5
1 Tawotawo no Jerosalem, isagāna nyo bōyot nyo saw,
ta nadibon ta na no kabōsor.
Baōtan danchi so baston iyaw mangitoray no Israel
do pisnyi na tan asnesneken da.
No Mangitoray a Yapo Do Betlehem
2 Binata ni ĀPO a kāna, “Imo a Betlehem Eprata,
aran dēkey ka dyirad partīdos no Joda,
ki yapo dyimo, mohtot anchiw asa a mangitoray so Israel
a no kapoonan na yapo do kaychōwa pa.”
3 Dawa, iparawat nanchi ni ĀPO tawotawo na dyirad kabōsor da
a mandan mayanak no mabakesaw iyaw anak naw.
Sinpangan na, maybidi sanchiw kakabagyan naw a naakaw,
kan machirapa dana sanchi dyirad tawotawo no Israel.
4 Anchan mangay, maytēnek a mangidaōlo dyirad tawotawo na
a maynamot do bīleg a yapo di ĀPO kan do dayag no ngaran ni ĀPO a Dyos na.
Siraw tawotawo, ki maybibyay dana sanchi a matalna,
ta dawrinchi, iyaw dayag na, ki romapit do intīro a lōbong.
5 Iya dananchiw pakayapwan kapya da.
No Kawayawaya Kan Kadōsa
Anchan raoten dan taga Asirya iyaw nasyon taya,
as tomokap sa do tana taya,
mapatēnek ta so papito a mangidaōlo kontra dyira
mana wawaho a pangpangōlo no tawotawo.
6 Idaōlwan darananchiw Asirya do tarem no ispāda,
kan asdepen daw rowanganaw no tana ni Nimrod.
Iyaw āri taya, ki isalākan nanchi yaten dyirad Asirya
anchan daropen da yaten kan padasen daw lomasag do yanan taya.
7 Siraw nakalāsat saw do kapotōtan ni Jakob,
ki maychawpit sanchi dyirad āro a nasnasyon.
Akma sanchiw apon a yapo di ĀPO,
kan akma say chimoy a mangsibog so katamtamkan
a dya manghahaw do tawo
mana mangnanaya so tawotawo.
8 As siraw nakalāsat saw a kapotōtan ni Jakob,
ki myan sanchi do payapayawan dan nasnasyon do naychawpitan daw.
Akma sanchiw lion do yanan dan animal saw do kahasan,
kan akmay bomaro a lion do yanan dan arban a karniro
a manggammat an homabas kan piripiriten naw mahap naw,
kan aba polos makaisalākan sya.
9 Abāken anchi no Israel kabōsor na,
kan tomawos sanchi a tabo mangipsok sya.
Pasantwen Ni ĀPO Tawotawo Na
10 “Do dāwri a araw,” binata ni ĀPO a kāna,
“Dimanen ko sanchiw kabalyo nyowaw,
kan rarayawen konchi a tabo logan nyowaw a pachigobat.
11 Rarayawen ko sanchiw syodad do tana nyo,
kan lasalasahen ko sanchiw kōta nyo.
12 Akteben ko nanchiw kapanolib nyo
kan apabanchiw mamadto nyo.
13 Rarayawen ko sanchiw didyosen nyo saw,
kan siraw bata nyo saw a masantwan a parey a bato a pagdaydayāwan nyo
tan dyi kamonchi a makapagdaydāyaw a polos
do pinarin no bōkod nyo a tanoro.
14 Bagoten konchi dyinyo parey saw a didyosen ni Aserah,
kan rarayawen konchiw syodad nyo.
15 Do taywara kasoli ko, bahsen ko sanchiw
nasyon a dya magtongpal dyaken.”