2
No Maparin Anchi Dyirad Mangidadanes
1 Kapakāsi da panchi no magplāno so marahet,
kan siraw mangipangtaw do pakaychehan da.
Apaman a maysesedang, maychakatekateh sa mangipatongpal
maynamot ta myan toray da mamarin sya.
2 An myan saw bengkag a chakey da, tod da sodiben.
Masaw do bahabahay, ki tod da agāwen.
Sikāpan daw tawo tan madyira daw bahay na,
kan takawen daw tāwidaw no pamilya na.
3 Dawa, nyaw binata ni ĀPO a kāna,
“Iplāno ko kaiyangay ko so didigra dyinyo
a akmanchiw pāko a dya mapakaro do lagaw nyo.
Arabanchiw kapangas nyowaw a mayam,
ta chimponchi no didigra nyo.
4 Do dāwrinchi a chimpo, oyawen danchinyo do
kaikansyon da so nya kanta a kapakaōpay dyinyo:
‘Komplito danaw nakararayaw namen!
Inhap dana ni ĀPO iyaw tana namen,
kan intoroh naranaw bengkag namen
dyirad nanglipot dyamen.’ ”
5 Dawa, apabanchi dyirad tawotawo ni ĀPO
mangibinglay so tana daw.
Siraw Sinan Propita
6 “Mangipadto kaba,”
bata dan sinan propīta da saw.
“Ikasaba mwabaw komwan.
Marapit abanchi yaten pakasnesnekan!”
7 Maparinori a ibahey nya, inyo a kapotōtan ni Jakob?
Tomnawos danawriw kaānos ni ĀPO a mapatongtong so nawri?
Kosto abawri dyirad mamarinaw so maganay?
8 No atbay ni ĀPO, ki kāna,
“Rinaot nyo sabawriw tawotawo ko
a akma nyo say kabōsor.
Pinalang nyo a binahas laylay daw no homabas saw a sitatalna
a akma siras mangliklikaw so gobat.
9 Pinaksyat nyo mababakes saw a bālo
do bahabahay a chadaw da.
Inkaro nyo abos pandan a inpatāwid ko
dyirad anak da.
10 Maytēnek kamo, kan komaro kamo na!
Do dyabaw paynahahan nyo,
ta linaposan nyo na so gatos nyo,
kan rinarayaw nyo na golpi.
11 An myan maybayataw kan mangallilaw a makabata sya a kāna,
‘Ipadto ko a moyog anchi dyinyo palek kan arak,’
iyaw nyaw kombini a propita dan nyaya tawotawo!”
No Kapabidi Ni Āpo So Tawotawo Na
12 Nyaw inkari ni ĀPO a kāna, “Sigorādo a akpehen konchi inyo a Jakob.
Sigorādo a akpehen ko sanchi a tabo nakalāsat a yapo do Israel.
Paychichipehen ko sanchi a akmay karniro do koral,
as kan akmay arban do pasto.
Iyaw tana da, ki mirwa dananchi
a mapno so tawotawo a maariwāwa.”
13 Manma anchi Si ĀPO a manyiwang a mangihtot a yapo do nakaakawan daw.
Mawlot sanchi a mohtot do rowangan naw no syodad.
Iyaw āri daw, manma anchi a mohtot.
Si ĀPO anchi a mismo mangidaōlo do kahtot da.