19
Nayyayo si Elyas a Nangay do Horeb
1 Do nakasabataw ni Ahab, inbahey na di Jesebel a baket na tabo a pinarin ni Elyas kan maypāngo nakadiman na siras tabo propītaw ni Baal do ispāda.
2 Do dāwri, nanoboy si Jesebel so mangay di Elyas a mangibahey sya a kāna, “Dosāen da pakono yaken no dyos saw so taywara an dyi kwa kakmahen byay mo a akmas pinarin mwaya do asa dyirad propīta saya ni Baal do akmas syay a ōras anchan delak.”
3 Namo si Elyas kan nayyayo a mangisalākan so byay na. Inyonot naw pachirawatan naw, kan nangay do Beer-seba do Joda. Binidin na daw pachirawatan naw.
4 Ki naychatanyi si Elyas a nanakenakey a naychasaryan a nangay do let-ang. Nagsardeng a naydisna do sīrokaw no asa dēkey a kayo, kan naydasal a madiman dana pakono. Binata na a kāna, “Manawob dana dyaken sichangori mo ĀPO. Apen mo naw byay ko. Ta yaken, ki maganaganay akwaba kan siraw simna aāmang ko.”
5 Do dāwri, naypoktad do sīrok naw no kayowaw kan nakaycheh.
Naychihat a myan anghil a nangsalid sya, kan binata na kāna, “Maybangon ka kan koman ka.”
6 Minidit si Elyas, as kan do ohwanan naw, ki myan natāpi a tināpay a nahoto do hapot daw no napakohat saw a bato kan naiporanom a ranom. Komninan kan mininom, kan minirwa dana naypoktad.
7 Naybidi dana minirwa iyaw anghilaw ni ĀPO, kan sinalid narana a kāna, “Maybangon ka kan koman ka na mirwa, ta āngwan dyi ka makaibtor do malidyat a panakeyan monchi.”
8 Dawa, naybangon si Elyas, as kan komninan kan mininom dana. Do nakapaypayit naw do kinan naw, nanakey so apat a poho a karaw kan apat a poho a kahep mandan narapit na do Horeb a Tokon no Dyos.
9 Do dawri, nangay do asa aschip, kan pinahabas naw ahep daw.
Nagparang si ĀPO di Elyas
Inpakatoneng ni ĀPO chirin naw dya a kāna, “Āngo chabalay mo dya mo Elyas?”
10 Inatbay na a kāna, “Taywaraw kapangīmon ko dyimom ĀPO a Dyos a Manakabalin do Tābo. Ninonolay dan tawotawowaw no Israel tōlag mwaw, rinakrak da sayaw altar mo, kan diniman da sayaw propīta mo do ispāda. Yaken danaw moyboh a natokos a propīta. As kan changori, chakey da pa yaken a dimanen.”
11 Binata ni ĀPO a kāna, “Mohtot ka daw, kan maytēnek ka do tokonaya do salapen ko, ta yaken no ĀPO dan tābo, ki ītonchi akonchi a homabas daw.”
Do dāwri, myan mayit kan mabīleg a salawsaw a nangdalapos so tokon saw kan nanghomehomek so kalalāytanaw do salapen naw ni ĀPO, ki aba si ĀPO do salawsawaw. Katayoka no salawsawaw, myan gin-gined, ki aba si ĀPO do gin-ginedaw.
12 Katayoka no gin-ginedaw, myan apoy, ki aba si ĀPO do apoyaw. Katayokan no apoyaw, myan dēkey a manahayid a arasāas.
13 Do nakadngeyaw sya ni Elyas, pinalang naw kagay naw a pinatalob do rōpa naw, kan minohtot a naytēnek do asdepanaw do aschipaw.
Do dāwri, myan tīmek a nakabata sya dya a kāna, “Āngo chabalay mo dya mo Elyas?”
14 Inatbay na a kāna, “Taywaraw kapangīmon ko dyimom ĀPO a Dyos a Manakabalin do Tābo. Ninonolay dan tawotawowaw no Israel tōlag mwaw, rinakrak da sayaw altar mo, kan diniman da sayaw propīta mo do ispāda. Yaken danaw moyboh a natokos a propīta. As kan changori, chakey da pa yaken a dimanen.”
15 Binata ni ĀPO dya a kāna, “Maybidi ka do nayaman mwaw a nakayapwan mo, kan mangay ka do let-ang no Damasko. Anchan makarapit ka daw, patneken mo si Hasael a magāri do Aram.
16 Patneken mo pa si Jeho a pōtot ni Nimsi a magāri do Israel, kan patneken mo pa si Eliseo a pōtot ni Sapat a taga Abel-mehola a machitādi dyimo a propīta.
17 Dimanen anchi ni Jeho no aran sino a makalības do ispāda ni Hasael, kan dimanen anchi ni Eliseo no aran sino a makalības do ispāda ni Jeho.
18 Aran komwan, mamidin akonchi so papito a rībo a tawotawo do Israel a dyi pa nangidogod so tōd da a nagdāyaw di Baal, as kan dyi pa nangidadek so dangoy da do kokod naw ni Baal.”
No Tawag ni Eliseo
19 Dawa, komnaro daw si Elyas. Sinpangan na, nasarakan na si Eliseo a pōtot ni Sapat a madama a magarado. Myan daw pagar-arado na saw a asa poho kan dadwa a kaparis a nakapāko a bāka. Iya mismo, ki pagar-arado naw chaasa poho naw kan dadwa a kaparis. Do dāwri, naypasngen si Elyas dya, kan binahas naw kagay naw no propīta, as insibah na a inpalaylay di Eliseo.
20 Ki si Eliseo, kinarwan na saw bāka naw, kan nayyayo a nangadas di Elyas. Binata na dya a kāna, “Palōbosan mo pa yaken a mangay a machikepkep da āmang kan ānang ko, as machonot ako nanchi dyimo.”
Binata ni Elyas a kāna, “Somabat ka, ki iktokto mo an āngo pinarin ko dyimo.”
21 As dawa, kinarwan Eliseo si Elyas kan somnabat. Inhap naw paris saw no bāka na, kan pinarti na sa. Insongrod na saw pākwaw tan panglaneg na so karnyaw, kan intoroh naw linaneg naw dyirad tawotawowaw, as kinan da. Sinpangan na, komnaro a minonot di Elyas, kan nayparin dana kasidong na.