3
No Dasal ni Habakkok
1 Nyaw dasal ni propīta a si Habakkok sigon do Sigionot.
2 O ĀPO, nadngey ko maynamot dyimo.
Chasdāaw ko pinariparin mo, mo ĀPO.
Pirwahen mo pa changoriw kaparin mo saw do nakarahan.
On, do kachimpo namenaya, ipakatoneng mo sa.
Do kapakasoli mo, kanakmen mo māsi.
3 Si Āpo Dyos, ki mangay a yapo do Teman,
kan iyaw Masantwanaw, ki yapo do Tokon a Paran.
Iyaw dayag na, ki taloban na saw kahanyihanyitan.
No kaidaydāyaw na, ki apnohen naw tanaya.
4 Iyaw ranyag na, akmay domada araw,
kan gomilap chinyel na sa a yapo do tanoro na
a nakaitaywan no bīleg na.
5 Tinoboy naw pisti a manmanma kan iya,
kan minandaran naw kadiman a somarono dya.
6 Do nakapaytēnek naw, ginoyogoyon naw tanaya.
Do nakaydit naw, pinaychamirpirpir na saw nasyon.
Sinpangan na, naphaphas saw manayon saw a tokon.
Naloyo saw adanaw a katokotokonan.
Siraw kaparin na, ki abos pandan.
7 Naboya ko lidyat dan taga Kosan a omyan do tolda,
kan kapamirpirpir dan omyan do tana no Midyan.
8 Isoli mo sawriw oksong saya mo ĀPO,
mana pangahoya moriw tāwaya
do nakasakay mo do kabalyo mo saya
do logan mwaw a nangyangay so ballīgi?
9 Insagāna mo naw bai mwaw a maosar,
kan inpalka mo na saw pana mwaw.
Ok-oksong, ki pinamaychakarwa mo so tanaya.
10 Do nakaboya da dyimo, namirpirpir saw tokon,
mawyas chimoy a yapo do kademdeman,
komalebkeb ranom do irahem no tanaya,
as kan makatotohos allon da.
11 No araw kan bohan, ki nagsardeng sad kademdeman
do gilap no kasayap no pana mo saya,
do kimat no kasileng no chibot mo.
12 Nakasoli ka a nagmarcha a nagkelsat do tanaya.
Do kasoli mo, ki tinokapan mo saw nasyon saya.
13 Nangay ka a nangispal siras tawotawo mo
do kaisalākan mo so pinidi mo.
Pinita mo pangōlo daw no marahet saya.
Rinārayaw mo saw mononot dya.
14 Binalsot no pana mo saw komander no bōyot na
do kangay na akmay alipogpog a mapawpit dyamen.
Chasoyot na a akmay makey a sangraben saw mapobri a sililimed.
15 Inpatokatokap mo tāw dyirad kabalyo mo saya
a nangkibor so mabīlegaya a ranom.
16 Do nakadngey kwaw syay, naychamirpir ako.
Namirpir bibi ko do ōni naw.
No tohatohang ko, ki akmay nahta dana,
kan naydodokdok tod ko saya.
Alit na, panayahen konchi a siaānos arawaw no didigra
a mangay dyirad tawotawo a mangraot dyamen.
17 Aran abo bosel no igos a kayo,
kan aran abo asi no ōbas,
aran abo maāpit a asi no olibo,
kan abo maāpit do hakawan,
aran abo danaw karniro do pasto da,
kan abo danaw bāka do koral da,
18 ki alit na, chasoyosoyot konchi si ĀPO.
Charagsak konchiw Dyos a mangisalākan ko.
19 Si Āpo a DYOS ko, ki iyaw ayit ko.
Payparinen na yaken a makalsit a akmay ogsa.
Sidongan na yaken a mayam do matohos sa a yanan.
Para do mangidaōlo so mosika. Osaren mo pagtokaran saw a myan so kordas.