20
No Kadarop ni Ben-hadad so Samarya
1 Inakpeh ni Ben-hadad a āri no Aram bōyot na saw. Nachirayay dyaw tatdo a poho kan dadwa a ar-āri a konso kabalyo kan logan da a pachigobat. Somnonget si Ben-hadad a nanglakob so Samarya kan nangdarop sya.
2 Nanoboy siras somdep do syodadaw a mangay di Ahab a āri no Israel a mangibahey sya a kon da, “Nyayaw bata ni Ben-hadad:
3 ‘No pirak kan balitok mo, ki dyaken dana. As siraw kagaganayan saw a baket mo kan anak mo, ki dyaken dana.’ ”
4 Inatbay no āryaw no Israel a kāna, “On mo āpo āri. Yaken kan tābo a myan dyaken, ki dyira mo.”
5 Pinaybidi dana sa ni Ben-hadad natoboy saw, kan binata da a kon da, “Nyayaw binata ni Ben-hadad: ‘Nanoboy ako tan iparawat mo pirak kan balitok mo, siraw baket mo kan anak mo.
6 Ki komwan a ōras anchan delak, toboyen ko sanchiw opisyalis ko a mangay a maychichwas do palasyo mo kan bahabahay no opisyalis mo. Ahapen da sanchi a tabo mapapateg sa a warawara mo, kan katkaten da sanchi a ikaro.’ ”
7 Sinpangan na, tinawagan āryaw no Israel tabo panglakayen naw no nyaya a tana, kan binata na dyira a kāna, “Chiban nyo paw nawri a mahakay a maychichwas so riribok! Do nakapanoboy naw a mangdaw so kahap na siras babbaket ko saw kan siraw anak kwaw, pirak kan balitok ko saw, chinaskeh kwaba a intoroh dya.”
8 Inatbay dan tabo saw a panglakayen kan tabo saw a tawotawo a kon da, “Adngeyen mwaba iya mana machion kaba dya do akdakdawen naya.”
9 Dawa, inbahey na dyirad tinoboy saw ni Ben-hadad a kāna, “Ibahey nyo di āpo āri, ‘No pachirawatan mo, ki itoroh nanchi a tabo dāmwaw a inakdaw mo. Ki iyaw nyaya somarono a akdawen mo, maitoroh kwaba!’ ” Komnaro saw natoboyaw, kan inyangay daw atbayaw di Ben-hadad.
10 Myan danaw minsāhi ni Ben-hadad di Ahab a kāna, “Dosāen da pakono yaken no dyos saw so taywara an myan anchiw manawob a ahbek a matokos do Samarya a katataysan da a kemkeman no tabo a monot dyaken.”
11 Inatbay no āryaw no Israel a kāna, “Ibahey mo dya a ‘Dyi pakono a iyaw magpangas kapangilaylay na paw so pachigobat a akmas nangbahasaw so inlaylay na a pachigobat do nakatayoka na nangābak.’ ”
12 Nadngey ni Ben-hadad nyaya atbay do kadama naw kan siraw ar-āryaw a maychaynoynom do tolda da saw. Binilin na saw opisyalis naw a kāna, “Magpwisto kamo a mangdarop.” Dawa, nagpwisto sa mangdarop so syodadaw.
No Kapangābak ni Ahab si Ben-hadad
13 Ranan na a napariparin nya, myan nangay a propīta di Ahab a āri no Israel, kan binata na a kāna, “Nyaw bata ni ĀPO: ‘Naboya moriw taywaraya so kāro a bōyot? Iparawat konchi do kakamay mo sichangori a araw, kan mapatakan monchi a yaken iyaw ĀPO.’ ”
14 Inyahes ni Ahab a kāna, “Ki sino anchiw mamarin syay?”
Inatbay no propītaw a kāna, “Nyaw bata ni ĀPO: ‘Siraw babbarwaw a magsirsīrbi dyirad gobirnador saw do probinsya saw, ki siranchiw mamarin.’ ”
Inyahes narana a kāna, “Sino anchiw mangirogi so kapachilāban?”
Inatbay no propītaw a kāna, “Na, imonchi.”
