2
1 Mangay ako a magpwisto do pagbantayan kwaya,
kan nāw ko a mangnanaya do lalawong kwaya.
Chichiban ko an āngo ibahey nanchi ni ĀPO dyaken,
kan an āngo atbay konchi do kapaynonohed kwaya dya.
No Atbay ni Āpo di Habakkok
2 Sinpangan na, inatbay na yaken ni ĀPO a kāna,
“Itolas mo paltiingaya.
Kalawagen mo do matatāpi saw a bato
tan maydamnay a basāen a aran tod a mapaldyapan.
3 Katongpal no paltiing, ki nayahen na do kosto a ōras.
Makalo a komwan do pandan. Maybayataw aba.
Aran akmay mahay, ki panayahen mo,
ta sigorādo a mangay anchi kan maybabalay aba.
4 “Nyaw naipaltiing: ‘No tawo a dya malinteg, ki makalāsat abanchi.
Ki no tawo a malinteg, ki mabyay anchi do kapanganohed na.’
5 Kaoyodan na, ki lipotan iya no palek.
No tawo a makawag, ki makasakasayid aba.
Maynamot do kaāgom na a akmay tanem,
kan akmay kadiman a dya mapnek,
sakōpen na sa tabo nasnasyonaw,
kan adīpenen na tabo saw tawotawowaw.
6 “Chamimyeng danchi iyaw nangābakaw sira. Oyawen danchi iya a kon da,
“ ‘Kapakāsi pa no nangopwaw so tinakaw
kan bomnaknang a yapo do kinakōsit a ganansya!
Maypāngo paro pas kahay nyaya?’
7 Nyiknyīnan a maytēnek saw nakaōtangan mwaw.
Mayokay sanchi kan pamirpiren danchimo,
as akma kanchis warawaraw a samsamen da.
8 Maynamot ta sinamsaman mo saw āro a nasnasyon,
tabo nahabas mo saw, bahsen danchimo a samsaman,
ta napawyog kas rayan tawo, kan rinanggasan mo tana
do kāda syodad kan tabo a omyan dyira.
9 “Kapakāsi pa no bomaknang so pamilya do karahet
tan mapatnek so bahay na akmay agila do tohos
tan dya maan-ano no didigra.
10 Iyaw kasīkap mo, nangasnesnek do pamilya mo.
Do nakapayrārayaw mos nasnasyon,
tod mo na inparawat byay mo.
11 Aran bato saw do ahad, ki mangagagay sa.
Komwan saw wananaw, payyengen da kontra dyimo.
12 Kapakāsi pan mapatnek so syodad do rayan tawotawo,
kan mapatnek so idi maynamot do karahet.
13 Ipaboya abawri ni ĀPO a Manakabalin do Tābo
no paylilidyatan tawo, ki tod a irotong do apoy,
kan siraw nasyon, ki tod sa mayhohopag do abos sīrbi?
14 Ki mapnonchiw tanaya so kapakatoneng no dayag ni ĀPO
a akmas kalapōnos no tāw so tana.
15 “Kapakāsi pa no mapaynom siras karoba na
so akmas dīta na kan boken na sa
tan maboya naw silalābos a inawan da.
16 Mabsoy kanchi do asnek, dāyaw aba.
Sichangori, machitādi ka minom, kan ipaboya mo a dyi ka nakogit!
Iyaw kopa a pangdōsa ni ĀPO do kawanan a tanoro na,
ki romapit anchi dyimo, kan minom kanchi,
as kan asnek taloban nanchiw dāyaw mo.
17 No kinarangas mod Lebanon, ki mangbahes anchi dyimo.
No nakapisti mwaw siras binyay, ki mangamomo anchi dyimo,
ta pinaytetedted mo rayan tawotawo,
kan rinanggasan mo tanatana, siraw syodad,
kan tabo a omyan dyira.
18 Āngo pateg no bolto a tod a kinitikītan no tawo,
mana didyosen a mangnanawos bayataw?
Ta iyaw mangkitikitaw sya, masaray do pinarswa naw
a aran mamarin so dya makapaychirin a bolto.
19 “Kapakāsi pa no mangibahey do kayo a bolto a kāna,
‘Mayokay ka!’
Mana do dya makapaychirin a bato a kāna,
‘Maytēnek ka!’ Makaipaltiingori?
Napakalopkopan so balitok kan pirak,
kan polos abaw anges na.
20 Ki si ĀPO, ki myan do masantwan a Timplo na.
Tabo saw omyan do tanaya, magolimek pakono do salapen na.”