Ọ bụ; lewaru egbe ike, nọ iya l'ukfu;
nggu elewaru egbe ike,
nọ iya l'akwara ẹpho!
17 Ọdzu iya akfujẹru l'ọbu oshi sida.
Ájị, nọtsua ya l'ụtakfu
kparu onwiya akpakpa.
18 Ọkpu iya bụ mkpụrukpu ope b'ọ bụ.
Oshi-ọkpa iya abụru mgbọro-ígwè.
19 Ọ bụ iya katsụa nshinu
l'iphe bụ iphe,
Nchileke keru ekeke.
Obenu lẹ yẹbe Nchileke kalẹ iya-a ike.
20 Ọonoduje l'eli ugvu l'ata nri;
ụnwu anụ ndu ọphu anọdu
l'iku ẹke ono l'egvu egvu.
21 Ọozeje lẹ mkpuli oshi lotusu;
rụ-mia onwiya l'ime ẹswa, nọ l'ụda ẹke ono.
22 Oshi lotusu ono egudeje agu iya domia ya;
ẹkali-oshi wilo anọ-phee ya mgburumgburu.
23 Ẹ tọo tsụdu egvu eyii-mini;
m'o -ruhuru;
Ẹnyimu Jọ́danu byaa utso
dụ-kfuru iya l'ọnu.
24 ?Bụ onye a-dụ ike gude enyi-ọswa.
Ẹ ta anmatajẹkwa iya l'ọnya;
ta swọfu-ghe iya imi?