18
Si Elyas kan Obadyas
1 Homnabas chimpo, do chatatdo naw a katawen no tīkag, inpakatoneng ni ĀPO chirin naw di Elyas a kāna, “Mangay ka magparang di Āri Ahab, kan pachimoyen konchi do tana.”
2 Dawa, nangay si Elyas a nagparang di Ahab.
Do dāwri, iyaw kapaychapteng, ki taywara do Samarya,
3 kan inpatawag ni Ahab si Obadyas a iyaw manyidechidebaw so palasyo na. (Si Obadyas, ki mapodno a managdaydāyaw di ĀPO.
4 Do kapangdimanaw ni Reyna Jesebel siras propītaw ni ĀPO, inhap sa ni Obadyas asa gasot saw a propīta, kan intayo na sa do dadwa a aschip. Pinangay naw dadima poho do kāda aschip, as kan inyangangayan na sa so mākan kan ranom da.)
5 Binata ni Ahab di Obadyas a kāna, “Mangay ka do intīrwaya tana do tabo a ok-oksong kan payapayahosongan. Ara kanchi a makachichwas so tametamek a mangbyay siras kabalyo kan molo saya tan dyi ta makadiman so aran āngo dyirad animal ta saya.”
6 Dawa, naycharwan daw tanaw a paychichwasan da. Nangay si Ahab do mangket do asa a rarahan, kan nangay si Obadyas do mangket do bīt.
7 Do kadamaw ni Obadyas a mayam, binayat ni Elyas, ki nailāsin ni Obadyas. Dawa, nagrōkob do tana, kan binata na a kāna, “Oyodori a imo si āpo ko a Elyas?”
8 Inatbay na a kāna, “Na, yakenaw. Yangay mo a ibahey di āmo mo a kon mo, ‘Si Elyas, ki ari dya!’ ”
9 Inyahes ni Obadyas a kāna, “Āngo gatos ko tan iparawat mo yaken a pachirawatan mo di Ahab a mangipadiman dyaken?
10 Akmas kasibibyay ni ĀPO a Dyos mo, abaw aran asa nasyon mana pagāryan a dya naychichwasan ni āmo ko dyimo. As an myan nasyon mana pagāryan a nangibahey a abo ka daw, pinagsapata na sa a dyi daymo a nachichwasan.
11 Ki sichangori, ibahey mo dyaken a mangay ako di āmo ko kan ibahey ko dya a kon ko, ‘Ari dya si Elyas.’
12 Chapatak kwaba an dino pangyangayan no ispirito ni ĀPO dyimo anchan karwan koymo. An yangay ko a ibahey di Ahab, kan dyi naymo a machichwasan, dimanen nanchi yaken. As yaken a pachirawatan mo, ki managdaydāyaw ako di ĀPO nakayapo do kaadekey ko.
13 Naipadāmag abawri dyimo mo āpo ko, an āngo pinarin ko do kapangdimanaw ni Jesebel siras propītaw ni ĀPO? Intayo ko saw asa gasot a propīta ni ĀPO do dadwa aschip, taydidima poho do kāda aschip, kan inyangangayan ko sa so mākan da kan ranom da.
14 As sichangori, ibahey mo dyaken a mangay ako do āmo kwaw kan batahen ko a kon ko, ‘Ari si Elyas dya.’ Dimanen nanchi yaken ah!”
15 Binata ni Elyas a kāna, “Akmas kasibibyay ni ĀPO a Manakabalin do Tābo a pagsīrbyan ko, syirtwen ko a magparang ako di Ahab sichangori a araw.”
Si Elyas do Tokon a Karmel
16 Dawa, nangay si Obadyas a nachibayat di Ahab kan inbahey na dya. Do dāwri, nangay si Ahab a nachibayat di Elyas.
17 Do nakaboya naw si Elyas, binata na dya a kāna, “Oyodori a imo a mangriribok so Israel?”
18 Initbay ni Elyas a kāna, “Yaken abaw mangriribok so Israel, an dya imo kan pamilya ni āmang mo, ta sinyay nyo saw bilbilinaw ni ĀPO. As imo, ki mononot ka dyirad Baal.
19 Changori, patawagan mo tabo tawotawo saw no Israel a machibayat dyaken do Tokon a Karmel. Iyangay mo apat saw a gasot kan dadima poho a propīta ni Baal kan siraw apataw a gasot a propīta ni Asera a siraw machakanaw do lamisaan ni Jesebel.”
20 As dawa, pinatawag ni Ahab tabo tawotawo no Israel kan siraw propītaw a maychichipeh do Tokon a Karmel.
21 Nangay si Elyas do salapen daw no tawotawo, kan binata na a kāna, “Maypāngo pas kahay kapakaskaspi no kayam nyo do dadwa a pangtoktwan? An si ĀPO, ki Dyos, onotan nyo pakono ah. Ki an si Baal, sigi monot kamo dya.”
Ki inatbay daba no tawotawo a aran asa lang a chirin.
22 Do dāwri, binata ni Elyas dyira a kāna, “Yaken danayaw moyboh a natokos dyirad propīta ni ĀPO, ki myan paw apat a gasot kan dadima poho a propīta ni Baal.
23 Mangyangay kamo pa dyamen so dadwa tōro a bāka. Nolay ta sa a mamidi so asa para dyira, kan partyen da a aktekteben, as kapalapaw da sya do kayo, ki byayan daba. As yaken, ki isagāna konchi met asaw a tōro a bāka, kan palapawen ko do kayo, kan byayan kwaba.
24 As tawagan nyo ngaranaw no dyos nyo, kan tawagan ko ngaranaw ni ĀPO. No Dyos a mangatbay so apoy, iyaw oyod a Dyos.”
Do dāwri, binata dan tabo tawotawo a kon da, “Maganay binata mwaya.”
