143
Egvu-ọma, Dévidi deru
1 Nggụbe Ojejoje;
nụnua ekfukfu, mu ekfu anụ ngu.
Ngabenu nchị; nụa mkpu,
mu echi; phụaru mu imiko.
Keshinu ị bụ onye
doberu ẹka ndoo;
bụru o-me-g'o-kfuru;
zanụa mu oku!
2 Byiko; be ekpekwa mụbe nwozi ngu ikpe;
kele ẹ tọ dụdu madzụ,
nọ ndzụ, doberu ẹka ndoo l'ifu ngu.
3 Onye ọhogu mu chịru mu gude mu tụa l'alị;
bya emee mu; mu anọdu
l'ẹke gbakọtaru ọchi;
l'ọ bụ ndu nwụhuru
anwụhu teke ndiche.
4 Ọ bụ iya meru iphe ike
wataru mu agvụgvu;
obu awata mu ọku akụku.
5 Mu nyataru ẹge o shi adụje teke ndiche.
Mu abya anọdu;
rịlahaa iphe i mekotaru ayi l'ọ ha;
bya elefua ẹnya l'iphemiphe ọbule,
i gude ẹka ngu mee.
6 Mu achiliaru ngu ẹka mu labụ l'imeli.
Obu ngu emelahaa mu
ẹge ono, ẹgu mini anọduje
agụ alị-ọkponku ono.
7 Zanụa mu oku ẹgwegwa; nggụbe Ojejoje;
l'ike gvụakwaru mu.
Be edomikwa onwongu l'ẹke mu nọ.
Ọdumeka; bẹ mu lẹ ndu,
a tụwaru ẹja a-bụkwaru nanụ.
8 Tẹ nchi-abọhu bọtaru mu
okfu, a-nọdu akọru mu kẹ n-yemobu ngu;
kẹ l'ọ bụ nggu bẹ mu dakoberu.
Byiko; koshinu mu ụzo,
mu e-shi;
kẹ l'ọ bụ ẹke ị nọ bẹ obu mu nọ.
9 Nafụtanu mu l'ẹka ndu
ọhogu mu phẹ; nggụbe Ojejoje;
kẹ l'ọ bụ l'ime ngu; bẹ mu domiru onwomu.
10 Zinua mu iphe bụ uche-obu ngu tẹ mu meje;
kẹ l'ọ bụ nggu bụ Nchileke mu.
Menua tẹ Ume ngu,
bụ Ume ọma duru mu shia
ụzo, vudo nhamụnha.
11 Gudenu k'ẹpha ngu; nggụbe Ojejoje;
mee tẹ ndzụ dzua mu.
Gudenu odobe-ẹka-ndoo
nke ngu nafụta mu
l'iphe-ẹhuka-wa, mu eje-wa.
12 Gudenu kẹ n-yemobu ngu;
mee tẹ ire kpụru ndu ọhogu mu l'ụga.
Nggu atụko iphe bụ ndu
achị mu nụ l'ẹphe ha mee
t'ẹphe bụru kpurupyata;
kẹle mu bụ onye ejeru ngu ozi.