5
Sa Moyses kan Aaron do Salapen ni Paraon
1 Sinpangan na, nangay sa Moyses kan Aaron di Paraon, as nakabata da sya dya a kon da, “Nyaw bata ni ĀPO a Dyos no Israel a kāna, ‘Palobōsan mo sa komaro tawotawo kwaya tan makapamarin sas pista a pangidaydāyaw dyaken do let-ang.’ ”
2 Ki binata ni Paraon a kāna, “Ta sino kono nawri a ĀPO a machita ko adngeyen kan palobōsan ko saw Israelitaya komaro? Chapatak kwabaw nawri a ĀPO, kan palobōsan ko saba komaro Israelita saya.”
3 Tinbay da a kon da, “Namna, nagparang danaw dyamen no Dyos daya no Hebreo. Changori, palobōsan mo pa yamen a manakey so tatdo a karaw a komwan do let-ang tan mangidāton kami so binyay saw di ĀPO a Dyos namen, ta āngwan dimanen na yamen do ganyit mana do ispāda.”
4 Ki binata no āryaw do Egipto a kāna, “Inyom Moyses kan Aaron ah, āngo ta ikaro nyo saw tawotawo saya do tarabāko da? Samna, maybidi kamo na do tarabāko nyo!”
5 Binata dana ni Paraon a kāna, “Chiban nyo pa. Siraw tawotawo saya a Israelita, ki reprep dana sa, as pabhesen nyo sa maytarabāko!”
6 Do dāwri lang a araw, inbilin ni Paraon dyirad taga-mandar saw a taga Egipto a nangadīpen sira kan siraw Israelita saw a mangidaōlo so tarabāko a kāna,
7 “Makayapo changori, torohan nyo pa sabaw tawotawowaw so garami a pamarin das ladrilyo. Nolay nyo sa mangay a mangpeh so bōkod da garami.
8 Ki no bidang no ladrilyo a ipapaparin nyo, ki machita a nāw no bidang na kan do kachwaw. Maypadēkey aba ah! Masadot sa ngamin, dawa, itanyis da a batahen da a kon da, ‘Palobōsan mo yamen a mangay a mangidāton do Dyos namenaw.’
9 Parahmeten nyo tarabāko dyirad mahahakay saw tan nāw da maytarabāko kan maikāso da sabaw bayataw saw a chirichirin.”
10 Dawa, nangay saw taga-mandaraw kan siraw mangidaōlwaw so tarabāko dyirad tawotawowaw, kan binata da dyirad Israelita saya a kon da, “Nyaw bata ni Paraon a kāna, ‘Torohan namen paba kono inyo so garami.
11 Inyo danaw mangay a maychichwas so garami do aran dino a pakadongswan nyo. Ki machita a nāw no bidang no matayoka nyo a ladrilyo. Maypadēkey abaw tarabāko nyowaya!’ ”
12 As dawa, naychawpit saw tawotawowaw do aran dino do Egipto a mangpeh so garami.
13 As siraw taga-mandar saw, ki kalokalohen da sa, kan batahen da a kon da, “Machita patayokahen nyo naibaheyaw do kāda araw a akmas kayan paw no garami nyo.”
14 Ki siraw mangidaōlwaw so tarabāko a Israelita a tinongdo da no taga-mandar saw ni Paraon, ki binabaōtan da sa, kan inyahes da dyira a kon da, “Āngo ta napahtot nyo abaw bidangaw no ladrilyo a pahtoten nyo kakoyab kan sicharaw a akma do kachwaw?”
15 Maynamot ta komwan, nangay saw mangidaōlwaw so tarabāko a Israelita di Paraon, kan intanyis da a kon da, “Āngo ta komwan parinen mo dyamen a adīpen mo?
16 Abayaw garami a naitoroh dyamen a adīpen mo, ki naibahey dyamen a mamarin kamis ladrilyo! Binaōtan da yamen a adīpen mo, ki no akin gatos, ki siraw tawotawo mo saw a mismo.”
17 Binata ni Paraon a kāna, “Sadot! Masadot kamo! As dawa, pirmi nyo a iyahes, ‘Palobōsan mo yamen a mangay a mangidāton di ĀPO.’
18 Ngay, maybidi kamo na a maytarabāko! Matorohan kamo abas garami, ki machita nyo a pahtoten parihas a bidang no ladrilyo a maparin nyo.”
19 Do dāwri, natonngan dan mangidāolo saw a Israelita a madi danaw kayayan da do nakaibahey daw sya dyira a kon da, “Machita dya maypadēkey bidang no ladrilyo a pahtoten nyo do kāda araw.”
20 Do nakakaro daw di Paraon, nadongso da sa Moyses kan Aaron a mangnanaya dyira.
21 Binata da dyirad dadwaya a kon da, “Si ĀPO pakono chiban naw kaparin nyowaya kan okomen naynyo! On, ta inyo naynamotan na a ipsok narana yamen ni Paraon kan siraw opisyalis na saw. Akmay tinorohan nyo sas ispāda a idiman da dyamen.”
No Kapaynonohed ni Moyses di ĀPO
22 Nachisisirin dana si Moyses di ĀPO, kan binata na a kāna, “O ĀPO, āngo ta nangyangay kas riribok dyirad dya a tawotawo? Āngo ta tinoboy mo yaken?
23 Nakayapo pa do nakangay kwaw di Paraon a nangibahey so pinakachirin mo, linidyalidyat narana saw nya tawotawo, kan ari paya abo pinarin mo tan maidichan sa.”