Mikyas
No Pakatonngan So Paytābwan No Nya Libro
Si propīta Mikyas, ki nakayapo do asa idi do tana a Joda a akin abagātan a pagāryan no Israel. Iyaw nya Mikyas, ki rarayay ni propīta Isayas do dāwri a chimpo, kan iyaba si Mikyas a pōtot ni Imlah a mabāsa ta do 1 Ār. 22:8. Manganohed si Mikyas a masngen dana magtōok tawotawo do Joda do ītwaw a didigra a akmas inpadto ni propīta Amos a pasaren dan tawotawo do akin ammyānan a pagāryan no Israel. Iyaw paynamotan no kapangdōsa no Dyos dyira, ki machiyengay do dyi daw a kaipatongpal so kosto a kinalinteg. Aran komwan, malawag minsāhi ni Mikyas kan maboyaw pangilasīnan a arinchiw namnama do masakbayan.
Myan saw masisīta a birsikolo do dya a libro a machita nyo a chichiban a maganay a akma so kaipaboya no kapya do intīro a lōbong a maynamot do kapagtoray no Dyos (4:1-4); iyaw padto maynamot do matan-ok a āri a yapo do kapoonan ni Dabid kan mangyangay so kapya do nasyon a Israel (5:2-5a). As kan do 6:8, myan paytābwan no kārwan a inbahey da no propīta do Israel a binata da a kon da, “Nyaw akdawen na dyaten: parinen taw malinteg, ipaboya taw no dya magbalbāliw a kadaw, kan maybibyay ta a sipapakombaba a machichasa do Dyos ta.”
No Naychakarwan No Nya Libro
No kaokom no Israel kan Joda, kan no kaipapabidi dana no kapya (1:1–2:13)
No gatos kan kasoli no Dyos a maynamot dyirad pangolwen dan taga Israel (3:1–5:15)
No kāso ni ĀPO a maikontra di Israel, as kan iyaw minsāhi a pakaballaāgan kan pangnamnamaan (6:1–7:20)
Mikyas
1
1 Nyaw minsāhi a inpakatoneng ni ĀPO di Mikyas a taga idi a Moreset a maynamot do kaokom no Samarya kan Jerosalem. Naboya naw nyaya do chimpwaw a nakapagāri da Jotam, Ahas, kan Hesekias do Joda.
No Dongdong-aw Para Do Samarya kan Jerosalem
2 Mangadngey kamo, inyo a tabo a tawotawo.
Adngeyen nyo nyaya, inyo a tabo a omyan do tanaya!
Si ĀPO a Manakabalin mangsaksi so maibōsor dyinyo.
Adngeyen nyo, ta maychirin a yapo do masantwan a timplo na.
3 Chiban nyo! Īto dana si ĀPO a yapo do masantwan a yanan na.
Gomchin anchi kan lasagan na sanchiw matotohos saya a tokotokon do tanaya.
4 Siraw katokotokonan saya, ki malonag sa
a akmas nadangdangaw a alid do apoy.
Maloyo sanchi do payahosongan saya
akmay ranom a gomtos do aphas.
5 Tabo nyaya, maparin anchi maynamot ta nagribīldi saw kapotōtan Jakob.
On, maparin nya a maynamot ta naygatos saw kapotōtan Israel.
Āngo iyaw gatos dan kapotōtan Jakob?
Iyabawriw karahet dan tawotawo no Samarya?
Dino sintro no pagdaydayāwan so didyosen do Joda?
Do Jerosalem abawri?
6 Binata ni ĀPO a kāna, “Dawa, payparinen konchiw Samarya a bonton
a yanan a paymohan so kaobāsan.
Paychabadebadedehen konchiw bato na saw do payahosonganaw
tan magparang saw pondasyon na.
7 Mapsapsa sanchiw didyosen na.
Tabo mapapateg saw a nakpeh da do timplo, ki masosohan sanchi so apoy.
Rarayawen ko sanchi a tabo bolto da saw.
Maynamot ta nakpeh saw nya a yapo do tangdan daw no maglaklāko saw so asi,
tangdan dananchi a mirwa no matarek a maglaklāko so asi do matarek a nasyon.”
8 Binata ni Mikyas a kāna, “Maynamot do dyaya, magāsog kan magdongdong-aw ako.
Mayam ako a abos tokap kan silalābos.
Maydawo ako a akmas bolawaw a chito
kan maylilyak ako a akmay gokgok.
9 Mapya pabaw bigar no Samarya,
kan nayadis dana do Joda.
Nakarapit dana do rowanganaw no idi dan tawotawo ko
a aran do Jerosalem a mismo.”
No Kasōngad Da No Kabosor Do Jerosalem
10 Ibahey nyo aba do kabōsor ta saya do idi a Gat iyaw nakaābak ta.
Maychahoho kamo abas aran asa katedted.
Inyo a tawotawo do idi a Beth-leapra,
maydipodiporis kamo do ahbek do ladingit nyo.
11 Inyo a tawotawo do idi a Sapir, maakaw kamonchi a mabahod,
kan mayam kamonchi a silalābos a masnek so kayayan.
Inyo a tawotawo do Saanan,
makahtot kamo paba do idi nyo.
Anchan madngey nyo kapagdongdong-aw da do idi a Bet-esel,
matonngan nyonchi a abaw kamāngan daw.
12 Siraw tawotawo do idi a Marot,
manghahaw sa so kapakalong-aw da
ta iyaw didigraya a yapo di ĀPO,
ki narapit narana a manda do rowangan no Jerosalem.
13 Inyo a tawotawo do idi a Lakish,
isagāna nyo kabalyo nyo do logan nyo a pachigobat.
Inyo nangisongsong so Jerosalem a naygatos,
ta tinahatahan nyo gatos daw no Israel.
14 Dawa, manoroh kamos sāgot a pamakāda do idi a Moreset-Gat.
Iyaw idi a Aksib, ki inallilaw na saw āri saya no Israel.
15 Inyo a tawotawo do idi a Maresah,
manoboy si ĀPO so mangsākop so idi nyo.
Siraw pangpangōlo no Israel,
mangay sanchi a tomayo do aschip no Adollam.
16 Inyo a tawotawo do Joda, chischisan nyo oho nyo do kapagmamayo nyo
maynamot dyirad anak nyo saw a chadaw nyo.
Chischisan nyo oho nyo a akmas oho naw no kangkang,
maynamot ta maakaw saw anak nyo a sibabahod.