15 Do dāwri, tinawagan ni Ahab siraw babbarwaw a magsirsīrbi dyirad gobirnador saw no probinsya saw, kan myan dadwa gasot, tatdo a poho kan dadwa. Sinpangan na, chinpeh naw kadwan saw a bōyot no Israel, kan papito sa rībo a tabo.
16 Minohtot sa do kayegen araw do kadama da Ben-hadad kan siraw tatdo saw a poho kan dadwa a ar-āri a nachirapa dya a maychaynoynom a maybobōk do tolda da saw.
17 Siraw babbarwaw a magsirsīrbi dyirad gobirnador saw no probinsya, ki nanma sa a minohtot.
As siraw ispya saw a tinoboy ni Ben-hadad, ki inpadāmag da dya a kon da, “Ari saw mahahakay a minohtot a yapo do Samarya.”
18 Binata na a kāna, “Tiliwen nyo sa a sibibyay an mohtot sa a mangay a machikapya. Komwan pa an mohtot sa a mangay a machigobat.”
19 Siraw babbarwaw a magsirsīrbi dyirad gobirnador saw no proprobinsya, ki nagmarcha sa a minohtot do syodadaw kontodo no bōyot saw a minonot dyira.
20 Kāda asa, ki diniman naw kalāban na. Maynamot do dāwri, nayyayo saw Arameowaw do kalakat daw siran Israelita saw. Ki si Ben-hadad a āri no Aram, ki nakalības a sisasakay do kabalyo, magrāman kadwan saw a komakabalyo na.
21 Minohtot iyaw āryaw no Israel, kan tiniliw na saw kabalyowaw kan logan saw a pachigobat, as kan diniman naw āro a Arameo.
22 Katayoka no nawri, nangay propītaw do āryaw no Israel, kan binata na a kāna, “Payiten mo pagpwistwan mo, kan chiban mo a maganay masisīta saw a parinen mo, ta daropen narananchi imo no āri no Aram a mirwa anchan somaronwaya a rayon.”
23 Siraw opisyalis saw ni Ben-hadad a āri no Aram, ki binalakādan da iya a kon da, “Siraw dyos da, ki dyos sa no paytoytokonan. Nawriw paynamotan na a mayīyit sa kan yaten. Ki an machilāban ta do tantanap, syirto a mayīyit tanchi kan sira.
24 Parinen mo nyaya: Patādyen mo saw opisyalisaw dyirad tabo ar-āryaw do toray da.
25 Machita a mangpeh ka a mirwa so bōyot mo a akmas nabo mo saw. Siraw nabo mo a kabalyo, tādyan mo sa. Siraw nabo a logan mo a pachigobat, tādyan mo pa sa. Dāwrinchi, maparin taw machilāban dyira do tantanap, kan syirtonchi a mayīyit ta kan sira.” Nachi-on si Ben-hadad a āri no Aram, kan pinarin naw akmas inbahey daw no opisyalis na.
26 Do somaronwaw a rayon, pinaychipeh na saw Arameowaw, kan nagmarcha sa a somnonget do Apek a machilāban dyirad Israelitaw.
27 Sira met Israelitaw, ki naychichipeh sa, kan do nakarawat daw so inpabahon daw dyira a mākan, nagmarcha sa a nachibayat do bōyot no Aram. Siraw Israelitaw, ki nagkampo sa do salapen daw a akmay dadwa dedekey a arban no kalding. As siraw Arameo, ki inapno daw tanaw a yanan da.
28 Do dāwri, naypasngen tawowaw no Dyos, kan binata na do āryaw no Israel a kāna, “Nyaw bata ni ĀPO: ‘Maynamot ta binata dan Arameo a si ĀPO, ki dyos no paytoytokonan kan dyos aba no payahosongan, iparawat ko sanchi dyimo nyaya taywara so kāro a bōyot do kakamay mo, kan mapatakan monchi a yaken iyaw ĀPO.’ ”
29 Do irahem no papito a karaw, nāw da naytobang a nagkampo a maysinsasalap do katakatayisa. As do chapapito naw a araw, naysindadarop sa. Siraw Israelitaw, ki nangdiman sa do asa karaw so 100,000 a Arameo a manakenakey a soldādo.
