6
1 Ki binata ni ĀPO di Moyses a kāna, “Sichangori, maboya monchiw parinen ko di Paraon. Maynamot do panakabalin ko, pahtoten na sanchiw tawotawo kwaya a komaro. On, maynamot do panakabalin ko, paksyaten na sanchi do tana naya.”
2 Binata pa ni ĀPO di Moyses a kāna, “Yaken si ĀPO a Yahweh.
3 Nagparang ako di simna Abraham, Isaak, kan Jakob. No chapatak da dyaken, ki Dyos a Manakabalin do Tābo. Iyaw ngaran ko a Yahweh, ki inpakatoneng kwaba dyira.
4 Nachitōlag ako pa dyira a itoroh ko dyiraw tanaw a Kanaan a naybibyayan da a gan-ganaet.
5 Narohnwan pa a nadngey ko āsog daya no Israelita saya a inadīpen dan taga Egipto saya, kan nanakem ko nakapachitōlag kwaw.
6 “As dawa, ibahey mo dyirad Israelita saya a kon mo, ‘Yaken si ĀPO a Yahweh, kan ikaro konchi inyo do pangrahmet daya dyinyo no taga Egipto saya. Wayawayaan konchi inyo do nakaadīpen daya dyinyo, as kan sobboten konchi inyo do panakabalin ko kan mangitopak akonchi so makamwamomo a dōsa dyira.
7 On, ahapen koynyo a mismo a tawotawo ko, as kan yaken anchiw Dyos nyo. As do dāwrinchi, mabigbig nyo a yaken si ĀPO a Dyos nyo a nangikaro dyinyo do nanglidyalidyat dyinyo a taga Egipto.
8 Iyangay konchi inyo do tanaw a insapata ko a itoroh di simna Abraham, Isaak, kan si Jakob. Itoroh konchi dyinyo a dyira nyo. Yaken si ĀPO a Yahweh.’ ”
9 Inbahey ni Moyses nyaya dyirad Israelita saw, ki inkaskāso daba a maynamot do kaop-ōpay darana kan do taywaraya a nakaranggas da a nangadīpen dyira.
10 Do dāwri, binata ni ĀPO di Moyses a kāna,
11 “Ngay, yangay mwa ibahey di Paraon a āri do Egipto a palobōsan na saw Israelita saya komaro do tana naya.”
12 Ki tinbay ni Moyses si ĀPO a kāna, “Katen mo ĀPO, ta an dyi da yaken a inadngey no Israelita saya, maypāngo a adngeyen na yaken ni Paraon a masalanga akwaya a maychirin?”
13 Do dāwri, nachisisirin si ĀPO di Moyses kan Aaron a maynamot dyirad Israelitaw kan si Paraon a āri do Egipto, as kan minandaran na sa a ihtot da saw Israelitaw do Egipto.
Siraw Kapoonan Da Moyses kan Aaron
14 Siraw nyaw kapoonan a pangrogyan dan partīdos da Moyses.
Siraw pōtot a mahahakay ni Ruben a matoneng a pōtot ni Israel, ki sa Hanoch, Pallo, Hesron, kan Karmi. Siraw nya, ki kapoonan dan partīdos ni Ruben.
15 Siraw pōtot a mahahakay ni Simeon, ki sa Jemwel, Jamin, Ohad, Jachin, Sohar, kan Sawlo a anak no taga Kanaanaw a mabakes. Siraw nya, ki kapoonan dan partīdos ni Simeon.
16 Siraw nyaw ngaran dan pōtot a mahahakay ni Lebi sigon do listaan da: Gerson, Kohat, kan Merari. Nabyay si Lebi so 137 a katawen.
17 Siraw pōtot a mahahakay ni Gerson, ki sa Libni kan Simey a kapoonan dan partīdos da.
18 Siraw pōtot a mahahakay ni Kohat, ki sa Amram, Isar, Hebron, kan Ossiel. Si Kohat, ki nabyay so 133 a katawen.
19 Siraw pōtot a mahahakay ni Merari, ki sa Mahli kan Mosi. Siraw nya, ki kapoonan dan partīdos ni Lebi sigon do listaan da.
20 Si Amram, ki kinabahay naw kaktehaw ni āmang na mabakes a si Jochebed. Inyanak na si Aaron kan Moyses. Si Amram, ki nabyay so 137 a katawen.
21 Siraw pōtot a mahahakay ni Isar, ki sa Kora, Nepeg, kan Sikri.
22 Siraw pōtot a mahahakay ni Ossiel, ki sa Misael, Elsapan, kan Sitri.
23 Si Aaron, ki kinabahay na si Eliseba a anak ni Amminadab kan kakteh ni Nahson. Inyanak ni Eliseba sa Nadab, Abiho, Eleasar, kan Itamar.
24 Siraw pōtot a mahahakay ni Kora, ki sa Assir, Elkana, kan Abiasap. Siraw nya, ki kapoonan dan partīdos ni Kora.
25 Si Eleasar a pōtot a mahakay ni Aaron, kinabahay naw asaw dyirad pōtotaw ni Potiel, kan inyanak na si Pinehas.
Siraw nyaw kapoonan a pangrogyan dan partīdos ni Lebi.
26 Sira met lang nya a Aaron kan Moyses nangibaheyanaw ni ĀPO a kāna, “Ikaro nyo saw Israelitaya do Egipto, kan ornosen nyo sa sigon do trībo da.”
27 Sira paw nangibaheyaw di Paraon a āri no Egipto so maynamot do kaikaro daw siras Israelita saw do Egipto. On, sira oyod sa Moyses kan Aaron.
No Bilin ni ĀPO Da Moyses kan Aaron
28 Do dāwri a araw a nakapaychirin ni ĀPO di Moyses do Egipto,
29 binata na dya a kāna, “Yaken si Yahweh. Ibahey mo di Paraon a āri no Egipto tabo a ibahey ko dyimo.”
30 Ki tinbay ni Moyses si ĀPO a kāna, “Aysa mo ĀPO! Masalanga akwaya a maychirin. Maypāngo a adngeyen na yaken ni Paraon?”