25 Binata ni Elyas dyirad propītaw ni Baal a kāna, “Mamidi kamo so asa dyirad dadwaya tōro a bāka, kan isagāna nyo a manma, ta āro kamo. Tawagan nyo ngaranaw no dyos nyo, ki byayan nyo aba so apoy.”
26 Dawa, inhap daw tōrwaw a naitoroh dyira kan insagāna da.
Do dāwri, tinawagan daw ngaranaw ni Baal a nangrogi do kamabekas a manda do kayegen no araw a inngēngengey da a kon da, “O Baal, atbayen mo pa yamen!” Ki abaw tīmek. Abaw mangatbay. Tomnatāda sa a naypaypadibon do altaraw a pinatnek da.
27 Do kayegenaw danaw no araw, inrogi sa ni Elyas a kanchawan a kāna, “Kayitan nyo paw mangēngey! Oyodaya a asa dyos si Baal! Āngwan ari a mangtokto so marahem, mana nabalabalay, mana nagbyahi, mana ari a makaycheh kan machita na yokayen.”
28 Dawa, pinaypaypalyak da paw nangēngengey. As sigon do dadakay da, tinagataga daw inawan da so imoko kan chibot manda do nakawyog no raya da.
29 Katayokaw no kayegen araw, tinongtong daw nagpadto a magam-amangaw manda do ōras dana no kapangidāton da do kamahep. Ki aba polos tīmek. Abaw mangatbay. Abaw nangikaskāso.
30 Do dāwri, binata ni Elyas dyirad tabo tawotawo a kāna, “Maypasngen kamo dyaken.” Naypasngen sa dya, kan kinapya naw altar naw ni ĀPO a narakrak.
31 Inhap ni Elyas asa poho saw kan dadwa bato, kan tayisa do kāda trībo do kapotōtan ni Jakob a iya nangipakatonngan ni ĀPO so chirin naw a kāna, “Si Israel, ki ngaran mo.”
32 Inosar ni Eliyas nya sa a bato a napatnek so altaraw do ngaran ni ĀPO. Do omdibon no altaraw, naychadi so kanal a makahap so makalo a apat a kagalon a ranom.
33 Inornos naw kayowaw do altaraw, pinarti naw tōrwaw, as nakaktekteb na sya, kan pinalapaw na do kayowaw. Binata na dyira a kāna, “Apnohen nyo saw apataya angang so ranom, kan padohen nyo do dātonaya a masosohan kan do kayowaya.”
34 Binata narana a kāna, “Pirwahen nyo pa.” Ki pinirwa da pa pinarin.
“Pitdwen nyo pa,” inbilin na, kan tinongpal da.
35 Minoyog ranomaw do omdibonaw no altaraw, kan inapno na paw kanalaw.
36 Do ōras danaw no kapangidāton, naypasngen si Elyas a propīta kan naydasal a kāna, “O ĀPO a Dyos ni Abraham, Isaak, kan Israel, ipakatoneng mo pa sichangori a araw a imo, ki Dyos no Israel. Ipakatoneng mo pa a yaken, ki pachirawatan mo, kan pinarin ko tabo nyaya a maynamot do bilin mo.
37 Atbayen mo pa yaken mo ĀPO. Adngeyen mo pa yaken tan mapatakan dan nyaya tawotawo a imom ĀPO, ki Dyos, kan imo iyaw mangipabidi so pōso da dyimo.”
38 Do dāwri, sinday ni ĀPO apoy na, kan tinemtem naw dātonaw, kayowaw, bato saw, kan sinosohan naw tanaw, as kan yinachan naw ranomaw do kanalaw.
39 Do nakaboya daw no tabo tawotawowaw so nyaya, naysasakeb sa do tana, kan tomnanyis sa a kon da, “Si ĀPO, ki iyaw Dyos! Si ĀPO, ki iyaw Dyos!”
40 Sinpangan na, binilin na sa ni Elyas a kāna, “Tiliwen nyo saw propītaw ni Baal. Palobōsan nyo abaw aran asa makapayyayo!” Do dāwri, tiniliw da sa, kan inpayosok sa ni Elyas do Payahosongan a Kison, as kan inpadiman na sa daw.
41 Sinpangan na, binata ni Elyas di Ahab a kāna, “Maybidi ka na a koman kan minom, ta ariw kalebkeb no mawyas a chimoy.”
42 Dawa, komnaro dana si Ahab a nangay a komninan kan mininom. Ki somnonget si Elyas do tōtok naw no Tokon a Karmel. Nagrōkob do tana, kan pinangay naw rōpa na do payawanaw no dadwaw a tōd na.
43 Sinpangan na, binata na do pachirawatan naw a kāna, “Mangay ka kan chiban mo do mangket do tāw.” Ki nangay kan chiniban na.
“Abayaw aran āngo daw,” binata na.
Naypitdo a binata dya ni Elyas a kāna, “Maybidi ka.”
44 Do chapapito naranaw a nakangay na, inpadāmag no pachirawatan naw a kāna, “Aryaw dēkey a demdem a akmaw kakamay no tawo so karakoh a maypatohos do tāw.”
Dawa, binata ni Elyas a kāna, “Yangay mwa ibahey di Ahab a kon mo, ‘Isagāna mo logan mo, kan mosok ka na tan dyi naymo a penpenen no chimoy.’ ”
45 Nahay aba, nanyibaheng konemaw, naysasalawsaw, kan myan danaw mawyas a chimoy. Naglogan si Ahab a somnabat do Jesreel.
46 Pinabīleg ni ĀPO si Elyas. Inbarīkis ni Elyas kagay naw, as nakapayyayo na kan pinanman na si Ahab do Jesreel.