30 Siraw kadwanaw, ki nakalības sa a nayyayo do irahem no syodad no Apek. Dawriw nakaphasan ahadaw do omdibon no syodadaw, as nakatopakan 27,000 dyira. Nayyayo si Ben-hadad a nachikāmit a tomnayo do asaw a makatayrahem a kwarto no kōta do irahemaw no syodad.
31 Binata dan opisyalis naw dya a kon da, “Chiban mo, nadngey namen a siraw ar-āri no Israel, ki māsisyen sa. Mangay ta do āri naya no Israel a may-imara so makersang, kan itanan taw lagaw ta a mangipaboya so kapagpaitoray ta. Arā nanchimo a dya dimanen.”
32 Nangay sa do āryaw no Israel a nakaimara so makersang, kan naytanan so lagaw. Binata da a kon da, “Bata no pachirawatan mwaw a si Ben-hadad: ‘Machikakaāsi ako a palobōsan mo pa yaken a mabyay.’ ”
Inatbay no āryaw a kāna, “Ari pawri a mabyay? Iya, ki kakteh ko.”
33 Nadlaw dan opisyalisaw ni Ben-hadad iyaw nyaya binata no āryaw, ki maganay a pangilasīnan. Insigīda da a nahap chakey naw a batahen, kan binata da a kon da, “On, iyaw kakteh mwaw a si Ben-hadad!”
Binata no āryaw a kāna, “Mangay nyo a ahapen.” Do nakawara naw ni Ben-hadad, pinasakay ni Ahab do logan naw a pachigobat.
34 Binata ni Ben-hadad dya a kāna, “Pabidyen ko saw syodadaw a inhap ni āmang ko di āmang mo. Maparin mo mapatnek so bōkod mo a pagnigosyowan do Damasko a akmas pinarin naw ni āmang ko do Samarya.”
Binata ni Ahab a kāna, “Sigon do katolāgan, palobōsan koymo a mawayawayaan.” Dawa, namarin so katolāgan dya, kan pinalobōsan narana iya a mayam.
No Kaikeddeng no Asa Propīta a Madōsa si Ahab
35 Maynamot do bilin ni ĀPO, asa yapo dyirad bonggoy dan propītaw nangmandar so kapayngay naw a propīta a kāna, “Danogen mo pa yaken.” Ki naskeh no rarayay naw.
36 Binata no nangmandaraw a propīta a kāna, “Maynamot ta dyi mo a inanohdan si ĀPO, anchan makakaro ka dyaken, dimanen nanchimo no asa lion.” As apāman a nakakaro mahakayaw, nasarākan no lion, kan diniman na.
37 Sinpangan na, nakadongso danaw propītaw so matarek a mahakay, kan binata narana a kāna, “Danogen mo pa yaken.” Pinangayan no mahakayaw kan nabigaran propītaw.
38 Do dāwri, komnaro a nangay a naytēnek propītaw do payisaw no rarahan a nangnanaya so āryaw no Israel. Nagpamarang a matarek a tawo a nakabarābad so oho a nataloban saw mata na.
39 As do nakahabas naw no āryaw, tinawagan no propītaw iya a kāna, “Iyaw pachirawatan mo, ki nangay do hobokaw no paggogobatan. Myan soldādo a nangay dyaken a myan so natiliw, kan binata na a kāna, ‘Gwardyaan mo nyaya mahakay. An makalības, nawriw pagbāyad mo byay mo, mana bayādan mo so molta a tatdo a poho kan apat a kakīlo a pirak.’
40 Do kayan naw no chinabalay no pachirawatan mwaya do dya kan dwadaw, nakalības mahakayaw.”
Binata no āryaw no Israel a kāna, “Nawriw pakaokoman mo. Imo nangeddeng so bōkod mo a inawan.”
41 Sinpangan na, inalistwan a pinakaro no propītaw naibarābadaw dyirad mata na, kan nailāsin no āryaw no Israel a iya, ki asa dyirad propītaw.
42 Binata na do āryaw a kāna, “Nyaw bata ni ĀPO: ‘Pinalobōsan mo a mawayawayaan asa mahakay a inkeddeng ko a madiman. Dawa, byay mo tādi no byay na, kan iyaw tawotawo mo do tawotawo na.’ ”
43 Somnabat iyaw āryaw no Israel do palasyo naw do Samarya a malidliday a maydadamoyong kan makasokasoli.